Read Ebaibuli 1961 Isaia 19 Bible Online

Isaia 19 - Ebaibuli 1961 bible

Isaia 19

¹ Abwokon naka Misiri. Koany, ibwanenit EJAKAIT edou loetirono, Kodoluni Misiri; Emaranete aputosia nuka Misiri kakonyeneke, Eburuni etau loka Misiri kokidiŋike.

² Esidiki eoŋ Imisirian asurokin Imisirian: Ejiikinos da ŋinituŋanan konaceke, Ejiikinos da ŋinituŋanan kekeidunyet; Ejiikini ere kere, Ajakanut da kajakanut.

³Ikokoorio emoyo loka Misiri kokidiŋike, Etapaluni eoŋ ainerunikec: Emoete neejaas aputosia, ido mama ejaas imurwok, Ka ŋul luejaas ajokina, ka ikacudak da.

⁴Ebala EJAKAIT, EJAKAIT loka ajoresio ebe, Ejaikini eoŋ Imisirian akan naka ejakait loibworit, Koyaite kes ekabaka loededeŋ.

⁵ Eonikinete akip kaŋolol, Idiumumaar ecor eoni de.

⁶ Ewurunete icorin tulutul; Idianaros icileta luka Misiri eokete da; Erinyorete isegei ka aladoi.

⁷Eonikini erony loidunyas ka Nile, Ariri naka Nile, Eokete da kere lueyeiyo kariri naka Nile, Ireŋearitai, emamuunete cut.

⁸Ekuudianete da ikekamak, Ibworos rwaru gul kere luecakanakinete igolun Nile, Ekalanyakaros ŋul luepesete iboyan kakipi.

⁹Ido bobo da irumete ileic ŋul luitwasamaete abirai nuikisitai, Ka ŋul da luewojiete egoe loekwaŋ.

¹⁰Ebilibilunos ipirinoke, Ekadakinete ŋul kere luiswamaete eropit.

¹¹Abagaakata cut ikapolok luka Soan; Ainerun naka ikenerunak lukacoa luka Parao araun bala naka itiag: Ikwaikinete ai itemarete Parao atiar, “Arai eoŋ okoku loka lokacoa, Okoku loka ikabakan lukarioga”?

¹² Alu bo teni ikonituŋa lukacoa? Kolimokis cani kesi jo kwana; Kojenutu kesi nuelosikinit EJAKAIT loka ajoresio koMisiri.

¹³ Aluoros ikapolok luka Soan ibaŋiok, Emoditai ikapolok luka Nop; Apotu ŋul lueraas amoru nuka agoria nuka atekerinike Kitapaasi Misiri.

¹⁴Enyalaki EJAKAIT emoyo loka aijerukanut tomake: Esigetaasi Misiri kaŋiniswam kere, Kwape igetakinor lokameran alekanake.

¹⁵Emameuni da Misiri adioswam kere naepedori akou, arai ekori, Atenut naka amusogot, karaida aladot aswam.

¹⁶ Kapaaran kaya esubi Misiri kwape kaŋor: emarani ekurianari kanuka aiiaŋijaŋ naka akan naka EJAKAIT loka ajoresio, naijagijagakini ŋes.

¹⁷Eluor akwap naka Yuda naketasuro koMisiri, ekurianari ŋinituŋanan yenepupuni nukeg, kanuka alosikinit naka EJAKAIT loka ajoresio, naelosikinit ŋesi asurokin.

¹⁸Kapaaran kaya ejaunos ireria ikany kakwap nako Misiri luineras aŋajep naka Kanaan, luiyapoikinete EJAKAIT loka ajoresio; komaikinai ediopet ebe Ere loka amudiario.

¹⁹ Kapaaran kaya ejaun etem loka EJAKAIT kidig kakwap nako Misiri, ido epiri loka EJAKAIT koikoruke.

²⁰ Eraun ŋesi aanyunet, ido ekajenan mama ejai EJAKAIT loka ajoresio kakwap nako Misiri: naarai emonyakinete EJAKAIT kanuka ikamwagak, iyakikini ŋesi eketajaran, ekegalikinon, eyuuni kes.

²¹ Ejenunio EJAKAIT koMisiri, ejenunete Imisirian EJAKAIT kapaaran kaya; eebo, emaete ŋes kainakin asuban ka ainakineta, iyapoikinete da EJAKAIT aiyaposit, ido itodolete.

²²Inomi EJAKAIT Misiri, kinomite ka aitaŋaleun da; ebogunete mama ejai EJAKAIT, iirari ŋesi ainainakec, itaŋaleuni kes.

²³ Kapaaran kaya ejaun erot lokapolon anyoun koMisiri kiton Asuria, elomari Eyasuriat Misiri, Emisiriat da elomari Asuria; emaete Imisirian nepepe ka Iyasurian.

²⁴Kapaaran kaya iuniikini Isirael Misiri ka Asuria, eraunete arereg kokidig kakwap:

²⁵ naarai abu EJAKAIT kisirereg kes, kobala ebe, “Isireregitoi Misiri ikatuŋa, ka Asuria aswam naka akakanin, ka Isirael da airumeteka.”