Read Ebaibuli 1961 Isaia 55 Bible Online

Isaia 55 - Ebaibuli 1961 bible

Isaia 55

¹ Yesi ba, ŋinidiopet yenejakit akur, Kopotu yesi neejaas akip, Ŋin da yenemameete apesan: Kopotu yesi, kogwela konyama; Eebo, kopotu, kogwela ebino ka akile, Komameete apesan, komamei da etiai.

²Kanukinyo iinakiniata akusipesan agwelia ibore yenimam erai inyamat? Aitaaritoikus agwelia lumam kisimonikinete? Kodunyakis akiirar eoŋ, konyamata luejokuka, Kisiyalamikis atarion.

³ Kitoikis akiikus, kopotu neajai; Kiirasi, ejari do akusiijar: Etutuki eoŋ aitutuket namam edaun kayes, Ŋes aitim nakabeit naka Daudi.

⁴ Koany, ainak ŋes araun ekajenan mama ejaas atekerin, Ekeŋarenikinon ido ekecoranakinan mama ejaas atekerin.

⁵ Koany, inyarauni ateker namam ijeni, Ido ekeruni ateker namam lem kijeni jo mama ijai, Kanuka EJAKAIT Ekonideke, Ido kanuka Lokalaunan loka Isirael; Naarai kitopoloo ŋesi jo.

⁶ Komoata EJAKAIT kapak naepedoror adumun, Kiwoneete ŋes kapak naeapiar.

⁷ Kojal ikaronon ekerot, yenimam adolit da akeomisio: Koboŋu mama ejai EJAKAIT, itimi ŋes; Mama ejai Edekewok, naarai isionie noi.

⁸Naarai ebala EJAKAIT ebe, Akaomisio mam eraas akusiwomisio, Karaida ikusirotin mam eraas ikarotin.

⁹Naarai kwape ieeleleo akuj adepar akwap, Kwape kwaŋin iceleleoto ikarotin adepar ikusirotin, Akaomisio da adepar aomisiokus.

¹⁰ Naarai kwape etepia akiru ka akaka abunore kakuj, Komam eboŋori ŋina, konye icocoi alup, Isibwaŋuni isiburukunyi, Einakini ekayean ikinyom, ekanyaman da inyamat;

¹¹Ejaun kwape kwaŋin akakirot naelomuni kaitukuka; Mam eboŋuni mama ajai epalapalat, Konye itodoli nuetojokit eoŋ, Ido ekerianari kanueyakiaria.

¹²Naarai ilomarete kailel, inarenikinio kainapakin; Egeunete iroŋan ka iukon ayoore kakonyenekus, Ibapete ikito kere luka ais akecekanin.

¹³Elomuni eberos aibois naka ekukwai, Elomuni eteasur aibois naka ekodokodoi: Eraun ekiror mama ejai EJAKAIT, Aanyunet namam edaun namam egelario.