Read Ebaibuli 1961 Ekalimonokinan 12 Bible Online

Ekalimonokinan 12 - Ebaibuli 1961 bible

Ekalimonokinan 12

¹Kiitunite da Ekonikasuban kapaarasia nuka atumunikon, eroko kepona apaarasia nukaronok, eroko da ikar ikunyuna nainerar atiar, “Mam esiyalamikinit kes”:

²Eroko itudeneoro akoloŋ, ka aica, ka elap ka aacer, karaida kebono idouon kedau akiru aitep:

³ kapaaran naemaranuniata ikedarak etogo, irapanakinos ikagogon ok, inyeinete akeriak da naarai ikidioko kes, naitumutonorere ikereonokinok kadirisan.

⁴ Naegolokinere ikekia korot; naiyapaaror eporoto loka airiare, naenyounio ice kanuka aruo naka akweny, naisiyapaarere apesur kere nukekosiok:

⁵ Eebo, ekuriakaros ŋin yenetopolooritai, ka luitukurianete korot; ituroi ekuŋur, elaŋirior ebeerei da, edaun da emulalu: naarai elosi ituŋanan oreke loka ikar kere, koriariatos ikebworok korotin:

⁶eroko kelacara auno naka epuesa, arai atido naka esabu abwaŋ, arai amot abwaŋ katan, eroko kebila akokoro da katapar;

⁷ koboŋorete apua toma alup kwape kejaatar, kobonori da emoyo mama ejai Edeke lokekorakini.

⁸Inera Ekalimonokinan ebe, Aamameak nuka aamameak, kere eraas aamameak.

⁹Bobo da, naarai kerai Ekalimonokinan lokacoa, kiyatak aisisianakin ituŋa aijen; eebo, koomoomoenenei, komo, kisuduny da awaragasia nuipu.

¹⁰Abu Ekalimonokinan komo adumun akiro nuitoiokitai, ka ŋun da nukiwadikatai kaitenara, kes akiro nukabeit.

¹¹Esubito akiro nuka lukacoa bala iketetin, ido akiro nuka ikapolok luka atukosia bala aseito nuibubutoi kojokan noi, nueinakinio kama ejai ekecokon ediopet.

¹²Bobo da, okokuka, kocam aicorio: emamei esaŋe aiswamaenen iitabon luipu; aisisia da nuipu itapasi akuan.

¹³Na ŋes esaŋe loka akirot; eirar kere: koyoŋitenenei Edeke, koricenenei akeicorakineta; naarai ŋun kes nuibusakinito ituŋanan.

¹⁴ Naarai eyauni Edeke ŋiniswam toma atubokinio, nepepe ka ŋinikirot nakibwaitai, arai naejok arai naerono.