Read Ebaibuli 1961 Isaia 21 Bible Online

Isaia 21 - Ebaibuli 1961 bible

Isaia 21

¹ Abwokon naka amodiŋ naka aŋolol. Kwape ekutaror itapipirion kari naka Eŋalakimak, Elomuni kamodiŋ kakwap nasogim.

² Kalimokin eoŋ aitapoet naetiono; Ekamodan emodomodoi, ekaŋatan da eŋasi. Kodoka, ijo Elam; kirigau, ijo Media; Esililini eoŋ eidinyike kere.

³Kanuka ŋun ileleba aŋabeteka ariebo, Kekamut aayoi kwape aayoi nuka aberu naidouni: Ketipipilata komam apedori akiirar; Kaburunit komam apedori aanyun.

⁴ Iyeniyeŋa ekatau, ketukurianata nusogim; Elocokin akamukat naabu kemiela araun amaran kama ajai.

⁵ Itemonokinete kesi emesa, epesete imukekan, Enyamete, emasete da. Konyoutu, yes ikapolok, Kinyonyoata ebuku akinyet.

⁶Naarai kabala EJAKAIT eoŋ kwanata ebe, “Kolot, kibwaik ekedaran; Kolimo ŋesi nueanyuni:

⁷Naeanyunia ŋesi erioŋet loka ikebwanenok luelosete iareiarei, Erioŋet loka asigiria, erioŋet loka akaalai, Kodunyak ŋesi noi aipup.”

⁸ Kikuna kwape eŋatuny ebe, “Wu EJAKAIT, abwoenenei tiritir kokuju kaiteis paaran, Kebwaanakinio kaiboisika akuaresia kere.

⁹ Ido koany, ebunit erioŋet leka ituŋa, Ikebwanenok luelosete iareiarei.” Koboŋok kobala ebe, “Ebiror Babulon, ebiror; Abilibilunos aputosia kere nuegerer nuka idekesioke kiton akwap.”

¹⁰ Wu jo, naieomomoka, ido alosika naepietet: Abu kalimok jo nuabu keira kama ejai EJAKAIT loka ajoresio, Edeke loka Isirael.

¹¹ Abwokon naka Duma. Ejai yenikeworoi eoŋ koSeir ebe, “Ekedaran, anyoika nuka akuar? Ekedaran, anyoika nuka akuar?”

¹²Koboŋok ekedaran ebe, “Ebunit apaaran, ido akuare da; Arai ikotosi aiŋitun, kiŋita: Koboŋutu bobo.”

¹³ Abwokon naka Arabia. Iperete yesi ais naka Arabia, Yes luidiaete luka Idedanin.

¹⁴ Koinasi akipi ŋin yenajakit akure: Apotu lueboiete kakwap naka Tema kisiriamasi luakerete Ka aijaikin da kes ikecenyamat.

¹⁵Naarai kekerete kesi kokilena, Kokilena lueutunitoi, akabwai nuikesitai, Kanuka awuruun naka ejie.

¹⁶ Naarai kabala EJAKAIT eoŋ kwanata ebe, “Eriŋa ekaru ketuboro, kwape ejaatar ikar luka ekeswaman eropit, eoliori aibuses kere naka Kedar:

¹⁷ ikidiokoros luideunos da kotiai loka ikeketak akabwai, ituŋa lukirigin luka idwe luka Kedar: naarai ener EJAKAIT, Edeke loka Isirael.”