Read Ebaibuli 1961 Awaragasia 29 Bible Online

Awaragasia 29 - Ebaibuli 1961 bible

Awaragasia 29

¹Etuŋanan loitinikiki ekemurisiŋ arai itoronio aatenak nuipu, Itiuni abilio komam eŋaleuni.

²Naiyatanakinotor ikadolitok iyalamasi ituŋa, Konye arai eyait etuŋanan lokaronon idinyasi ituŋa.

³ Ŋol loekoto acoa isiyalamikinit papake, ŋol loiboiete kanudotia icanicani ikeboro.

⁴Iticasi ekabaka akwap kanuka etube: Konye loitelemi ainakineta emunauni akwap.

⁵Etuŋanan loemai ekeidunyet Elokikin eboi akejeke.

⁶Aibucar naka etuŋanan loerono ejai eic Konye eyei ekadoliton elakara da.

⁷ Ejeni ekadoliton akiro nuka lukican: Konye emamei lokaronon aijen ajenun ŋun.

⁸Ituŋa lukamwaŋak ipurujaete ere: Konye lukacoa isibelokinete anyunyura.

⁹Arai epegasi lokacoa kebaŋ, Enyunyurikini ekieniei, emamei da aiyeŋun.

¹⁰Elaete ikaarak ŋol loedoliorit: Emoete da aijar naka loitenara. [1]

¹¹Ebukuni ebaŋ akenyunyura kere: Konye etiki lokacoa isiyamikini.

¹²Arai epupi ekayaiton nukaiŋalanut, Eraunos ikekejaanakinak kere lueroko.

¹³ Iriamanakinos lokican ka lokamwaŋan Itacauni EJAKAIT akecekonye kere.

¹⁴ Ekabaka loetubokini lukican kamunonut, Iticasio ekeicoloŋ loka ajakanut apaarasia kere.

¹⁵Ebela ka aitoronio eyaŋaunete acoa: Konye ikoku yenijalijalakinoi isurumi totoke ileic.

¹⁶ Arai kiyatakinos lukaronok, iyatanakinos aibucareta da: Konye esesenete ikadolitok aibirorikec.

¹⁷ Kituuto ikonikoku, kiinakin aiyeŋun, Eebo, isiyalamikin aijarakon.

¹⁸ Neemamear aitapoet, ecakarete ituŋa aitikokinio: Konye isirereŋitoi loericit ikisila.

¹⁹Mam ebulesit ituutoor kakiro bon: Naarai karaida kejeni, mam ibwaikinit etau.

²⁰Iany kereka ijo etuŋanan loisunyit akekiro? Epedorio amunokin ebaŋ aitelekarit ŋes.

²¹Ŋol loitani ekebulesit kaisijemikinit ameuni keiditeuke, Kokau edumuni araut okokuke.

²²Etuŋanan lokanyunyura isidiki aŋolopa, Ipuakaros da aibucanareta nuka etuŋanan loisiopana.

²³ Itisili etuŋanan aomiarake: Konye loejaas ketau loitasono edumuni aibuses.

²⁴ Ŋol loimorikikinos kekokolan elai aijarake elopet, Epupuni aiyapoikinio komamunos bobo nuinera.

²⁵ Aiyoŋ ituŋa eyaŋauni eic, Konye loemunokina EJAKAIT ejaas kainapakin.

²⁶Emoete luipu asianut naka ekayaiton: Konye atubokinio naka etuŋanan ebuni kama ejai EJAKAIT.

²⁷Etuŋanan lomam edolit erai loketale neejaas lukadolitok: ŋol da loitenara korot erai loketale neejaas lukaronok.