Read Ebaibuli 1961 Isaia 22 Bible Online

Isaia 22 - Ebaibuli 1961 bible

Isaia 22

¹Abwokon naka aditot naka aitapoet. Anyoika bo ŋun, idokar ijo cut Oswion luka itogoi?

²Wu jo loileleba eibwoŋ, Ere lokecelet, ere lokeicur; Mam luaaranakon eario kekileŋ, Kwabo mam etwakito koile.

³Akerata ikayaitokokon nepepe, Apotu ikeketak akabwai koenata kes: Kere lukedumakinio mamakon aponi koenai nepepe, Apeata neelwana.

⁴Kanuka ŋun katema atiar, “Sirikiteete eoŋ, kamony noi akiyo; Siritaaritos aipudun eoŋ, Naarai eŋataritai akoku naka ikatuŋa.”

⁵ Naarai ebunit apaaran naka aburun, Naka aipudapud, naka abuonokin da, Kama ejai EJAKAIT, EJAKAIT loka ajoresio, Kaditot naka aitapoet: Aitakitak arwatatin, amonyakin iroŋan.

⁶ Arwa Elam akuraru, Ejaas kagalin nuka ituŋa ka ikebwanenok; Apuko Kir ebuku.

⁷Kosodi kanen, ileleba aditonokon nuejok agalin, Kiderakinos ikebwanenok orute.

⁸ Kolaca arapetait naka Yuda. Ibu kosesen kapaaran kaŋin lujiis lukotogo loka amagoro.

⁹ Ipotu koanyutu arorwaitin nukore loka Daudi; ipotu kotukonokis akipi nuka atapar naiiesara.

¹⁰Ipotu kimarata itogoi luka Yerusalem, kotiyatiyata itogoi anwokia arwatat.

¹¹ Ipotu kobokata atapar kidiŋ karwatatin aarei kanuka akipi nuka atapar namoion: konye mam ipotu kosesenata ŋol lokesubi ŋun, karaida aanyun akonyen nuka ŋol kalokolo kiswamai ŋun.

¹²Kapaaran kaya abu EJAKAIT, EJAKAIT loka ajoresio, Konyarau ituŋa aimony, ka aibworo, Ka abareno, ka anapit da ipukoi:

¹³ Ido koany, aiyalama ka ailel, Aiar imoŋin ka aipu imerekekin, Ainyam akiriŋ, ka aimat ebino. “Mere kanyama, kamata da, Naarai kitwaki moi.”

¹⁴ Kikujokin EJAKAIT loka ajoresio akiika, Ebala EJAKAIT, EJAKAIT loka ajoresio ebe, “Abeit mam kilucio yes numam adolit nu Aitodol neitwakiata.”

¹⁵ Inera EJAKAIT, EJAKAIT loka ajoresio kwanata ebe, “Ape, kolot mama ejai ekeŋadan ŋol, ŋes Sebuna, loepolokinit etogo, kiner ebe.

¹⁶Iswamai inyo kane? Iŋai da ijaatar ijo ne, tape ibokit ailit ne? Ibokikinit ailit kuju, aikeikin aibois atiiba!

¹⁷Koany, kirutari EJAKAIT jo kagogoŋ, ijo lokagogoŋ: eebo, kilidi ŋesi jo ba ba.

¹⁸Abeit kiiliili jo ka acakar da kwape emupira akwap naelal; itwanikini ŋina, ŋina da ejaunos agalinikon nukaibuses, ijo ileic luka etogo loka ejakaitikon.

¹⁹Kerenei eoŋ jo kaswamukon, kidemario apoloukon.

²⁰ Kosodi kanen, kapaaran kaya anyarauni eoŋ ekakejaanakinan Eliakim okoku loka Kilikia:

²¹ etanapi eoŋ ŋes ekonikaso, etogogoŋi ŋes karokobakon, ejaikini ayaitekon akanike; eluori ŋesi papa loka luiboiete koYerusalem, loka ekekloka Yuda da.

²² Esirioni eoŋ elacetait loka ekek loka Daudi kokeperike; enaari ŋesi, emameuni da loegoli; egoli ŋesi, emameuni da loeŋaari.

²³ Esikakini ŋes kwape kekweru aibois naicasit; eraun ŋesi eicoloŋ loka aibuses kokek loka papake.

²⁴Ikajakinete kesi kamake aibuses kere naka ekek loka papake, aur ka luetupanakinete, ŋinibore kere yenedit, ameun kaiwokito aitodol akaalakanya.

²⁵Ebala EJAKAIT loka ajoresio ebe, kapaaran kaya, ilokulokun ekweru loisikakinitai aibois naicasit; ejepio, ibiror, emudiario da luebwokit ŋesi; naarai ener EJAKAIT.”