Read Ebaibuli 1961 Awaragasia 25 Bible Online

Awaragasia 25 - Ebaibuli 1961 bible

Awaragasia 25

¹Eraas nupe nu da awaragasia nuka Solomon, ituŋa luka Kesekia ekabaka loka Yuda.

² Aibuses naka Edeke ŋes aimunon akiro: Konye aibuses naka ikabakan ŋes aiŋic akiro.

³Akui kwape elwaniar kokuju, akwap da kwape idulor kokwap, Kwaŋin ŋes emam eŋicunere itauon luka ikabakan.

⁴Kolema elele kopuesa, Kosodi ejaunete ekatatan kaloitemokinio atibo.

⁵Kolema ikaronok kakonyen nuka ekabaka, Kosodi iketakin eicoloŋoke loka ajakanut kadolit.

⁶ Siriwomiara kakonyen nuka ekabaka, Karaida aibwo kaibois naka lukapolok:

⁷Naarai ejok alimokinio ebe, “Kikuny ne”; Itia aitisilio kakonyen nuka ekapolon. Nuaanyutu akonikonye.

⁸ Sirikisunya alosit aitepeg; Kinyeis aolikin nuiswamai kokau, Nakisurumia ekoniidunyet jo ileic.

⁹ Kopur akonikirot kekoniidunyet elopet, Kwabo sirikitejen nukaiyeiyea nuka ecetuŋanan:

¹⁰Kinye loepupuni aimoro jo, Komam enaŋete iemutokon lueroko.

¹¹Akirot naibecokino inerai Esubit bala araito nuka esabu kotoma obukito luka epuesa.

¹²Kwape etet loka esabu ka yenisirir yenika esabu loejok, Ikoni nen loitoroni akit naerimari.

¹³Kwape alilim naka akaka kapak naka aisak, Ikoni nen ekiyakia lomunot kaneejaas luijukarete, Naarai iteteuni itauon luka ikapolokitokoke.

¹⁴ Kwape idouon ka ekwam kemamuun akiru, Ikoni nen ŋol loilabilabi kanuka ainakinetake numam einakinit.

¹⁵Toma atitiŋikin noi ŋes ijodijodio lokapolon, Aŋajep da naenonok ebili akoit.

¹⁶Arai idum esik loka ao, konyam lokidaunit; Kinyek ainyam noi kosodi ailek.

¹⁷Kociciŋ akonikeju kotogo loka eidunyetekon, Kinyek ŋesi apianikin jo, kosodi aila.

¹⁸ Etuŋanan loesabanakini ekeidunyet Erai anyul, ka ekileŋ, ka ekojo loeiit.

¹⁹ Amunokin etuŋanan lomere lomunot kapak naka ican, Esubit bala ekelai loipirit arai akeju naeŋabuikino.

²⁰ Kwape etuŋanan loelacari inapeneke kapak naka aaterot. Ido kwape ebino loedwar toma osoda, Ikoni nen loeyeikini ikososio loekadakinit etau.

²¹ Arai kerieb lokasurupikon eteŋei, kijaiki inyamat; Arai kejak akure koinak ŋes akipi komat:

²² Naarai inokokini akim naka atotole akouke, Ido kiinakini EJAKAIT eropitikon.

²³Eyaŋauni ekwam loka agolitomei akiru: Aŋajep da nakedeideon eyaŋauni kwaŋin akonyen nukanyunyura.

²⁴Ejok aiboi kagor nakokuju togo, Itia aiboi kaberu naeŋolopana kotogo loelal.

²⁵Kwape akipi nukalilimok nuearete akure, Ejaas kwaŋin akiro nuejok nuepote kakwap naelwana.

²⁶ Kwape atan naipurujauna, ka akoŋu naka akipi naemunauna, Ikoni nen etuŋanan loedolit loeremorete lukaronok.

²⁷ Mam ejok ainyam esik lokao loepol: Kwaŋin arai emoete ituŋa aibusesukec, mam erai aibuses.

²⁸Etuŋanan lomam eyait ekemoyo. Esubit bala ere loetiyatiyauna loemamei arwatat.