Read Ebaibuli 1961 Isaia 14 Bible Online

Isaia 14 - Ebaibuli 1961 bible

Isaia 14

¹ Naarai itimi EJAKAIT Yakob, eseuni bobo Isirael, ibwaikini kes akwapukec: imorikikini imoit kakes, iketakinos kekek loka Yakob.

²Eyaete da atekerin, kosodete ayaŋaun toma aiboisikec; ejaun ekek loka Isirael kakes kakwap naka EJAKAIT araun ibulesin ka abulesin: ijoreorete kesi ŋul luapotu kijoreosi kes; eyaete ŋul lukeroikinitos kes.

³Kosodi kanen, kapaaran nakisibworaria EJAKAIT jo kaitururukon, ka icanikon, ka aitaaritoi kere nakitaaritere,

⁴ inera awaragan na aluikin ekabaka loka Babulon, itemari atiar: “Adaun ca ma ekaroikiton! Adaun ca ma ere lokesabu!

⁵Abil EJAKAIT ebela loka ikaronok, Ebela lokajakanut loka ikayaitok;

⁶Loadanya ituŋa kanyunyura kaidany natir, Loayaitor atekerin kaisiop, Karoikinit naemamei yenitikokinit.

⁷Ibworarit akwap kere, Ililiŋi: Egeunete ayoore.

⁸ Eebo, iyalamasi iberosin kanukon, Ka iresia luka Lebanon, ebalasi ebe ‘Ameun kaitisiliokon, Emamei lokijepit sio.’

⁹Iriaŋiriaŋa Okatwak kokwap kanukon Airiamakin kajo ibuni: Isidiki lukatwak kanukon, Lukapolok kere luka akwap, Itonyounit koicoloŋokec Ikabakan kere luka atekerin.

¹⁰Kes kere kiboŋokinete jo, Ebalasi ebe, ‘Ikalanyanari ijo da kwape kasio? Iput kwape kasio!

¹¹Ikokororitai aibusesukon kiton Okatwak, Ka aruo naka adigidigiokon; Epesikinitai ikur kwapukon, Iritan da kimukoritere.

¹² Ibirun ca ma kakuj, Ijo Aacer naka Atupuruc, okoku loka Acilakide! Kijeparitai ca ma kiton alup, Ijo loibu kitisil atekerin!’

¹³ Ibu kiner kotaukon ebe, ‘Adokari toma akui, Etopoloori ekaicoloŋ aitelekar aacer nuka Edeke; Ido eboikini omoru loka einos, Kosaŋe loka ari naka agolitomei:

¹⁴ Adokari kuju adepar amukurur naka idouon; Aputokin ka Je loejai kuju kakuj.’

¹⁵ Konye kikokororio kiton Okatwak, Atutubeta nukokwap nuka aipany.

¹⁶Ŋul lukianyunete jo kinanyanakinete akonye, Kirereete jo, kobalas ebe, ‘Lopelo tope lokitamarani akwap, Lokiianiiani ajakanuto:

¹⁷Lokitarauni akwap amodiŋ, Loketiyakini ireriake; Lomam abu koosik ienanake aboŋor bukec?’

¹⁸Ikabakan kere luka atekerin, kes kere, Ejotooros kaibuses, Ŋolituŋanan kotogoke.

¹⁹Konye jo kicakario kailitikon kwape atenut naelaitai, Konapite lukatwak, luecumucumutai kekileŋ, Luijesaros kiton amor nuka aipany; Kwape kates naicakacakao.

²⁰Mam imorikikini kakes kanukio, Naarai imudiar akonikwap, Iar ikonituŋa, Mam elimorio aur naka ikeswamak nueroko ikar kere.

²¹ Kitemokisi aario naka ikedwe Kanuka numam adolit nuka lukapapakec; Tetere mam enyounete, irumete akwap, Ilelebete ireria akwap kere.”

²² Ebala EJAKAIT loka ajoresio ebe, “Anyoikini eoŋ kes,” ebala EJAKAIT ebe, “Abilari koBabulon ekiror ka aatoŋot, okoku ka okoku loka okoku.”

²³Ebala EJAKAIT loka ajoresio ebe, “Etarauni airumet naka ecoc, ka ataparin nuka akipi: apiari da kigweren luka amudiar,”

²⁴ Eyapoik EJAKAIT loka ajoresio, ebala ebe, “Abeit, kwape aomoomotor, ejaun kwaŋin; Kwape abu kenerunia, etogogoŋi kwaŋin.

²⁵Abilari Eyasuriat kakwapuka, Ecakacakai koroŋanaka: Elemar akeiookot kamakec, Abwokonike da kokeperinikec.”

²⁶Ŋin ŋes ainerun nainerunitai kakwap kere: Ŋin ŋes akan naerioro mama ejaas atekerin kere.

²⁷ Naarai EJAKAIT loka ajoresio ŋes inerunit, Iŋai da itapalauni? Erioro akekan, iŋai da inyakakini?

²⁸ Kokaru loatwania ekabaka Akas kojaun abwokon na ebe:

²⁹ “Sirikiyalamikin, ijo Pilisitia kere, Naarai abila ebela lokiinomi: Naarai kotoma aliasit naka emun elomuni asigirikoloŋ, Aurike da eraun emun loesarani loeporitoi.

³⁰Enyami yenikiyai yenika lokican, Eperi da yenilwaritoi kainapakina: Aari eoŋ aliasitikon kebeli, Eario aatoŋotokon.

³¹Kibwolol, ijo erut, Komony, ijo ere; Kocalar ijo Pilisitia kere; Naarai elomuni apuru kari naka agolitomei, Kwabo emamei yenepaari korionetakec.”

³²Aso eboŋokini biai ikiyakia luka ateker? Ebe, “Abu EJAKAIT kibwaik apetetait naka Sion, Ŋes ekuianarete luereitai luka ikeruna kotomakec.”