Read Ebaibuli 1961 Ekosio 5 Bible Online

Ekosio 5 - Ebaibuli 1961 bible

Ekosio 5

¹ Alomuni eoŋ omanikorika, inacika, ateranika: Adeni eminaka ka lueuru ma; Anyami akapeka nuka ao kesikeka; Amasi ebinoka kakileka, Konyama yesi, ipaperoka; Komata, eebo, komata noi, luminanaka.

² Abu kajotor, konye abu ekatau kokwenyi: Ŋes eporoto loka lominataka loikuŋikuŋi, kobala ebe, “Koŋ aarai, inacika, ateranika, ajeleka, aliogotoka; Naarai epalal akakou akopyo, Itimaka da kaiseta nuka akuare.”

³Alae inapeneka; anapi bobo biai? Elot akakeje; epwoki bobo biai?

⁴Kibwaik lominataka akekan kapedot naka ekek, Kikilakin ekatau.

⁵Kasodi anyoun anaikin lominataka; Koitata akakanin emina, Ikabokor kemina loepalal, Kakodeta nuka ekirigi.

⁶ Kanaiki lominataka; Konye kebu lominataka kibelokin, keeka. Abu ekatau kodusaun naenerar ŋesi: Abu kamoote ŋes, konye mam abu kadum; Keworo ŋes, konye mam abu kaboŋok.

⁷ Apotu ikedarak luirimirimete toma ore kadumut, Kenomonomata, kemusunata da; Apotu ikedarak luka arwatatin kademasi elouka.

⁸Kesiyapoi yes, wu apesur nuka Yerusalem, arai kidumut lominataka, Kolimokis ŋes ebe ketedek amin.

⁹Itelekari lominatakon biai lominat ece, Wu jo naitelekarit aŋor kere katemelel? Itelekari lominatakon biai lominat ece, Tape isiyapoikini sio kwaŋin?

¹⁰Ekwaŋ lominataka, ereŋ da, Lokapolon kotoma ilukumin itomon.

¹¹Esubit akekou bala esabu loejok noi, Epopiras itimake, irioko kwape kelibi.

¹² Esubit akekonye bala ajele kariri kaguuruto nuka akipi; Nuilositai kakile, ibwaikinitai kotenan.

¹³Esubito iitinyoke bala amanat nuka lueum ma, bala itutio luka ikui lueum ma: Esubit akeituk apecelun, nueisete emina.

¹⁴Esubito akekanin bala igilun luka esabu luibwaikinitai aberulo: Esubit akekuan bala ikel luka etom lueminaikina asapiro.

¹⁵Esubito akejeke bala ipirino luka amor nukijesesio luegelegela, Luesipokinio aigaŋ eta nuka esabu loejok: Esubit asimake bala Lebanon, ejok noi kwape iresia.

¹⁶ Ejijim noi akeituk: eebo, ejok ŋesi noi cut. Ŋol ŋes lominataka, ŋol ŋes oupaka; Wu yes apesur nuka Yerusalem.