Read Ebaibuli 1961 Ekalimonokinan 2 Bible Online

Ekalimonokinan 2 - Ebaibuli 1961 bible

Ekalimonokinan 2

¹ Abu katema kotauka atiar, “Aso cani, etemi kalakara; aso kiyalamikin.” Ido koany, ŋin da kerai aamamean.

² Abu katema nuka akiena atiar, “Ikerep”: ka nuka alakara da atiar, “Ajokis anyoin?”

³ Abu kamoote kotauka kwape etalakaria akakuan kebino, koriŋa ekatau keteteni eoŋ kacoa, ka epone da loekamunia abaŋaanut, kasodi ajenun nuibusakinito odwe luka ituŋa aswam kokwap kakuj apaarasia kere nuka aijarakec.

⁴ Abu keswama aswamisio nuepolok; abu kaduk itogoi; keraa da imanikoria luka emusabibu;

⁵abu keswama amanat ka ironyia, ido keraa ikito roma lukiponesio kere luka araito.

⁶Abu keswama ataparin nuka akipi, aicocoenenaa amagoro nakipepes ikito:

⁷ abu kagwel ibulesin ka abulesin, kaurikis da ibulesin kotogoka; ido kajaas kabar naepol naka isipanin luka aituk ka luka imerekekin, aitelekarit ŋul kere lukageikinete ko Yerusalem:

⁸ ido abu katukok epuesa ka esabu ka abar naka ŋinikwap naka ikabakan ka naka lukibukui; kadum ikayook ka akayook, ka abusian nuipu noi nuisiyalamikinete odwe luka ituŋa.

⁹ Aso karaun loapol, kadepa noi ŋul kere lukageikinete ko Yerusalem: kojaun akacoa keoŋ.

¹⁰ Nuemielas akakonye kere mam abu kemik kes: mam abu ketikok ekatau aiyalama kere, naarai abu ekatau kiyalama kanuka akaitaaritoi kere; ŋin ŋes kerai akakorakinet kotoma aitaaritoika kere.

¹¹Kasodi asesen aswamisio kere nueswamaete akakanin, ka aitaaritoi naetaaritor eoŋ aswam: ido koany, kere araas aamameak ka ainyam ekwam, amamei da ameda kokwap kakoloŋ.

¹² Kasodi aibelokin aomoom nuka acoa, ka ikerep ka abaŋaanut: naarai ikwaikini ai etuŋanan loetupakini ekabaka? Dimarai ŋun nueswamatai sek.

¹³Kasodi aanyun ebe acoa itelekarit abaŋaanut kajokis, kwape itelekaritor aica amuton.

¹⁴ Ejaas lokacoa akonye roma akouke, konye elosenenei ebaŋ kotoma amuton: kwabo amisiikini ebe edolokini adiopekirot kes kere.

¹⁵Kasodi atemar kotauka ebe, “Kwape edoikinio ebaŋ, ŋes kadoikinio eoŋ da; aso ca ajokis anyoin ajaut kacoa naepol?” Kasodi atemar kotauka ebe, “Ŋun da aamameak.”

¹⁶Naarai emamei aiitunet naka lokacoa apaarasia kere, kwape ka ebaŋ da; naarai kapaarasia nuepote koiŋaren kodaunitos sek aimurwokinio. Etwani cama lokacoa kwape ebanl

¹⁷Kwaŋin abukala aijar; naarai aswam naiswama kokwap kakoloŋ ketakadikinit: naarai kere eraas aamameak ka ainyam ekwam.

¹⁸ Abu kala aitaaritoika kere naetaaritor kokwap kakoloŋ; naarai kebusakinit ainyeinia etuŋanan lokatupakini.

¹⁹ Iŋai ma ejeni arai eraun lokacoa arai ebaŋ? Konye irumi ŋesi aitaaritoika kere naetaaritor, naeswamat kacoa kokwap kakoloŋ. Ŋun da aamameak.

²⁰Kanuka ŋun kebelok aisiiurunun etauka kanuka aitaaritoi kere naetaaritor kokwap kakoloŋ.

²¹Naarai ejaun etuŋanan loetaaritoi kacoa ka aijen ka apirianut da; konye inyekinia etuŋanan lomam etaaritoi araut akekorakinet. Ŋun da eraas aamameak ka aronis naepol.

²² Naarai anyoika nuedumuni etuŋanan kaitaaritoike kere, naetaaritor kokwap kakoloŋ?

²³ Naarai akepaarasia kere eraas ican, aitaaritoike da ŋes akadakin: eebo, kuare da mam eketau iyeŋuni. Ŋun da aamameak.

²⁴ Emamei ibore yenitelekarit ajokis korunanan alemar ainyam ka aimat, ka alelakinit aitaaritoike. Abu kaany ŋun da, ebe epote kakan naka Edeke.

²⁵Naarai iŋai bo epedori ainyam, iŋai da epedori aiyalama adepar eoŋ?

²⁶ Naarai einakini Edeke etuŋanan loisiyalamikinit ŋes acoa, ka aijen, ka aiyalama da: konye einakini ekadiakanaran aitaaritoi, atukonokin ka aidiat, tetere einakini ŋol loisiyalamikinit Edeke. Ŋun da eraas aamameak ka ainyam ekwam.