Read Ebaibuli 1961 Isaia 38 Bible Online

Isaia 38 - Ebaibuli 1961 bible

Isaia 38

¹ Kapaarasia kaŋun kodekakin Kesekia nepetai atwanare, Kobu Isaia enabi okoku loka Amos mama ejai, kotema ŋes atiar, “Ebala EJAKAIT kwanata ebe, Kitemonok ekonitogo; naarai itwani, mam ijari.”

²Kosodi Kesekia aibelokin akekonyen arwatat, kilip EJAKAIT,

³ kotema atiar, “Kiitu, wu EJAKAIT, keŋaiŋait, kwape aloseneneo kakonyenekon kabeit, ka etau loeteni, keswama nuejok kakonyenekon.” Komony noi Kesekia akiyo.

⁴Kosodi kobu akirot naka EJAKAIT mama ejai Isaia ebe,

⁵“Kolot, kolimok Kesekia ebe, ‘Inera kwanata EJAKAIT, Edeke loka Daudi papaakon ebe, Eira ailipikon, aany da akonikiyo: koany, eyatakini akonipaarasia ikar itomon ka lukany.

⁶ Ketajari jo ka ere kalo kakan naka ekabaka loka Asuria: egaŋi eoŋ ere lo.’

⁷ “Na ŋes aanyunet mamakon naebuni kama ejai EJAKAIT, ebe iswamai EJAKAIT akirot ŋin naener:

⁸Koany, enyakari eoŋ etolim loejai ailameta, loisukunyarit akoloŋ ailameta nuka Akas aitoboŋor kau ailameta atomon.” Aso koboŋo akoloŋ ailameta atomon kailameta nealomaria ŋesi.

⁹Aiwadik naka Kesekia ekabaka loka Yuda, kedau adekakin kosodi aŋaleun kadekake.

¹⁰ Kabala ebe, Kidiŋ paaran naka apaarasiaka, Alomari eoŋ orutei luka Okatwak: Kemiki nuesalito nuka ikaruka.

¹¹ Kabala ebe, Mam aanyuni EJAKAIT, EJAKAIT, Kakwap naka ikajarak: Mam bobo aseseni ituŋa kotoma luiboiete kakwapin.

¹² Autor akaibois, alemar kamakaŋ kwape ewema loka ekecokon: Anunuk akaijar kwape ekaojion; Katubuni ŋesi eoŋ kousio: Paaran ka kuare da kitanaŋi eoŋ cut.

¹³Amonyi aiŋarakinio aitodol tupuruc; Ebilibilei akakojo kere kwape eŋatuny: Paaran ka kuare da kitanaŋi eoŋ cut.

¹⁴ Kwape iporoidoliat arai ewalu, aŋuŋa eoŋ kwaŋin; Ebworo kwape ajele: Eriokuut akakonye kanuka asesen kuju; Wu EJAKAIT, ketieanitai, koraun ijo ekabwoaranika.

¹⁵ Enera biai? Abu ŋesi kiner keoŋ, Ido eswama ŋun: Alosenenei motimot ikaruka kere, Kanuka ariebo nakotauka.

¹⁶Wu EJAKAIT, ejarete ituŋa kanuka akiro kaŋun, Aijar da naka ekamoyo ejai tomakec cut: Wu okwe kitaŋaleunoi, kitajar eoŋ.

¹⁷Koany, kanuka ainapakinika, ŋes kariebar noi: Konye kaminakon ibu kitajar aijaraka kaipany naka amudiario: Naarai icaka akaronisio kere kaukon.

¹⁸ Naarai mam Okatwak epedori aiturit jo, Mam atwanare epedori aima jo: Luijesaros aipany mam epedorete amunokin akonibeit.

¹⁹ Ekajaran, ekajaran, ŋes kituri jo, Kwape eoŋ lolo: Itejenikini papa idwe akonibeit.

²⁰ Itemokino EJAKAIT aitajar eoŋ: Kanuka ŋun kiyei ikososioka koraman lukaputio Apaarasia kere nuka aijarakos Kotogo loka EJAKAIT.

²¹ Abu Isaia kotema atiar, “Koodutu atap naka etini; kibwaikis abus, eŋaleuni do.”

²²Ido abu Kesekia kotema atiar, “Ani bo aanyunet naitejenuni ebe adokari togo loka EJAKAIT?”