Read Ebaibuli 1961 Isaia 10 Bible Online

Isaia 10 - Ebaibuli 1961 bible

Isaia 10

¹Itukwi ŋul luisilakinete ikisila lumam edolito, Ka ikewadikak luiwadikaete nuka aitapaar:

²Luireŋearete lukican kotube, Luedemarete luebeito lukican lukotuŋaka, Eraunos apuserun nuŋatunakec, Ikokiok da lumejaunakec!

³ Ikwaikinete ai kapaaran naka aiticanio, Kamudiar da naebuni kama elwana? Ikerete da neejai iŋai ayuunio? Ai bo da inyeiniata akusibar?

⁴Isudedeete kwap kienan, Ebirokinos kwap kalukearitai. Karaida kiswamata ŋun kere, mam ca ejoniarit akenyunyura, Konye eriŋa akekan erioro.

⁵ Ijo ba Eyasuriat, esuretait loka anyunyuraka, Ebela loka aisiopoka!

⁶Ejukakini ŋes asurokin ateker naitisilo, Ecorakini ŋes asurokin ituŋa luka akanyunyura, Aiŋat luŋatuna, ameja da lumejauna, Aipudapuda kes kwape erit loka irotin.

⁷ Konye mam elosikinit aswam kwaŋin, Eketau da mam eomit kwaŋin; Konye ejai amudiar otauke, Agelar da atekerin kwabo mere nuikidioko.

⁸ Naarai ebala ebe, “Mam kereka eraas ikapolokoka kere ikabakan?

⁹ Kalino mam kereka eputosi ka Karakemis? Kamat da mam eputosi ka Arapak? Samaria da mam eputosi ka Damasiko?

¹⁰Kwape adolio akakan ajakanuto nuka aputosia, Nuejaas kaputosia nuegerer nuitelekarito ŋun nuejaas Yerusalem ka Samaria;

¹¹Kwape keswamakinia Samaria ka aputosiake, Mam kereka eswamakini Yerusalem kwaŋin ka aputosiake?”

¹²Kosodi kanen naedaunia rwaru EJAKAIT akeswam kere komoru Sion ka Yerusalem, eticani araito nuka etau loegogoŋ loka ekabaka loka Asuria, ka aiwoŋonut naka akonyeke nueomiara.

¹³ Naarai atema atiar, “Eswama kagogoŋ naka akakan, ka akacoa da; Naarai arai loaeobe: Kebelok iikorun luka atekerin, Kaŋat abarakec, Abu kalem kwape emaswa ŋul luiboiete koicoloŋo.

¹⁴Adum akakan abar naka atekerin kwape kakais; Ido kwape ituŋanan yenetukonokini abei nuejalitai, Atukokinit eoŋ kwape kwaŋin akwap kere: Emamei yenikibwakibwaki abebenok, Karaida yenikeooni aituk, karaida yenikididia.”

¹⁵ Edakakini kereka aep aluikin ŋol loejepia? Itopoloor kereka emusemen aluikin ŋol loirii ŋes? Kwape ti eriaria ebela ŋul luikiarete ŋes, Arai kwape ti etonyounia asuretait ŋin yenimam erai akitoi!

¹⁶Kanuka ŋun ŋes ijukunia EJAKAIT, EJAKAIT loka ajoresio, Adokoror mama ejaas ituŋake luketumito; Ido inokokinio aitisisiet kwap kaibusesuke Kwape aitisisiet naka akim.

¹⁷Aica naka Isirael eraun akim, Lokalaunanike da eraun aipeloret naka akim; Icwei isidopori da ikukwake Ka ikodokodoke kapaaran adiopet.

¹⁸Emudiari aibuses naka amagoroke, ka naka imanikoriake luideneriaete, Aijar ka akuan da; Ejaun kwape edokororaror lokadekan.

¹⁹Ikidiokoros luedeunos luka ikito luka amagoroke, Epedori ikoku aiwadik kes.

²⁰Kosodi kanen kapaaran kaŋin, mam bobo aatoŋot naka Isirael, ka ŋul da luideunos luka ekek loka Yakob egoŋakinos kaŋol kaloedanyi kes; konye egoŋakinos ka EJAKAIT, Lokalaunan loka Isirael, kabeit.

²¹Eboŋuni aatoŋot, aatoŋot naka Yakob, neejai Edeke Lokapedor.

²² Naarai karaida kesubito ituŋakon Isirael bala asine naka aŋolol, eboŋuni aatoŋot bon: inerunio amudiar, nailapara kadolit.

²³ Naarai itodoli EJAKAIT, EJAKAIT loka ajoresio, amudiar nainerunio, kokidiŋ kakwap kere.

²⁴Aso inera kwanata EJAKAIT, EJAKAIT loka ajoresio ebe, “Wu yes ikatuŋa luiboiete koSion, sirikikuriakaros Eyasuriat: karaida kiile yes kebela, ikiari esuretaiteke asurokin yes, kwape ejaar epone loko Misiri.

²⁵ Naarai eriŋa esalit apak edit noi, itodolikinio aisiop ka anyunyuraka kamudiariokec.

²⁶Isidiki EJAKAIT loka ajoresio edaaset asurokin ŋes, kwape kearit loka Midian lokejai komoru Oreb: ejaun ekebela da kaŋolol, ikiari kwape ejaar epone loko Misiri.

²⁷ Kosodi kanen kapaaran kaŋin, enyouni abwokonike kokeperikon, ajookotoke komurisiŋikon, emudiario da ajookot kanuka ainyonyoikin akinyet.”

²⁸ Adolu ŋesi Aiat, atubor koMiguron; Kiŋadak abwokonike koMikimas:

²⁹ Atuboros karidat; koperoto Geba: Kitamarana Rama; aker Gibea loka Saul.

³⁰ Kiluluk keporotokon, ijo akoku naka Galim! Kopup ijo Laisa! Koboŋok ŋes, ijo Anatot!

³¹ Aker Madumena; Etukonokinos luiboiete koGebim akerit.

³² Toma apaaran na naka lolo eperi Nob: Iniŋi akekan aluikin emoru loka akoku naka Sion, Eukot loka Yerusalem.

³³Koany, ibesi EJAKAIT loka ajoresio atenuna ketasuro: Ejepario lueojak, itisilio luitopolooro.

³⁴Ejepi kasuat amonieik nuka amagoro, Ibiror Lebanon kanuka lokapedor.