Read Ebaibuli 1961 Awaragasia 4 Bible Online

Awaragasia 4 - Ebaibuli 1961 bible

Awaragasia 4

¹ Ikadwe, kopuputu aituutoor naka papa, Kibwaikis itauon ajenun:

²Naarai kainakini yes aituutoor naejok; Sirikijalakis aisisianakinika.

³ Naarai arai eoŋ okoku mama ejai papaka, Yenanonok, yeniminat kwape iteluna mama ejai totoka.

⁴ Abu ŋol kesisianak eoŋ, katema atiar, “Kikam akakiro kotaukon; Koric aicorakinetaka, kojar:

⁵Kodum acoa, kodum ajenun; Sirikiimurwok, sirikipaa da kakiro nuka aitukuka:

⁶ Sirikijal acoa, kosodi ŋesi aidar jo; Komina ŋes, kosodi ŋesi aricit jo.

⁷ Ageunet naka acoa ŋes nata: kodum acoa: Eebo, kanuidumunit kere, kodum ajenun.

⁸ Kitopoloo ŋes, ŋesi da kitcpoloori jo: Kitubusi ŋesi jo, naitunia ijo ŋes.

⁹Etorokini ŋesi akoukon aboko nakasianut: Kijaikini ŋesi jo aboko nakaibuses.”

¹⁰Ijo okokuka, kiira, kocam da akiroka: Kosodi aibut ikar luipu.

¹¹Kesisianakinit jo erot loka acoa; Keŋarenikinit jo kosokono luka atenit.

¹² Nailosenenoo, mam eridanakinio akejekon; Arai ikeri, mam kiguikini.

¹³Kikam cut aituutoorio; sirikiwosik: Koric ŋes; naarai erai ŋesi aijarakon.

¹⁴Sirikiloma osokot loka ikaronok, Kwabo sirikilot orot loka ituŋa lukaronok.

¹⁵Kinac ŋes, sirikitor nen; Kibelokin kotubor.

¹⁶Naarai mam ejotoete dimikito kiswamata ameŋeranut; Ikolerikito akonye, dimikito kitiguikis ice.

¹⁷Naarai enyamete atap naka aronis, Emasete ajon nuka akaje.

¹⁸ Konye esubit esokot loka ikadolitok bala aica nakaiwalar, Naeyatanakin acaun aitodol apaaran naedoliorit.

¹⁹ Esubit erot loka ikaronok bala amuton: Mam ejenete nuitiguikinete kes.

²⁰Okokuka, kibwaik akakiro otau; Kitoik akonikit nuenera.

²¹Sirienyounete kakonyenekon; Koric kes kokidiŋ otaukon.

²²Naarai eraas aijar mama kaŋul kaluedumunete kes, Aŋaleu da nakawatekec.

²³Kodunyakinite noi aidar ekonitau; Naarai kotomake ŋes elomuniata nuka aijar.

²⁴Kolema kamakon aituk namagul, Kibwaik kama elwana aŋajep naepaanari.

²⁵Kogipas akonyekon, Kiŋarenikinitos abukiokon asesen tenan.

²⁶ Kitetena esokot loka akejekon, Kicasito ikonirotin kere.

²⁷ Sirikipaa akan nakoteten, karaida nakokediany: Kolemu akonikeju karonis.