Read Ebaibuli 1961 Isaia 2 Bible Online

Isaia 2 - Ebaibuli 1961 bible

Isaia 2

¹Akirot naabu Isaia okoku loka Amos koany kanuka Yuda ka Yerusalem.

² Kosodi kanen kapaarasia nukoiŋaren, Iticasio eroŋat loka etogo loka EJAKAIT kaidi naka iroŋan, Itopoloorio aitelekarit iukon; Eleleete atekerin kere mamake.

³ Elosete ituŋa luipu ebalasi ebe, “Kopotu, kadokasi mama ejai eroŋat loka EJAKAIT, Neejai etogo loka Edeke loka Yakob; Ido kisisianakini ŋesi oni irotinike, Kilosenenei da kosokonoke.” Naarai kotoma Sion ŋes elomuniata ikisila, Akirot da naka EJAKAIT koYerusalem.

⁴ Etubokini ŋesi kotoma atekerin, Ido itoroni ituŋa luipu: Etataete kesi ikileŋakec aituluor imelekes, Ka akwarasikec da aituluor icilikikin lukidimet: Mam ateker ikiari ekileŋ asurokinia aceteker, Kwabo mam bobo isisiaunete ejie.

⁵ Wu jo ekek loka Yakob, Kopotu, kalosenenete kaica naka EJAKAIT.

⁶ Naarai ibu kinyek ituŋakon ekek loka Yakob, Naarai ileleba iponesio luepote kari nakokide, Ido ikadwarak kwape Ipilisitian, Itinanara akanin kidwe luka imo.

⁷Ileleba akwapukec epuesa ka esabu, Kwabo mam akecebar enaŋi; Ileleba akwapukec ibalasin, Kwabo mam agalinikec enaŋete.

⁸Ileleba da akecekwap aputosia; Emaete aswam naka akaninikec, Nakesubete ikecebokoro.

⁹Itukukumio epasoit, Itisilio lokapolon: Aso sirikisioni kes.

¹⁰ Koloma atiiba, koŋop kapua, Kakonyen nuka etasuro loka EJAKAIT, Ka aibuses naka apolouke.

¹¹ Itisilio akonyen nueomiara nuka ituŋanan, Itukukumio da aiwoŋonut naka ituŋa, Itopoloorio EJAKAIT bon kapaaran kaŋin.

¹²Naarai ejaun apaaran naka EJAKAIT loka ajoresio Mama ejaas kere luiwoŋooko ka lueomiara, Ka ŋin kere yenedakara; Ido itisilio.

¹³Mama ejaas iresia kere luka Lebanon, Lueojak luedakara, Ka neejaas iluan kere luka Basan:

¹⁴Mama ejaas iroŋan kere lueojak, Neejaas iukon da kere luedakara:

¹⁵Mama ejai ŋolitogo loeoja, Ka neejai ŋinirwatat naebwaitai;

¹⁶Mama ejaas ameerin kere nuka Tarusis, Ka neejaas aputosia kere nuseuna.

¹⁷Ido itukukumio adakara naka ituŋanan, Itisilio da aomiara naka ituŋa: Itopoloorio EJAKAIT bon kapaaran kaŋin.

¹⁸Eoliorete aputosia cut.

¹⁹ Elomarete ituŋa abuai nuka imorun, Toma apanya da nuka akwap, Anyoun kakonyen nuka etasuro loka EJAKAIT, Ka aibuses da naka apolouke, Naenyounio ŋesi aitamaran akwap kakegogoŋ.

²⁰Kapaaran kaŋin ecakakini cut etuŋanan inyukunyukia ka imeniai Aputosiake nuka epuesa, ka aputosiake nuka esabu, Nukiswamaunit aima:

²¹Tetere elosi abuai nuka imorun, Ka acileta nuka atiiba nueiriirete, Anyoun kakonyen nuka etasuro loka EJAKAIT, Ka aibuses da naka apolouke, Naenyounio aitamaran akwap kakegogoŋ.

²² Kinyeis ituŋanan, yenejai eiyeŋane okumesike: Naarai ejautene enyoin ejaatar ŋesi?