Read Ebaibuli 1961 Isaia 5 Bible Online

Isaia 5 - Ebaibuli 1961 bible

Isaia 5

¹ Mere kayeik ekapai ekosio loka epaika, Loka akemana naka emusabibu, Kejai ekapai amana naka emusabibu Komoru lopusuk noi.

² Abu kibokibok, koukono amor, Kiraik emusabibu lokajokan noi teni, Kodukok aiteis kidiŋ, Ido kobokik acues; Komuno ebe erai emusabibu, Konye abu kora emusabibu lokais.

³ Aso ca do yes luiboiete ko Yerusalem, Ka yes da ikiliok luka Yuda, Keŋaiŋaito, kotubokinai eoŋ ka akamana naka emusabibu.

⁴Tikeswamak inyo bobo akamana naka emusabibu Numam eswamat? Naamunor ebe kora emusabibu, Kanukinyo keraia emusabibu lokais?

⁵Aso ca do; ketejenut nueswamakini akamana naka emusabibu; Alemari ekeriga, ido emeorio cut; Elakari cut akebwas, ido ipudapudao cut.

⁶Ajalakini da eduan; Mam idimio karaida aeapeneneo; Konye ebwaŋunete ikodokodo ka ikukwa; Ecorakini da idouon kinyeis atepanakin akiru.

⁷Naarai amana naka emusabibu naka EJAKAIT loka ajoresio Ŋes ekek loka Isirael, Ikiliok da luka Yuda kes akeraetait naisiyalamikinit: Abu komoote etube konye koany areio; Komoote adolit, konye koany aimony!

⁸ Itukwi ŋul luimorikikinete etogo ka etogo, Luitanyanyaete amana ka amana, Aitodol naemamuunor apak, Yes da kisilikinete aiboi bonik kotoma akwap!

⁹Kotoma akiika inera EJAKAIT loka ajoresio atiar, “Abeit itogoi luipu eraunos rwaru amejei, Kiton lukapolok ka lukajokak da, Komamei yeniboie kotoma.

¹⁰ Naarai amanat atomon nuka emusabibu elomuni akaalakany adiopet, Ido ebukit loileleba ikinyom elomuni edita ediopet bon.”

¹¹ Itukwi ŋul luedilonokinete akwenyun tupuruc, Airi nuitemerete; Luimododoete aitodol ebai, Kisibwanarete aionl

¹² Ido adeudeu ka aunene, isiman ka alamaru, Ka ajon da ejaas toma obagaikec; Konye mam eomitos aswam naka EJAKAIT, Kwabo mam ipikakinito etau aswam naka akaninike.

¹³ Tape eŋatario ikatuŋa, kanu aolikinio kes aijen: Koriebi eteŋei isotiakec, Aiak da akur ikecekodeta.

¹⁴Tape italalai Okatwak aiŋobeleke, Aooŋa da akeituk namam itemio; Ido aibusesukec, ka aipuesukec, ka eceletekec, Ka ŋin da yeniyalama kotomakec, Ejorimakinos toma.

¹⁵Itukumio epasoit, itisilio da loekeriana, Isurumio ileic akonye nuka kaluiwonooko.

¹⁶Konye itopolooritai EJAKAIT loka ajoresio kanuka etube, Ido italaunitai Edeke Ekalaunan kanuka adolit.

¹⁷Kosodete edakenenas idwe luka amerekekin bala lem ciaas oronyikec, Ido enyamete rwaru ikejobirak aiboisio nukemutokoros nuka ikatumak.

¹⁸Itukwi ŋul luiriitos numam edolito kaunoi nuka aiŋal, Luiriitos aronis kwape kerikot:

¹⁹ Luineras atiar, “Kisunyite, Kododor akeswam kaanyutu: Ainerun da naka Ekalaunan loka Isirael kikuny, Kodolu, kajenutu!”

²⁰Itukwi ŋul luenyarito aronis ajokis, ka ajokis aronis; Luipikakinete amuton aibois naka aica, Ka aica da aibois naka amuton; Adwaris aibois naka ajijim, Ka ajijim da aibois naka adwaris!

²¹Itukwi ŋul luepiriaka kakonyekec ikulepek, Ido luecobe kotoma asesenekec ikulepek!

²²Itukwi ŋul luejaas agogoŋ aimat aionio, Ido lukajenak ainyal nuitemerete.

²³Luitojokete luegwaunete akiro kanuka aropio, Luedemarete ekadoliton akedolit!

²⁴ Aso kwape ieweia akim ariaŋ, Ido kwape idupokinotor anya nueokito akim, Kwaŋin eraun rwaru esusutukec bala abosis, Ka aturotokec da ituaar kwape kapua: Naarai kenerenenete ikisila luka EJAKAIT loka ajoresio, Ido komenata akirot naka Ekalaunan loka Isirael.

²⁵Ŋes inepunia anyunyura naka EJAKAIT mama ejaas iketuŋa, Ario akekan asurokin kes, epot kes, Komaranata da imor, Koraas atesinakec bala asusuj korotin. Karaida kiswamata ŋun kere, mam ca ejoniarit akenyunyura, Konye eriŋa akekan erioro.

²⁶Ikeikini naanyunet mama ejaas atekerin kama elwana, Iinyuni kes kosaŋe loka akwap: Ido koany, erasunete aiwonyun atipet!

²⁷Emameun yenepasi karaida aiguikin kotomakec; Emameun yeniluranar karaida ajotoor; Kwabo mam elaeunos aeneta nukanabesikec, Karaida mam enedas arukanasia nuka amukakec:

²⁸Eitak ikoioikec, iketet da akabwaikec; Ituputoorio imageger luka ibalasinikec bala iikepia, Ido akokoronokec bala etapipirio.

²⁹Eraun eikunikec bala loka eŋatuny, Ikunas rwaru kwape iŋatunyo ludidik; Eebo egatunete, esomakinos lumejanakec, Koyanaarete iyamito, kwabo emameun yeneyuuni.

³⁰Kapaaran kaya irurumaete kwape airurum naka aŋolol; Arai kite ituŋanan neeonit, Koany amuton ka aburun, Itumutonio aica kodouonoke.