Read Ebaibuli 1961 Isaia 51 Bible Online

Isaia 51 - Ebaibuli 1961 bible

Isaia 51

¹ “Kiirarai, yes luitupete adolit, Yes luimootos EJAKAIT: Kosesenata atiiba kama kikeunere, Apedot da naka aipany kama kibokunere.

² Kosesenata Aburaam papaakus, ka Sara da nakiwurie: Naarai nakeraar ediopet bon kanyarau ŋes, Kesireren, ketalal ŋes noi.

³ Naarai etalaka EJAKAIT Sion, Etalaka aiboisioke kere nuiswapito, Etuluo aisuke kwape Eden, Amodinike kwape emanikor loka EJAKAIT; Edumunos kanen ailel ka aiyalama, Aimal, ka eporoto loka ayoore.

⁴“Kopupunoi, yes ikatuŋa; Kitoikinai akit, ijo atekereka: Naarai elomuni ekisil kamakaŋ, Etarauni eoŋ etubeka aica naka ituŋa.

⁵ Eapie adoliteka, aloma aitajaraka, Etubokinete akakanin ituŋa; Kedareunete apujana eoŋ, emunos akakan.

⁶ Kiteluosi akusikonye kuju toma akuj, Kosesenata da akwap kokwap: Naarai ilicari akuj kwape apuru, Emoioni akwap kwape egoe, Luiboiete kotoma da etwakete kwape isiru: Konye ejaenena akaitajar ikar kere, Akadolit da mam itapalaunio.

⁷ “Kiirarai, yes luijenete adolit, Ituŋa luejaas ekakisil otauonokec; Sirikikuriakaros amorosit naka ituŋa, Karaida aburun kanuka amoromorokec.

⁸Naarai enyami kes ekajekelut kwape enyamia egoe, Enyami kes aeoroi kwape ajul: Konye ejaenena akadolit ikar kere, Akaitajar da aitodol aturio kere.”

⁹ Kokweny, kokweny, konap agogoŋ, ijo akan naka EJAKAIT; Kokweny, kwape kapaarasia nukasonya, aturio nukolo karobai. Mere jo naitubutubee Rakab, nakieumi apiu?

¹⁰ Mere jo nakitooni aŋolol, akipi nuka ataro naepol; Nakituluori aidules naka aŋolol erot loetuborotor lulakuna?

¹¹Ido eboŋunete lugweluna luka EJAKAIT, epote Sion kayoore; Ejaun ailel namam edaun akwesikec: Edumunete ailel ka aiyalama, Ilicaros aiturur ka eidiny.

¹² “Eoŋ, eoŋ obe, ŋopeŋol loketalakaari jo: Iŋai bo jo tetere ikuriana etuŋanan loetwani, Okoku loka etuŋanan da loeluori kwape anya?

¹³ Kimurwok EJAKAIT Lokasubanikon, Loeterakinit akuj, kopet apeteta nuka akwap; Ikuriana tiritir apaaran kere kanuka adedeŋ naka ekamwaŋan, Naitemokinio ŋesi amudiar; Ani bo adedeŋ naka ekamwaŋan?

¹⁴ Eenat loijoreoritai eosikinio katipet; Mam etwani kwabo mam elomari aipany, Karaida ikenyamat aiŋoŋar.

¹⁵ Naarai arai eoŋ EJAKAIT Ekonideke, Loiguri aŋolol tetere irurumaete akailan: EJAKAIT loka ajoresio ŋes ekekiror.

¹⁶ Ebwaik akakiro aitukukon, Kebwait jo kotoribe loka akanika, Tetere eraikini akuj, Apesi apeteta nuka akwap, Alimokini Sion ebe, ‘Iraas yesi ikatuŋa.’ ”

¹⁷ Kokweny, kokweny, kobwo, ijo Yerusalem, Loimasit kakan naka EJAKAIT adere naka anyunyurake; Ibu komat asidak nakotoma adere naka aigetigeta, aikokoor.

¹⁸Emamei loinarenikini ŋes kodwe kere luaurie: Emamei da loirikit akekan kodwe kere luasai ŋesi.

¹⁹ Kidoikis jo akiro nu nuarei; Iŋai bo kimonyi? Asilio ka amudiar, ebeli ka ekileŋ: Ekwaikini eoŋ ai ketalakari jo?

²⁰ Eiloros odwekon, eperete korotin kere kwape ekal kotoma oboi; Aup kes adedeŋ naka EJAKAIT, Airetakin naka Ekonideke.

²¹Aso do kiira nu, ijo naiticanitoi, Naimera, konye mere kanuka ebino:

²² Ebala kwanata EJAKAIT ikon, EJAKAIT, Ekonideke loepurokini akirot naka ikeruna ebe, “Koany, alema eoŋ kakanikon adere naka aigetigeta, Atany naka adedenuka; Mam bobo imasenenei:

²³ Ebwaikini akan naka ŋul kalukiticanete; Lukilimokinete aijarakon ebe, ‘Kokukum, katuboros’; Ituluo epurakon kwape akwap, Ido kwape erot, kotubonorotor kesi.”