Read Ebaibuli 1961 Isaia 43 Bible Online

Isaia 43 - Ebaibuli 1961 bible

Isaia 43

¹ Konye kwana inera kwanata EJAKAIT loabu kosub jo, wu Yakob, Ŋol Iokilunuluni jo, wu Isirael, ebe: “Sirikikurianar, naarai kalaku jo; Kanyarit jo kokirorikon, irai Lokaŋ.

² Arai itori toma akipi, ajaenena kajo; Toma ocorin, mam kiraparete: Arai itori toma akim, mam kinomori; Mam eiriani akim kama ijai.

³ Naarai eoŋ EJAKAIT Ekonideke, Lokalaunan loka Isirael, eketajaranikon; Ainak Misiri araun lugelisikon, Etiopia da ka Seba kanukon.

⁴ Naarai irai loka akais nuipu kakonyeneka, Lokayonio, kamina jo; Ŋes ainakinia ituŋa kanukon, Atekerin kanuka aijarakon.

⁵ Sirikikurianar; naarai ajai kajo: Ayauni eoŋ aurikon kokide, Kenotuni jo koto:

⁶Alimokini agolitomei ebe; Koosik; Eŋalakimak da ebe, Sirikitikok: Koyau ikadwe lusap kama elwana, Ka lupesur da kosaneloka akwap.

⁷ Ŋinidiopet yenemaikinio ekakiror, Yenabu kasub kanuka aibusesuka; Keluŋuluŋ ŋes; eebo, kasub eoŋ ŋes.”

⁸ Kitolomutu imudukiok luejaas akonye, Ka ikimiŋiok luejaas aki!

⁹Kinotunos atekerin kere, kotukonokinos ituŋa; Iŋai bo idio kakesi epedori alimokin ŋun, Aitodikin oni akiro nusodit? Koyaut kesi ikajenakakec, kitojokai; Kopuputu kesi, kobalas ebe, Abeit ŋin.

¹⁰ Ebala EJAKAIT ebe, “Iraas yesi ikakajenak ka ekakejaanakinan lokaseunit: Tetere kijenete kiyuunete eoŋ, Ŋeŋunete ebe eoŋ Ŋopeŋol; Emamei Edeke lokesubitai ageikin eoŋ, Mam ejaun da lokatupakini.

¹¹Eoŋ, eoŋ obe, arai EJAKAIT; Emamei eketajaran dimarai eoŋ.

¹² Alimo eoŋ, etajar, etodik, Amamei edeke lomoit kamakus.” Ebala EJAKAIT ebe, “Kanuka ŋun iraas yesi ikakajenak, Eoŋ da arai Edeke.

¹³ Eebo, agear lolo, eoŋ ŋopeŋol; Kwabo emamei yenepedori ayuun kakanika: Eswamai eoŋ, iŋai bo itikokini?”

¹⁴Ebala kwanata EJAKAIT, ekusikalakunan, Lokalaunan loka Isirael ebe, “Kanukus ŋes keiukaria Babulon, Esijesari kes kere kwape luekerete, Kes Ikaludean, toma ameerin nuka aiyalamakec.

¹⁵ Arai eoŋ EJAKAIT, lokalaunanikus; Lokasuban loka Isirael, ekabakakus.”

¹⁶ Ebala kwanata EJAKAIT, Loesubi erot toma aŋolol, Esokot da toma akipi nukagogoŋ;

¹⁷ Loitolomuni agali ka ebalasi, ajore ka apedor; Eperete nepepe, mam enyounete; Erikaros, itudeŋio kwape eusi, ebe:

¹⁸“Sirikiitut akiro nusodit, Karaida aomoom akiro nukasonya.

¹⁹ Koany, eswamai eoŋ akirot nakitetet; Elibuni kwape kwana; mam yes ijenunete? Asubi eoŋ erot toma ais, Icorin da toma amodiŋ.

²⁰ Ketopoloorete eoŋ itiaŋ luka ais, ikuwei, ka ikuului; Naarai ainakini akipi kotoma ais, Icorin da kotoma amodiŋ, Aitamasia ituŋaka, luseuŋunaka;

²¹Ituŋa luasubuni eoŋ Tetere elimonorete aiturioka.

²² “Konye mam kiwonet eoŋ, wu Yakob; Ketapasa jo, wu Isirael.

²³Mam kiiŋununei eoŋ ibaren ludidik luka ainakinetakus nuicweio; Mam kirubusikinit eoŋ kasubanakon. Mam kesilanirikinit jo ainanakin eoŋ ainakineta, Karaida aitapas jo kaluisupuruuŋuno.

²⁴ Mam kigwelanakinit eoŋ eitola kapesan, Karaida aisimonikin eoŋ kasiepai nuka asubanakon: Konye ibu ijo kisilanirikinite eoŋ karonisiokon, Kitapas eoŋ kanumam adolitekon.

²⁵ “Eoŋ, eoŋ obe, ŋopeŋol loamwatari adiakanaretakon kanukaŋ; Mam eituni akonironisio.

²⁶Kisiitunoi; kapurokinos: Kopet akonikiro, tetere kitojokio.

²⁷ Kodiaka papaakon losodit, Kopaasi ikejulakakon kamakaŋ.

²⁸ Kanuka ŋun ketisil ikapolok luka aibois nakalaunan, Kejaik Yakob araun ekenit, Ka Isirael da amoromoroo.”