Read Ebaibuli 1961 Ekalimonokinan 3 Bible Online

Ekalimonokinan 3 - Ebaibuli 1961 bible

Ekalimonokinan 3

¹ Ejai ŋinibore ekaruke, ŋinikirot da naejai kwap kakuj ejai apakike.

² Apak naka aurio, apak da naka atwanare; Apak naka aira, apak da naka airut ŋul lukiraio;

³ Apak naka aiar, apak da naka aitaŋaleun; Apak naka aiket, apak da naka aiduk:

⁴ Apak naka aimony akiyo, apak da naka akiena; Apak naka aibworo, apak da naka ekosio;

⁵Apak naka acakanar amor, apak da naka atukonokin amor; Apak naka aitun, apak da naka ainyein aitun;

⁶Apak naka amoot, apak da naka aitoolior; Apak naka aidar, apak da naka acakar;

⁷ Apak naka aicil, apak da naka aidony; Apak naka aililiŋ, apak da naka einer;

⁸ Apak naka aminanar, apak da naka alaikin; Apak naka aitiji, apak da naka ainapakin.

⁹ Anyoin ameda naedumuni etuŋanan loiswamai kaŋun kere nuetaaritor?

¹⁰ Abu kaany aitaaritoi kere naabu Edeke kijaik odwe luka ituŋa aitaaritor.

¹¹ Abu ŋesi kosub ŋinibore aibecokino kapakike: ido kibwaik akwapisinei otauonokec, konye kopone lomam epedoriata ituŋa aiŋic aswam naeswamai Edeke anyoun kageunet aitodol awasia.

¹²Ajeni ebe emamei ibore yenitelekarit ajokis kama ejaas ituŋa, alemar ailel ka aswam ajokis apaarasia kere nueiariata.

¹³ Ido ŋolituŋanan ainyam ka aimat ka adumun ajokis kaitaaritoike kere, ŋes ainakinet naka Edeke.

¹⁴ Ajeni eoŋ ebe ŋinibore kere yeniswamai Edeke ejaenena ikar kere: emamei ibore kere yenepedori aiyatakinio, karaida ainonoorio: ido eswama Edeke ŋun, tetere eyoŋete ituŋa ŋes.

¹⁵ Nuejaas kwana kejaas apeŋo; ŋun da nuekotosi ajakut apotu kojaas sek: emoot Edeke bobo nukolo ketuboros.

¹⁶ Bobo da kaany kokwap kakoloŋ, aibois naka etube kojau aronis nen; aibois da naka adolit, kojau aronis nen.

¹⁷ Abu katema kotauka ebe, Etubokini Edeke ikadolitok ka ikaronok; naarai itemokinit apak naka ŋinikirot ka ŋiniswam.

¹⁸Abu katema kotauka ebe, Akiro nuka odwe luka ituŋa igimori Edeke kes tetere eanyunete ebe esubito bala Itiaŋ.

¹⁹ Naarai nuedoikinete odwe luka ituŋa edoikinete otiaŋ da; edoikini kes adiopekirot: kwape etwania ediopet etwani ece kwaŋin; eebo, kere ejaas keiyeŋane ediopet; mam ituŋanan itelekarit itiaŋ; naarai kere eraas aamameak.

²⁰ Elosete kere aibois adiopet; elomunete kere kapua, eboŋorete bobo kere apua.

²¹Iŋai bo ejeni emoyo loka ituŋanan arai elosi kuju, emoyo da loka itiaŋ arai elosi kwap toma alup?

²² Ŋes kaanyunia ebe emamei ibore yenitelekarit ajokis kilema ituŋanan alelakinit aswamuke; naarai ŋin ŋes akekorakinet: naarai iŋai epedori ainyakun ŋes aanyun nuetupanakinete ŋes?