Read Ebaibuli 1961 Ekalimonokinan 7 Bible Online

Ekalimonokinan 7 - Ebaibuli 1961 bible

Ekalimonokinan 7

¹ Ekiror loejok itelekarit akinyet naka akais nuipu; Apaaran da nakatwanare itelekarit apaaran nakaurio.

² Ejok alosit togo loka aibworo Itia alosit togo loka epucit: Naarai nen ŋes esaŋe loka ituŋa kere; Ibwaikini lokajaran ŋun otauke.

³ Aiturur itelekarit akiena: Naarai akadakinit naka akonye ŋes ejokuunia etau.

⁴Etau loka lukacoa ejai togo loka aibworo: Konye etau loka ibaŋiok ejai togo loka ikososio.

⁵Ejok akiirar aitoronio naka lokacoa Itia akiirar ekosio loka ibaŋiok.

⁶Kwape edeedeatar ikukwa kokwap kamot, Ikoni nen akiena naka ibaŋiok: Ŋun da aamameak.

⁷ Abeit amwaŋit itaraun lokacoa ebaŋ; Ainakinet da emunauni aijen.

⁸ Esaŋe loka akirot itelekarit ageuneteke kajokis: Loejai emoyo Ioinirikinit itelekarit loejai emoyo loeomiara.

⁹ Sirikisunyak anyunyurikin komoyokon: Naarai iboie anyunyura katorob naka ibaŋiok.

¹⁰Sirikiner ebe, “Akirot anyoin itelekaritotor apaarasia nukolosek nuka kwana?” Naarai mam iŋisi ŋun kacoa.

¹¹Ejok acoa nepepe kairumet: Eebo, ejok aitelekarit neejaas ŋul lueanyunete akoloŋ.

¹²Naarai igalikinit acoa kwape igalikinitor epuesa da: Konye ajokis naka aijen ŋes na ebe idari acoa aijar naka ŋul kaluejaas kaŋes.

¹³ Koomoom aswam naka Edeke: Naarai iŋai epedori aiteten ŋun nuasubunit ŋesi imagululos?

¹⁴Kolakara kapaaran naka aikemer, koomoom da kapaaran naka ican: asubunit Edeke adiopet kwape kanace, tetere mam etuŋanan enicuni nuetupanakinete ŋes.

¹⁵ Abu kaany nu kere kapaarasia nuka aijaraka naatai: ejai etuŋanan lokadoliton loeoliori kadoliteke, ejai da etuŋanan lokaronon loiyatakini aibut toma aronisike.

¹⁶ Sirikilitokin kadolitekon: karaida alitokin kacoa: kanukinyo tikimudiaror bon?

¹⁷ Sirikilitokin karonis, karaida araut ebaŋ: kanukinyo tikitwania eriŋa edoluno apakikon?

¹⁸Ejok koric ŋun; eebo kakwa da mam ijalakini kakanikon: naarai loeyoŋit Edeke ebeluni kakes kere.

¹⁹Erai acoa agogoŋ neejai lokacoa aitelekarit ikayaitok itomon luejaas toma ore.

²⁰ Abeit emamei etuŋanan ekadoliton kakwap loiswamai nuejok, komam ediakari.

²¹Sirikibwaik etau akiro kere nuinerai; kinye akiirar ebulesitikon kikeni:

²²naarai irwan ipu ejeni ekonitau da ebe ikeni ijo da luce kwape kwaŋin.

²³Ŋun kere abu ketem kacoa; kener atiar, “Araun lokacoan; konye kalwanik.

²⁴ Nuejaas da, elwaka, ido idulok noi; iŋai bo epedori aŋicun?

²⁵Abu kebelokin, ketininik ekatau ajenun, ka aŋicun, ka amoot acoa ka apolou naka akiro, ajenun da ebe aronis ŋes abaŋasnut, ka abaŋaanut da kes ikerep.

²⁶Abu kadum da akirot naitelekarit atwanare kadwaris, ŋes aberu naerai etauke iica ka iboyan, akekanin da bala irikoi: ekui ŋolloisiyalamikinit Edeke kamakeŋ; konye ikamuni ŋesi ekadiakanaran.

²⁷Koany, ebala Ekalimonokinan ebe, Abu kadum na, kwape etiiriania akirot kakirot adumunia apolou:

²⁸naerina emoot ekatau, konye mam adumunit: abu kadum ediopetuŋanan kotoma olukumit; konye mam abu kadum aberu kotoma kaŋul kere.

²⁹ Koany, abu kadum na bon ebe, kosub Edeke ituŋa itenara; konye apotu kesi komoata lupwakununa luipu.”