Read Ebaibuli 1961 Isaia 54 Bible Online

Isaia 54 - Ebaibuli 1961 bible

Isaia 54

¹ Koye, ijo narakan, ijo namam iuriei; Kogeu ayoore, kikare, ijo namam irieba aidoun. Naarai ebala EJAKAIT ebe, Ipu idwe luka naesilikinit adepar idwe luka aberu ekiliokit.

²Kitalala aibois naka ewemakon, Koterarai aigalisio nuka aiboisiokon; Sirikitikok: Kitoojaa aunoikon, kitogogoŋ da iloinokon.

³Naarai ikaikini akan nakoteten ka nakokediany da; Irumi akoniur atekerin, Isiboikini ituŋa oreria luesilok.

⁴Sirikikurianar; naarai mam ileic kirumito: Karaida aitirir; naarai mam isurumio ileic: Naarai kimurwokinete ileic luka eiditeukon, Ido mam bobo iituni amorosit naka, eipuserunekon.

⁵ Naarai Lokasubanikon ŋes okilenikon; EJAKAIT loka ajoresio ŋes ekekiror: Lokalaunan loka Isirael ŋes Ekalakunanikon: Enyaritai Edeke loka akwapisinei kere.

⁶Naarai ebala Ekonideke ebe, Kinyarit EJAKAIT jo kwape aberu naejalakinitai, naekadakir komoyoke, Aberu naka atumun, nairenearere.

⁷ Kajal jo apak naedit noi; Konye katukonokini jo kaitim naepol.

⁸ Ebala EJAKAIT ekalakunanikon ebe, Kanyunyura naelapara abu kebwa akakonyen kamakon apak naedit; Konye ketimi jo kasianut namam edaun.

⁹ Naarai esubito nu kwape akipi nuka Noa kamakaŋ; Naarai kwape keyapoikinia ebe mam bobo enatarete aki nuka Noa akwap, Eyapoi kwaŋin ebe mam kanyunyurikini jo, Karaida airetakin.

¹⁰ Naarai ebala EJAKAIT lokitimit jo ebe, Enyounete iroŋan, ijaŋiianas iukon; Konye mam enyouni akasianut kamakon, Karaida akaitutuket naka ainapakin mam ijaŋijaŋa.

¹¹ Wu jo nakiticanitoi, nailiganari ekwam, namam italakario, Koany, ebwaanakini akonimor ojeseslo luejokuka, Apetanakini apetetakon asapiro.

¹²Asubakini adirisanakon amor nukareŋak, Iruteikon amor nuimilias, Eikorukon kere da amor nuisiyalamikinete.

¹³ Isisianakini EJAKAIT ikonidwe kere, Epol da ainapakin naka ikonidwe.

¹⁴Kiticasitai kadolit: Ilwana ijo kamwanio, naarai mam ikurianari; Ilwana da kotasuro, naarai mam kikunyakini jo.

¹⁵Koany, motoko isidikete aŋolopa, Konye mere eoŋ loesidikit: Ŋin yenesidiki aŋolopa aluikin jo, Ibirori ŋesi kanukon.

¹⁶Koany, kasub ekatatan loicuki akim naka atotol, Elemuni ŋesi ibore yenikiswamas akeswam; Kasub da ekamudiaran tetere emudiari.

¹⁷ Mam ekerianar ibore yenesubitai asurokinia jo; Itelekari nininaiep nakinyoikini jo kotube. Ebala EJAKAIT ebe, Ŋin ŋes airumet naka ikejaanakinak luka EJAKAIT, Ido adolitekec naebuni kamakaŋ.