Read Ebaibuli 1961 Awaragasia 12 Bible Online

Awaragasia 12 - Ebaibuli 1961 bible

Awaragasia 12

¹ŋol loekoto alimokinio, ekoto ajenun: Konye ŋol loelait aitoronio esubit bala etiaŋ.

²Etuŋanan loejok edumuni asianut kama ejai EJAKAIT, Konye etubokini ŋesi aitelekar etuŋanan lokibotei lueroko.

³Mam etuŋanan icasit kanuka aronis: Konye esali aliasit naka ekadoliton komam ijaŋijaŋio.

⁴ Aberu naejok ŋes aboko naka okilenike: Konye ŋin naitisili esubit bala abosus kotoma akojoke.

⁵Edolito aomisio nuka ikadolitok: Konye iŋalana ainerun naka ikaronok.

⁶Eperunete akiro nuka ikaronok aokot: Konye eyuuni aituk naka luitenara.

⁷ Elatario ikaronok koolios: Konye ebwoi etogo loka ekadoliton.

⁸ Iturio etuŋanan kwape ejaar acoake: Konye emenio ŋol loejai etau lomagul.

⁹Lomam enyaritai araut ibore, kojai ebulesit, Itelekarit ŋol loiturokina, komameete inyamat.

¹⁰ Eomit ekadoliton aijar naka Iketiaŋ: Konye eroko aitimesia nuka ikaronok.

¹¹ Loekoriei alupoke ejaunos kinyamat luipu: Konye ŋol loerupari aamameak emamei aijen.

¹² Iŋobelei ekaronon eboi loka lukelepa: Konye aliasit naka ekadoliton erai araito.

¹³ Aibucar naka aituk ŋes eic mama ejai lokelepa: Konye ekui ekadoliton kocan.

¹⁴ Imonikini etuŋanan araito nuejok nuka aitukuke: Inyakakinio etuŋanan aswamisio nuka akaninike.

¹⁵ Itojokit lobaŋ ekerot kakonyeneke: Konye lokacoa epupokini ainerun.

¹⁶Ejenunio atipet anyunyura naka lobaŋ: Konye ibwai etuŋanan lokacobeu ileic.

¹⁷Ŋol loelimokini nukabeit isideleleuni adolit, Konye ekajenan lokaiŋal isideleleuni aiŋalanut.

¹⁸Ejai loisudi akiro kwape aicum kekileŋ; Konye eŋaleuni aŋajep naka lukacoa.

¹⁹ Iketakina aituk naka abeit apaarasia kere: Konye aŋajep nakaiŋal erai naka aied akoŋu.

²⁰Ejai aiŋalanut otauon luka ŋul kaluepwakunete aronis: Konye iyalamasi ŋul luinerunete ainapakin.

²¹ Mam ican edoikinete ekadoliton: Konye imonikinos ikaronok aronis.

²² Aituke nukaiŋal eraas nuketale mama ejai EJAKAIT; Konye isiyalamikinete ŋes ŋul luiswamaete nukabeit.

²³Ibwai etuŋanan loecobe aijen: Konye ilabilabete itauon luka ibaŋiok abaŋaanut.

²⁴ Eyai akan naka luekukuraka: Konye eraunos luekalanyaka ikeswamak nukailolitoi.

²⁵ Aiyaloŋoŋ kotau loka etuŋanan itukukumi: Konye isiyalamikinete ŋes akiro nuejok.

²⁶Eraun ekadoliton ekeŋarenikinon eidunyeteke: Konye erot loka ikaronok itapaari kes.

²⁷Etuŋanan lokalanyana mam epei luamejau: Konye iboro luka akais nuipu luka ituŋa eraunos luka kaluekukuraka.

²⁸ Ejai aijar toma orot loka adolit; Emamei atwanare korot kaŋol.