Read Ebaibuli 1961 Awaragasia 10 Bible Online

Awaragasia 10 - Ebaibuli 1961 bible

Awaragasia 10

¹Awaragasia nuka Solomon. Okoku loecobe einakini papake alakara: Konye okoku loebaŋaana itakadikini totoke.

² Iboro lukakais nuipu luedumunio kanuka aronis mam imedaete, Konye adolit ŋes kiyuuni katwanare.

³ Mam EJAKAIT ecamakini aijar naka ekadoliton eriebi eteŋei: Konye ireŋeari aiŋobel naka ekaronon.

⁴ Akan naeloŋwana eyauni ican, Konye akan naekukurana itabari.

⁵Loetukonokini kakamu ŋes okoku loecobe: Konye ŋol loejotoi kaidweny ŋes okoku loiswamai nukileic.

⁶ Ejaas arereŋesio kakou naka ekadoliton: Konye erapit akaje aituk naka ekaronon.

⁷ Isirereŋi akiitun ekadoliton; Konye ebosi ekiror loka ekaronon.

⁸Iyuunete lukacoa kotauon aicorakineta: Konye ibirori loinerenenei nukabaŋaanut.

⁹ Ŋol loelosenenei itenara elosenenei kainapakina: Konye ejenunio lomagul ikerotin.

¹⁰Loeedi kakoŋuke eyauni ican, Konye ibirori loinerenenei nukabaŋaanut.

¹¹ Aituk naka ekadoliton ŋes atan nakaijar: Konye erapit akaje aituk naka ekaronon.

¹² Elait isidiki iŋuŋeta: Konye erapi amina aibucanareta kere.

¹³ Edumunio acoa kaituk naka ŋol kaloemisiana, Konye ejai ebela kanuka ŋol kaloemamei ajenun.

¹⁴Iŋadakinete lukacoa aijen: Konye aituk naka loebaŋaana isukunyuni amudiario.

¹⁵ Abara naka ekabaran ŋes ereke loegogoŋ: Amudiar naka lukican ŋes icanikec.

¹⁶Aitaaritoi naka ekadoliton itebei ŋes aijar, Eiyas loka ekaronon itebei ŋes aronis.

¹⁷Ŋol loibwaikini etau aituutoorio ejai orot loebei aijar: Konye epaari ŋol loijalijala aitoronio.

¹⁸Ŋol loimunoni elait erai loka aituk nakeŋalan: Ebaŋaana da ŋol loesabanakinenei.

¹⁹ Kaipues naka akiro mam eswaki aibucar: Konye ŋol loetiki akeŋajep iswamai kacoa.

²⁰Eputos aŋajep naka ekadoliton ka epuesa loseuna: Etau loka ekaronon erai lootai.

²¹Itanyami aituk naka ekadoliton luipu: Konye etwakete lubaŋiok naarai eolikinete acoa.

²² Arereŋ naka EJAKAIT itabari, Mam da inyalakini ican kaŋes.

²³Aswam aronis esubit bala abolia mama ejai ebaŋ: Aswam da nukacoa itojokit etuŋanan lokajenun.

²⁴ Nuekurianari ekaronon kes nuedoikinete ŋes: Ido einakinio ekadoliton nuimiela.

²⁵ Ketubor etapipirio, emamei bobo ekaronon: Konye icasit ekadoliton ikar kere.

²⁶Kwape ebino loedwar ria kokel, ka apuru toma akonye, Ikoni nen loiloŋwana kama ejaas ŋul luiyakito ŋes.

²⁷ Ayoŋit EJAKAIT iyatakini apaarasia: Konye ituurianitai ikar luka ekaronon.

²⁸ Amun naka ekadoliton itodoli aiyalama: Konye eoliori amun naka ekaronon.

²⁹ Erai EJAKAIT abwas naegogoŋ mama ejaas luitenara kotauon: Konye erai amudiar mama ejaas ikeswamak numam adolit.

³⁰Mam cut ikadolitok elemanario: Konye mam ikaronok iboienenete kakwap.

³¹Itolomuni aituk naka ekadoliton acoa: Konye emudiario aŋajep naepaarit.

³²Ejeni aituk naka ekadoliton nuecamunio: Konye aituk naka ekaronon ejeni nuepaarito.