Read Ebaibuli 1961 Awaragasia 21 Bible Online

Awaragasia 21 - Ebaibuli 1961 bible

Awaragasia 21

¹Ejai etau loka ekabaka akan naka EJAKAIT kwape aleles naka akipi: Ibelokini ŋes kwape ekotor.

² Ŋolirot loka etuŋanan edolit kakonyeneke: Konye itemi EJAKAIT itauon.

³ Aswam nukabeit ka etube, Iyuunit EJAKAIT aitelekarit asuban.

⁴Akonye nueomiara ka etau lokaiwoŋonut, Atala naka ikaronok, ŋes aronis.

⁵Aomisio nuka luekukuraka eyaŋaunete aipues: Konye ŋolituŋanan loisunyit, isunyari toma aibabanitoi.

⁶Adumun abar kaŋajep nakeŋalan, Esubit bala eiyeŋane loekutario, eic da lokatwanare.

⁷Akaje naka ikaronok epiyari kes; Naarai eŋerito aswam nuketube.

⁸Emagul noi erot loka ŋol kaloigugunatoi karonis: Konye ejokuka aswamisio nuka ŋol kaloesegara.

⁹Ejok aiboi kagor naka etogo kokuju, Itia aiboi kaberu naeŋolopana kotogo loelal.

¹⁰ Iŋobeli etau loka ekaronon aronis: Mam ekeidunyet edumuni asianut kakonyeke.

¹¹Arai iticanio ekamwaŋan, itocouni ijimat, Arai isisianakinio lokacoa edumuni aijen.

¹² Eomoomoi ekadoliton etogo loka ekaronon; Kwape elatarere lukaronok kooliosi.

¹³ Loisikakini akeki aimony naka lokican, Ŋes da kemony, konye mam epupunio.

¹⁴Ainakinet nakaiyeiyea isinapikini anyunyura, Ainakinet da nakotorob isinapikini anyunyura naepol.

¹⁵Aitodol etube isiyalamikini ikadolitok, Konye emudiari luiswamaete numam adolit.

¹⁶Etuŋanan loepaari anyoun koroto loka aijen Ibworari kokodet loka lukatwak.

¹⁷Loimiela aiyalama eraenena lokican, Loimiela ajon ka akinyet mam ebari.

¹⁸ Eraun ekaronon alakunet naka ekadoliton: Luebilete ibotei da ebeete aibois naka luitenara.

¹⁹Ejok aiboienen kakwap nakamodiŋ, Itia aiboi kaberu naeŋolopana naedelana.

²⁰ Ejai abar naka akais nuipu ka akinyet togo loka ekadoliton; Konye ilikori lobaŋ.

²¹ Ŋol loibwapit adolit ka aitim Edumuni aijar ka adolit, ka aibuses da.

²²Edokari lokacoa ore loka luegogoŋ, Etiyaikini agogoŋ nakemunosi.

²³Ŋol loidari aitukuke ka aŋajepeke, Idari akeijar kinyek adumun ican.

²⁴Ekamwaŋan ŋes ekiror loka etuŋanan loiwoŋoono, loeomiara, Iswamai ŋesi kaisosolonut nakaiwonoonut.

²⁵Eari aiŋobel loeloŋwana: Naarai eŋerito akekanin aswam.

²⁶Eraŋana ekaronon aitiwar akwap: Konye ekadoliton einakini komam imiki.

²⁷Asubanit naka ekaronon erai naketale: Arai eyaunit ketau lokaronon itelekarit ca araut naketale!

²⁸Eoliori ekajenan lokeŋalan: Konye ejaenena akirot naka etuŋanan kaloepupuni.

²⁹Etuŋanan lokaronon itogogoŋit akekonyen: Konye loitenara iteteni ikerotin.

³⁰Emamei acoa karaida aijen, Karaida ainerun arianakin ka EJAKAIT.

³¹Ekapakinitai ebalasit kapaaran naka ejie: Konye ebuni aipikor kaneejai EJAKAIT.