Read Ebaibuli 1961 Isaia 45 Bible Online

Isaia 45 - Ebaibuli 1961 bible

Isaia 45

¹ Ebala kwanata EJAKAIT Iokinyonyoikitonoke akinyet, ŋes Kuro, Loetiŋit eoŋ akekan nakoteten, aitonokok atekerin kakonyeneke, Alacar aŋabes nuka ikabakan; Aŋaar ikekia kakonyeneke, Ido mam irutei egolonokinio:

²Ebe: “Keŋarenikini eoŋ jo, Eiyakini aiboisio nuimugogolito: Abilibilei ikirigin luka aisinit, Atubutubei atiketa nuka asua.

³ Kainakini jo iboro luka akais nuipu luka amuton, Abar da naibwaitai naka aiboisio nukaiyeiyea, Tetere ijenuni ebe Arai eoŋ EJAKAIT, Edeke loka Isirael, lokanyarit jo kekirorikon.

⁴ Kanuka Yakob ekakejaanakinan, ka Isirael loseunaka, Kanyarit jo kekirorikon: Kamaikinit jo ekiror, karaida mam kijenunit eoŋ.

⁵ Arai eoŋ EJAKAIT, emamei ece; Emamei Edeke dimarai eoŋ: Kaenikini arokoba, karaida mam kijenunit eoŋ.

⁶ Tetere ejenunete ageun kalomun naka akoloŋ, Kiton to da, ebe emamei ece dimarai eoŋ: Arai eoŋ EJAKAIT, emamei ece.

⁷ Eoŋ alunuluni aica, asubuni amuton; Ayauni ainapakin, asubuni aronis; Arai eoŋ EJAKAIT, loeswamai ŋun kere.

⁸ “Kotep, ijo akuj, kokuju, Kobukut idouon adolit: Koooŋata da alup, tetere itolomunete aitajario, Isilibunete da adolit; Eoŋ EJAKAIT asubunit ŋun.

⁹ “Itukwi ŋol loepegas ka Lokasubanike! Atibolok kotoma atiboloka nuka akwap! Iŋisi tope elupe ŋol lokiluŋuluŋi ebe, ‘Iswamai inyo?’ Arai aswamukon ebe, ‘Emameete ŋes akanin?’

¹⁰Itukwi ŋol loebala papake ebe, ‘Iwuriei inyo?’ Arai aberu ebe, ‘Irieba awuruun inyo?’ ”

¹¹ Ebala kwanata EJAKAIT, Lokalaunan loka Isirael, ido Lokasubanike ebe, “Kiŋitunai nuka akiro nuepote; Kicorakinai cabo nuka idweka, Ido nuka aswam naka akaninika.

¹² Asubunit eoŋ akwap, Asubunit da etuŋanan kotomake: Eoŋ, akakanin epesikinito akuj, Ecorakinit eoŋ ajoreke kere.”

¹³ Ebala EJAKAIT loka ajoresio ebe: “Etonyounit ŋes kadolit, eteteni ikerotin kere: Eduki ŋesi ekare, Eosikini atai lukaŋ lukirenearitai, Mere kanuka agwelar, karaida aropio.”

¹⁴ Ebala EJAKAIT kwanata ebe, “Aitaaritoi nako Misiri, ka lugwelanara luka Etiopia, Ka Isabean, ituŋa lukaojak, Epote mama ijai, eraunos lukon; Kitupakinete jo; epote kotoma orikoi: Kikukonokinos, kilipete jo ebe, ‘Abeit ejai Edeke mamakon; Emamei ece, emamei Edeke ece.’ ”

¹⁵ Abeit irai ijo Edeke loiŋopi, Wu Edeke loka Isirael, Eketajaran.

¹⁶Irumete kes ileic, eebo, itiriraete, kes kere: Edakaros akwesikec kere luesubete aputosia.

¹⁷ Konye itajari EJAKAIT Isirael kaitajario namam edaun: Mam yes irumenenete ileic, Karaida aitirir ikar lumam edaunos.

¹⁸Naarai ebala kwanata EJAKAIT loasubuni akui; Ŋes Edeke; Lokiluŋuluŋi akwap, kosub: Kiticat, mam asubuni atai, Kilunuluni tetere iboikinoi kotoma, ebe: “Arai eoŋ EJAKAIT; emamei ece.

¹⁹ Mam abu kener kaiyeiyea, Kaibois naka akwap naka amuton; Mam kabala aur naka Yakob ebe, ‘Komoai eoŋ atai’: Eoŋ EJAKAIT enera nukadolit, Alimokini akiro nuetenete.

²⁰ “Kotukonokinos, kopotu; Kikunyutu, yes luikuata luka atekerin: Emamei kes aijen luedakete akitoi naka aputokec naegerer, Ilipete edeke lomam epedori aitajar.

²¹Kolimosi, kikeut; Eebo, kinerutu nepepe. Iŋai bo kitoduunit ŋin ageun kasonya? Iŋai bo kelimokinit apeŋo? Mere Eoŋ EJAKAIT? Emamei ecedeke dimarai eoŋ; Edeke loedolit, ido eketajaran; Emamei ece dimarai eoŋ.

²²“Kosesenai, Kitajarunos, isaŋeta kere luka akwap: Naarai arai eoŋ Edeke, emamei ece.

²³ Eyapoik kanukaŋ, Alomu akirot kaitukuka kadolit, Ido mam eboŋuni, ebe, ‘Kakukonokin ŋinikuŋ eoŋ, Keyapoikini ŋiniŋajep.’

²⁴Ejauni yenikabala ebe, Ejai adolit ka agogoŋ toma EJAKAIT bon: Epote ituŋa mamakeŋ, irumete ileic Ŋul kere luenyunyurikineteŋes.

²⁵Itojokio aur kere naka Isirael toma EJAKAIT, Ituro da.”