Read Ebaibuli 1961 Isaia 28 Bible Online

Isaia 28 - Ebaibuli 1961 bible

Isaia 28

¹Itukwi aboko naka aiwoŋonut naka ikamerak luka Epuraim, Itukwi da aturot naerinyi naka atemeleleke naka aibuses, Naejai akou naka aditot napusuk naka ŋul kaluepikosi ajon!

² Koany ejai EJAKAIT lokirigi lokagogoŋ; Kwape akiru naka akako, ekwam loemudiari; Kwape ailapanar naka akipi nuepolok nueleleete, Ecakakini kwap kakaje.

³Ipudapudao aboko naka aiwoŋonut Naka ikamerak luka Epuraim kakeje.

⁴Eputokinos aturot naerinyi naka atemeleleke naka aibuses Naejai akou naka aditot napusuk Kwape etini loegei akonore eriŋa aiporo; Nakeanyunia ŋin yeneseseni ŋes, Eriŋa ejai akanike kilikori lue.

⁵Kapaaran kaŋin eraun EJAKAIT loka ajoresio aboko naka aibuses, Amekemeket naetemelel, mama ejaas luideunos luka iketuŋa:

⁶Eraun da emoyo loka etube mama ejai ŋol loiboie kotube, Ido agogoŋ mama ejaas ŋul luitobonorete ejie korute.

⁷ Konye ŋul da iriaŋiriaŋas kanuka ajon, Igetigetas kanuka nuitemerete; Iriaŋiriaŋas esasedoti ka enabi kanuka nuitemerete, Elikosi kes ajon, Kopaasi kanuka nuitemerete; Iriaŋiriaŋa aanyunikec, iguikinete kotube.

⁸Naarai ileleba imesan kere kalekan ka amodokok, Emamei aibois naelai.

⁹ Lukaŋai isisianakini ŋesi? Lukaŋai da itejenikini nupupuno? Ŋul ca luajakaar kakile, Lualemar kokisin?

¹⁰Naarai erai aicorakinet neejai aicorakinet, Aicorakinet neejai aicorakinet; Ekokoro neejai ekokoro, ekokoro neejai ekokoro; Lailo adis, laije da adis.

¹¹ Mam, konye kotuŋa luka aituke numo, Ka luka aŋajep ace, Elimokini EJAKAIT ateker na:

¹² Naabu ŋesi kotema atiar, “Na ŋes aibworar, Kisibworasi yesi ŋin yenepasi; Na ŋes aikwarun”: Konye koŋeroto akiirar.

¹³Kanuka ŋun eraun akirot naka EJAKAIT mama ejaas kesi Aicorakinet neejai aicorakinet, aicorakinet neejai aicorakinet; Ekokoro neejai ekokoro, ekokoro neejai ekokoro; Lailo adis, laije da adis; Tetere elosete, ebiroros kau, Ebilibilio, ipokete, eyaŋaario da.

¹⁴Kanuka ŋun kiirasi akirot naka EJAKAIT yes ikamwanitok, Lueyaito ituŋa lu luejaas Yerusalem!

¹⁵Naarai ipotu kotemasi atiar, “Kipou ketutukoto katwanare, Keboleikisi kOkatwak; Naetuboria edoi loeŋatari, mam kidolokini sio; Naarai kipou ketuluosi aisab neekereanarakosi, Kaŋopata da kotoma aimod.”

¹⁶ Kanuka ŋun inera EJAKAIT Edeke kwanata ebe, “Koany, apesi eoŋ koSion amoru araun apetetait, Amoru naigimoritai, naka akais nuipu naka agor, Naka apetetait naicasit: Yeniyuuni mam erurukiari.

¹⁷Etusubi eoŋ etube ekokoro, Adolit da ebiriji: Epiari akak neekerianara naka aisab, Ilapanaros akipi aŋopis.”

¹⁸Itapalaunio aitutuketekus katwanare, Mam akusiiboleikin ka Okatwak ebwoi; Naetuboria edoi loeŋatari, Kosodete yesi aipudapudao.

¹⁹Apakio kere nuetuboror, kiyaŋaari yes; Naarai etubonori ŋinipaaran, paaran ka kuare: Ejaun etasuro loepol noi ajenun nupupuno.

²⁰Naarai ewuriana eitada etuŋanan arior kotoma; Edidiŋ da eimukos etuŋanan aimukokinor.

²¹ Naarai enyouni EJAKAIT kwape komoru Perasim, Enyunyurikini kwape toma aditot naka Gibeon; Tetere iswamai akeswam, akeswam namoit, Ido aitodol asubunike, asubunike namoit.

²²Aso do siriraas ikamwanirok, Kinyeis aenetakus aitogogoŋio: Naarai abu kapup amudiar nainerunio kama ejai EJAKAIT, EJAKAIT loka ajoresio, kakwap kere.

²³Kitoikis aki, kopuput ekaporoto; Kiirasi, kopuput akakiro.

²⁴Ekorienenei teni ekakorion tiritir tetere eyei? Epukonori ca ido ebwanabwanai tiritir aapoŋor nuka alupoke?

²⁵Kedau ŋesi aiyaiyanakin, Mam kereka iwelari ikumino lukirionok, iyei da ikumino. Irai akima okokoron, Esairi da kaiboisike, Ekusemet da koikoruke?

²⁶Naarai ituutoori Ekedeke ŋes ejok, Isisianakini da.

²⁷Naarai mam ikumine lukirionok icomitai kiboro lueitak, Karaida akokoro naka agali mam ibelibelo kokumino; Konye icomom ikumino lukirionok kadaet, Ikumino da kebela.

²⁸Irieio akima nuka emugati; Naarai mam ieomenenei tiririr: Ido karaida ikokoronori akokoro naka agalike, Mam irici.

²⁹ Epote ŋun da kama ejai EJAKAIT loka ajoresio, Lokaumokin ŋesi kainerun, Itelekarit kere kacoa.