Read Ebaibuli 1961 Ekosio 8 Bible Online

Ekosio 8 - Ebaibuli 1961 bible

Ekosio 8

¹Arai korai ijo onaceka, Lokenaki ikisina luka totoka! Nakaanyunia kokiŋa, tikanu; Eebo, komameun lokameni.

² Tikenarenikini jo aitolomar togo loka totoka, Nakesisianakini; Tiketamat jo ebino loinyalakinitai lueuru ma, Kakipi nuka akamamaganaka.

³ Kojai akekan nakokediany akouka, Katunite akekan nakoteten.

⁴Kesiyapoi yes, wu apesur nuka Yerusalem, Kinyeis aisidik arai aitwekenyun amin, Aitodol neakotokinor.

⁵ Iŋai bo na naebuni kamodiŋ, Egoŋakina kalominatake? Ketwekeny jo kokwap kelamai: Kanekeriebar totokon kiuriei, Kanekeriebar ŋin nakiuriei jo.

⁶ Kibwaikinai eoŋ otaukon kwape amacaret, Kwape amacaret kakanikon: Naarai egogoŋ amin kwape atwanare; Eninik ekokote kwape okatwak: Aimiliaununetake esubito bala aimiliaununeta nuka akim, Aipelonoreta cut nuka EJAKAIT.

⁷ Mam epedorete akipi nuipu airuden amin, Karaida akalele ai tulumor ŋes: Arai iyuuni etuŋanan ainakin iboro kere lukokaleke itia amin, Tiemwanitai cut.

⁸ Kija sio kainacikosi nadidi, Emameete ŋes ikisin: Kikwaikini ai inacikosi Kapaaran naisinerere?

⁹ Arai erai ŋesi arwatat, Kidukokini ŋes etogo loka epuesa: Arai erai ekirigi, Kigolokini ŋes katiketa nuka iresia.

¹⁰ Arai eoŋ arwatat, ikisinaka da esubito bala itogoike: Kasodi ajaut kakonyeneke bala yenikainapakin.

¹¹ Ejai Solomon emanikor loka emusabibu ko Baal-kamon; Kititiŋik ikakoriok emanikor ŋol loka emusabibu; Koyaununut ŋinituŋ anaŋ atutubeta alukumit nuka epuesa itia araitoke.

¹²Emanikorika loka emusabibu loerai lokaŋ, ejai kakonyeneka: Ijo, wu Solomon, ijaun kalukumit, Ka ŋul da luidarete araitoke akwat aarei.

¹³ Ijo naiboie komanikoria, Iirarete aupasiakon ekoniporota, Kisiirarai eoŋ da.

¹⁴ Kiwony, lominataka, Koputokin kamori arai amiam nadidi, Koroŋan lueuru ma.