Read Ebaibuli 1961 Isaia 30 Bible Online

Isaia 30 - Ebaibuli 1961 bible

Isaia 30

¹ Ebala EJAKAIT ebe, “Itukwi idwe luiierukaka, Luinerunete konye mere neajai eoŋ; Luimukokinos keimukos, konye mere kekamoyo, Tetere iyatanakinete aronis neejai aronis:

² Luelosete aijesar Misiri, Komam keŋisete kaitukuka; Tetere egogoŋoros kagogoŋ naka Parao, Amunokin etoribe loka Misiri!

³ Kanuka ŋun eraun agogoŋ naka Parao ileicikus, Amunokin etoribe loka Misiri eraun aitirirakus.

⁴Naarai ejaas ikapolokoke Soan, Adolut ikiyakiake Kaŋes.

⁵ Irumete kes kere ileic Kanuka ituŋa lumam epedorete aisimedaun kes, Lumam eraas ainarakinet karaida ameda, Konye ileic, ido amorosit.”

⁶ Abwokon naka itiaŋ luka Eŋalakimak. Kotoma akwap naka ican ka aburun Naeponiata aŋatuny ka eŋatuny, Emusaga ka emun loesarani loeporitoi, Edakete abarakec kokeperin luka asigirian nudidik, Ikeceboro da luka akais nuipu karukia nuka akaalai, Mama ejaas ituŋa lumam isimedaunete kes.

⁷ Naarai iŋarakini Misiri atai, atitai: Ŋes amaikinia ŋes “Rakab naidanyanyai.”

⁸Aso kolot, kiwadikak amoru kakonyenekec, Kigirigir da oitabo, Tetere eraun ekajenan kanuka apaarasia nuepote ikar kere.

⁹ Naarai eraas ituŋa luiierukaka, idwe luesabaka, Idwe luenerito akiirar ekisil loka EJAKAIT.

¹⁰ Luetemarete ikadwarak ebe, “Sirisesenete”; Luetemarete inabin da ebe, “Sirikidwarakis sio akiro nuetenete, Kolimokinai sio akiro nuepataka, Kodwarakinai nukaiŋal:

¹¹ Irwa yesi korot, kopaasi kosokot, Kitamamaut Lokalaunan loka Isirael kakonyenekosi.”

¹²Aso ebala Lokalaunan loka Isirael kwanata ebe, “Naarai imenata akirot na, Imunokinos aimwaŋ ka amagulul, Igonakinos yesi mamakec:

¹³Ŋes ejaunor namam adolit na mamakus, Kwape acilat naekoto aibiror, Eneara kina karwatat naeoj, Itiuni aibirorike ebuni atipet.

¹⁴ Abilunike ikoni kwape ebwanabwaŋaunor amot naka ekajean, Ebwanabwanai komam aitim; Tetere mam edumunos katutubetake Atibolok naeyanaarere akim kokyala, Arai naewokere akipi koico.”

¹⁵ Naarai inera kwanata EJAKAIT Edeke, Lokalaunan loka Isirael, ebe, “Kitajario yes kanuka aboŋunun ka aiyeŋunun; Ejaun akusigogoŋ toma aiyamakina ka aicasit.” Konye yes iŋerito.

¹⁶Konye ipotu kobalas ebe, “Mam, naarai kikeri kabalasin”; Kanuka ŋun ipote akerit: Ebe da, “Kibwaneni luetiroko”; Kanuka ŋun etiroko lukirukioto yes.

¹⁷ Ekeri elukumit kairetakin naka ediopet; Ikerete yesi kairetakin naka ikany: Aitodol naisalakiniata kwape epir kaidi naka eroŋat, Kwape aanyunet koukot.

¹⁸ Kanuka ŋun idareuni EJAKAIT, tetere esianikini yes, Kanuka ŋun da itopolooritai ŋes, tetere kitimi yes. Naarai EJAKAIT ŋes Edeke loka etube; Isirereŋitoi kere luidareunete ŋes.

¹⁹Naarai yes ituŋa lukoSion luiboiete koYerusalem: mam bobo imonyete; abeit esianikini ŋesi yes naepupio aimonyokus; naepupunio, ŋes konyet kibonokinio yes.

²⁰Ido karaida einakini EJAKAIT yes inyamat luka aitaaritoi ka akipi nuka aiticanitoi, konye mam bobo eŋopi Ekusikesisianakinan, konye eanyunete akusikonye Ekusikesisianakinan.

²¹ Epupunete da akoniki akirot kokaukon naebala ebe, “Lo ŋes erot, kitoroto kotoma”; naipaariata kakan nakoteten, ido naipaariata kediany.

²² Imunaasi ailadad naka akusiputosia nuegerer nuka epuesa, ka arapeta nuka esabu nuka aputosiakus nuecalara: icakarete kes kwape ibore yenimam elai; ilimokinete ebe “Irwa!”

²³ Isitepi ŋesi akiru kanuka ikinyomokus, luiweete alup; inyamat da luka eiyas loka alup, iturananas, ipuakaros: kapaaran kaŋin edakas ibarenekus oronyia luepolok.

²⁴Imoŋin da ka asigirian nuekoriete alup enyamete lunyaman luejaas abalaŋ, luepiesitai keritei ka ipukupuket.

²⁵Ejaunos da icorin ka aguuruto nuka akipi toma ŋoliroŋat loeoj, ka ŋoliukot loeoj, kapaaran naka earit loepol, naibirunotor itogoi lueojak.

²⁶ Ido da eraun aica naka elap kwape aica naka akoloŋ, aica da naka akoloŋ iyatakina irwan akanykaarei, kwape aica naka apaarasia akanykaarei, kapaaran naeenia EJAKAIT ariebo naka ituŋake, naitanaleunia amusuŋunukec nukinomonomoo.

²⁷Koany, ebuni ekiror loka EJAKAIT kama elwana, Enoki kanyunyurake, kotoma apuru naepol naitutumai: lleleba akeituk aisiop. Esubit akeŋajep da bala akim naidopori.

²⁸ Esubit eiyeŋaneke bala aleles nailapanar, Naedoli omurisiŋ, Aikeke atekerin kaikekeis naka amudiario: Aibwaikin abokonya nuka ituŋa amunyo naitapaari.

²⁹Ijaunos yesi kekosio kwape loka akuar naka epucit lokalaunan; ailele da nakotau, kwape naelosio ituŋanan kalamaru abunore oroŋat loka EJAKAIT, Atiiba naka Isirael.

³⁰Isiirari da EJAKAIT ekeporoto loka aibuses, itodikini aijesun naka akanike, aisiop naka anyunyuraken, airian naka akim naidopori, ajielelitoi naka akiru, ka ekwam, ka akako da.

³¹Ebilibilio Eyasuriat kanuka eporoto loka EJAKAIT, loinomi kebela.

³²Ŋiniinometait da naka ebela loeseunitai, loinomi EJAKAIT ŋes, ejaun kisiman ka adeudeun: ejiikinos ŋesi ka kes kojiisio luka aiiaŋiian.

³³ Naarai aponi Topet kitemokinitete sek; eebo, etemonokinitoi kanuka ekabaka; etemoki kidul kopol: oupake ejai akim ka akito nuipu; isinepi eiyeŋane loka EJAKAIT ŋes, kwape aleles naka acukuman.