Read Ebaibuli 1961 Awaragasia 19 Bible Online

Awaragasia 19 - Ebaibuli 1961 bible

Awaragasia 19

¹ Ejok lokican loelosenenei kabeiteke Itia lokaituk namagul ido kobaŋaana.

² Arai mam aijar ejaas kaijen, mam ejok; ŋol da loiwonyi kakekeje ediaki.

³ Eburiari abaŋaanut naka etuŋanan ekerot; Kosodi enyunyurikini eketau EJAKAIT.

⁴Abara iyatakini ipapero luipu: Konye lokican etiakas kepaperoke.

⁵ Ekajenan lokeŋalan mam eswaki aiticanio; ŋol da loesabanakini mam ekui.

⁶Ipu luimaimaete asianut naka ekapolon: Ido ŋolituŋanan erai epapero loka ŋol kaloeinakini ainakineta.

⁷Elaete lokican ikeinacan kere: Itelekarito ca ma ikepapero alwakiar kama ejai! Ibwapit kes kakiro, konye koekarito.

⁸Loedumuni acoa emina aijarake: Loerici aijen edumuni ajokis.

⁹ Ekajenan lokeŋalan mam eswaki aiticanio; ŋol da loesabanakini emudiario.

¹⁰ Aijamam mam ibusakinit lobaŋ; Aso ikoni ibusakinit ai ebulesit ayait lukapolok?

¹¹ Acobeu einakini etuŋanan aiyap anyunyura; Ido aibusesuke ŋes aisioni aibucaret.

¹²Anyunyura naka ekabaka esubit bala agat naka eŋatuny; Konye akesianut bala akopyo kanya.

¹³Erai okoku lobaŋ ican kaneejai papake: Aŋolopa da naka aberu ŋes aiit naduc.

¹⁴ Etogo ka abara kes airumeta nuepote kaneejaas lukapapa: Konye aberu naecobe ebuni kaneejai EJAKAIT.

¹⁵Akalanyanut eyaŋauni ajo nuipu; Aijar da naijalijalana eriebi eteŋei.

¹⁶ Loidari aicorakinet idari akeijar: Konye lomam ibwaikinit eketau toma orotinike etwani.

¹⁷ Loitimi lokican eyuuni EJAKAIT, Ido etacakini ŋesi bobo aswamuke naejok.

¹⁸Koleco ikonikoku naarai ejai amun; Kwabo sirikiŋobel amudiarioke.

¹⁹Etuŋanan lokanyunyura naepol egeli: Naarai arai kiyu ŋes ibusakinit airucakin ayuun.

²⁰Kopupununei ainerun, kiyuununei aisisianakinio, Tetere iraun lokacoa kapaarasiakon nukawasia.

²¹ Ipu nuelosikinit etau loka etuŋanan, Konye ainerun naka EJAKAIT icasit.

²²Nuimiela etuŋanan ŋes asianutuke: Lokican da itelekarit ekeŋalan.

²³ Ayoŋit EJAKAIT eyauni aijar; Ŋol da loejaatar ŋin iboie imono; Mam aronis ebunokini ŋes.

²⁴Idoni akan naka loeloŋwana atuba, Komam bobo ekot ainyakun toma aitukuke.

²⁵Kinom loemwaŋana, isisiauni ijimat acobeu: Kitoron loejai aijen, ejenuni da aijen.

²⁶Loeŋasi papake, kireŋea da totoke, ŋes ikoku yenisurumi ileic, iriuni da amorosit.

²⁷ Okokuka, kinyek akiirar aisisianakinio Ipaari do anyoun kakiro nuka aijen.

²⁸Isekeli ekajenan lotai etube: Ilikori aituk naka ekaronon numam adolit.

²⁹Itemokinitoi itubesia kanuka lukamwaŋak, Ka ibelai da kanuka ipuran luka ibaŋiok.