Read Ebaibuli 1961 Isaia 39 Bible Online

Isaia 39 - Ebaibuli 1961 bible

Isaia 39

¹ Kapaarasia kaŋun kijukak Merodak-baladan okoku loka Baladan, ekabaka loka Babulon Kesekia luetiŋito ibaluan ka ainakinet: naarai apupunit ebe abu kodekakin kosodi aŋaleun.

² Kiyalamikin Kesekia kanukec, kitodik kes etogo loka ikeboro luka akais nuipu, epuesa, ka esabu, ka lueuru maa, ka akinyet naka akais nuipu, ka etogo kere loka lujiisike, ido kere luadumuna koboroke luka akais nuipu: amamei ibore kotogoke karaida ayaetake kere, yenimam Kesekia etodikinit kes.

³Kosodi Isaia enabi abunore mama ejai ekabaka Kesekia, kotema ŋes atiar, “Anyoika bo nuabalasi ituŋa lu? Apote kai aponare mamakon?” Kotema Kesekia atiar, “Apote mamakaŋ kakwap naelwana, Babulon.”

⁴Kotema atiar, “Inyo bo aanyut kotogokon?” Koboŋok Kesekia ebe, “Aanyut iboro kere luejaas togoka: emamei ibore koboroka luka akais nuipu yenimam eoŋ etodikinit kes.”

⁵Kosodi Isaia atemar Kesekia atiar, “Kopupok akirot naka EJAKAIT loka ajoresio.

⁶ Koany, eponito apaarasia, eyaŋaario kere luejaas togokon, ka ŋul luapotu lukapapaakon kiŋadata kiton lolo, Babulon: ebala EJAKAIT ebe, emameun ibore yenepianun.

⁷ Eyaŋaarete da lukodwekon lukiwuriei ijo elop: eraunos ibwacin kotogo lokapolon loka ekabaka loka Babulon.”

⁸ Kosodi Kesekia atemar atiar, “Ejok akirot naka EJAKAIT nainera ijo.” Ido korema atiar, “Naarai ejaunos ainapakin ka abeit kapaarasiaka.”