Read Ebaibuli 1961 Awaragasia 30 Bible Online

Awaragasia 30 - Ebaibuli 1961 bible

Awaragasia 30

¹Akiro nuka Agur okoku loka Yake; abwokon. Elimokini etuŋanan Itiel, Itiel ka Ukal ebe.

² Abeit arai kwape etiaŋ aitelekarit ituŋa kere, Ido amamei kaijen naka etuŋanan.

³Mam esisiat acoa, Amamei da aijen naka Lokalaunan.

⁴ Iŋai bo abu kodoka toma akuj kodoku da? Iŋai bo abu kotukonok ikwamin kakanike? Iŋai bo abu koen akipi konapeneke? Iŋai bo abu kiticat isaŋeta kere luka akwap? Iŋai ekekiror, iŋai da ekiror loka okokuke, arai ijeni?

⁵ Igimorio ŋinikirot naka Edeke: Erai ŋesi ebuku neejaas ŋul luemunokina ŋes.

⁶ Siriyatanakini akekiro, Kinyek ŋesi aitoron jo, kosodi jo araun lokeŋalan.

⁷Elipit jo akiro aarei: Sirikiimik eoŋ eriŋa etwana:

⁸ Kolema nukamameak ka nukaiŋal kisukunya kaneejai: Sirikiinak ican karaida abar; Kitanyamai inyamat lukebusakinito:

⁹ Kenyek aimonikin, kaŋer jo, kabala ebe, “Iŋai bo EJAKAIT?” Arai bo kenyek araut lokican, kasodi akoko, Keiner erono ekiror loka Ekadeke.

¹⁰Sirikisabanak ebulesit kaneejai ejakaitike, Kinyek aiken jo, jo da igwauni akirot.

¹¹Ejaas ituŋa luikenete lukapapakec, Lumam ilipanakinete nukatotokec arereŋ.

¹² Ejaas ituŋa lueomitos bonik araut luesegara, Kwabo mam iloŋara amodokokokec.

¹³Ejaas ituŋa, eomiara ca ma akecekonyen! Ibekereras da akecebukio!

¹⁴ Ejaas ituŋa luesubito ikelakec bala ikileŋa, Itirikadakec da bala ikileŋa, Luenyamete lukican adaun kakwap, Ka luilwaritos da kotuŋa.

¹⁵Ejaas ediket apesur aarei, Nuikeseunete ebe, “Ae, ae.” Ejaas da iboro iuni lumam imonikinos apaarasia kere, Eebo, iwoŋon lumam cut ebalas ebe, “Kinye kwaŋin.”

¹⁶ Okatwak; ka akoik narakan; Ka akwap namam imonikin akipi, Ka akim da namam cut ebala ebe, “Kinye kwaŋin.”

¹⁷ Akoŋu naisekeli papake, Naemeni arimar totoke; Egorunete ikuruka luka aditot, Enyamete da idwe luka atarukon.

¹⁸Ejaas akiro auni nukaumokin nukekarunitos eoŋ, Eebo, aoŋon numam ajeni:

¹⁹Erot loka emorukaalet kotoma apak; Erot loka emun kotoma atiiba; Erot loka ataker kotoma aŋolol: Erot da loka etuŋanan kapese.

²⁰Ikoni nen erot loka aberu naadote; Enyami, kosodi aimwat akeituk, Ebala ebe, “Mam aronis naeswamat.”

²¹Emarani akwap kanuka akiro auni, Eebo, aoŋon, numam epedori atitiŋikin.

²² Ebulesit keraun ekabaka, Ebaŋ kimonikin inyamat;

²³Aberu naelaitai kedukokin; Ka abulesit da nairumi aibois naka tataake.

²⁴Ejaas iboro iwoŋon luedisiak kakwap, Konye ejaas kacoa naepol noi.

²⁵ Imukunyo kes ituŋa luemamei agogoŋ, Konye idiasete ikecenyamat kiporo;

²⁶ Ipooi kes ituŋa luekalanyaka, Konye edukete ikaisikec omor;

²⁷Emaase emamei ekabaka, Konye inosit kirioŋeta.

²⁸Aililiaŋ, itiŋio kakanin, Konye iboie kotogoi luka ikabakan.

²⁹Ejaas iboro iuni luesaara itorete, Eebo, iwoŋon luesaara elosete:

³⁰Eŋatuny, loitelekarit itiaŋ kere kagogoŋ, Kwabo mam ibelokini cut kama kakere.

³¹Ekiŋok loeriim egur; ekoroi da; Ka ekabaka lomam enyoonokinio.

³² Arai iswamat nukabaŋaanut kodakanar bon, Arai iwomoomot nueroko, Kibwaanakin akan aitukukon.

³³Naarai aibuk akile ŋes elomunia akinyet, Aicikakin ekume ŋes elomuniata aokot: Aicikakin da anyunyura ŋes elomunia aŋolopa.