Read Ebaibuli 1961 Isaia 36 Bible Online

Isaia 36 - Ebaibuli 1961 bible

Isaia 36

¹ Kosodi kanen kokaru lokitomonet kaoŋon loka ekabaka Kesekia, kobu Senakerib ekabaka loka Asuria asurokin ireria kere luka Yuda luke bwaitai, kirum.

² Kijuka ekabaka loka Asuria Rabasake anyoun koLakis alosit Yerusalem mama ejai ekabaka Kesekia ajaas kajore naepol. Kobwo kariri kaleles naka atapar nakokuju, korot loka emanikor loka ekelotan igoen.

³Kosodi kolom Eliakim okoku loka Kilikia loapolokinit ekal mama ejai ŋesi, ka Sebuna ekewadikan, ka Yoa okoku loka Asap ekesiitonokinan.

⁴Kotema Rabasake kes atiar, “Kolimokis do Kesekia ebe, ‘Inera ekabaka lokapolon, ekabaka loka Asuria, kwanata ebe, Amuno nanyoin naimuno?

⁵Abala eoŋ ebe, ainerunikon ka agogoŋ ejie eraas akiro nuutai: iŋai bo do imunokina ijo, tape kipaliikin eoŋ?

⁶ Koany, imunokina ijo ebela loka egada lo loiriecakina, ŋes Misiri; arai kegoŋakini ituŋanan mamake, elomari akanike, icumi; ikoni nepenen Parao ekabaka loko Misiri mama ejaas ŋul kere luemunosi ŋes.

⁷ Konye arai kiitema eoŋ atiar, “Kimuno isio EJAKAIT Ekosideke”; mere ŋes ŋol loalemari Kesekia aiboisioke nuiceleleete ka itemwanake, kolimok Yuda ka Yerusalem ebe, “Imaenenete kotem kalo”?

⁸Aso do, keŋaiŋait, koinakis ekajakait ekabaka loka Asuria iboro lukititiŋa, kainakin eoŋ jo da ibalasin ilukumin iarei, arai ipedori ijo kowaikon aibwaikin luibwanenete.

⁹Aso ipedori biai aisibelokin akonyen nuka ekapolon ediopet kotoma ludidik kokejaanakinak luka ejakaitika, komuno Misiri kanuka agalin ka ikebwanenok.

¹⁰Abu kereka eoŋ asurokin aibois na amudiar komamei EJAKAIT? EJAKAIT ŋes kabala ebe, “Kolot kosurok akwap na, komudia.” ’ ”

¹¹Kosodi Eliakim ka Sebuna ka Yoa atemar Rabasake atiar, “Kiŋaiŋait, kiner kikonikejaanakinak kaŋajep nako Suria; naarai kijeni; sirikiner kasio kaŋajep naka Iyudayan, kaki nuka ituŋa luejaas arwatat.”

¹²Konye kotema Rabasake kes atiar, “Keyakuunit ekajakait mama ejai ejakaitikon, ka jo da einer akiro nu? Mam kereka keyakuunit otuŋa luiboiete karwatat, ainyam acinikec, ka aimat akulakec nepepe kayes?”

¹³Kosodi Rabasake aibwo, kiworo keporoto loepol kaŋajep naka Iyudayan, kotema atiar, “Kopupokisi yesi akiro nuka ekabaka lokapolon ekabaka loka Asuria.

¹⁴Inera ekabaka kwanata ebe, ‘Kinyek Kesekia aiŋal yes; naarai mam epedori aitajar yes.

¹⁵Kinyek Kesekia ainakin yes amunokina EJAKAIT ebe, Abeit kitajari EJAKAIT oni, ere lo da mam ijaikinio akan naka ekabaka loka Asuria.’

¹⁶ Sirikipupokis Kesekia: naarai inera ekabaka loka Asuria kwanata ebe, ‘Kinerutu keoŋ nuka ainapakin, kopotu neajai; konyama yesi ŋinituŋanan emusabibuke, ŋinituŋanan nuka etinike, komata yesi ŋinituŋanan akipi nukoicoike;

¹⁷aitodol neabunio kayaŋaa yes akwap naeputosi kanakus, akwap naka akima ka ebino, akwap naka atap ka imanikoria luka emusabibu.’

¹⁸Kocoito kinye Kesekia aijodoor yes ebe, ‘Kitajari EJAKAIT oni.’ Ejai cani edio kodekesio luka atekerin loitajarit akekwap kakan naka ekabaka loka Asuria?

¹⁹ Alu bo idekesio luka Kamat ka Arupad? Alu bo idekesio luka Separabaim? Apotu tope kitajarata Samaria kakanika?

²⁰ Lukaŋai kodekesio kere luka akwapin kaŋun luapotu kitajarata akwapukec kakanika, tetere itajari EJAKAIT Yerusalem kakanika?”

²¹ Konye kililiŋa, mam apotu koboŋokis ŋes akirot: naarai kejai aicorakinet naka ekabaka ebe, “Sirikiboŋokis.”

²² Kosodi Eliakim okoku loka Kilikia, loapolokinit ekal, ka Sebuna ekewadikan, ka Yoa okoku loka Asap ekesiitonokinan kopotu mama ejai Kesekia, ecilicilito inapenekec, kolimokis ŋes akiro nuka Rabasake.