Read Ebaibuli 1961 Isaia 56 Bible Online

Isaia 56 - Ebaibuli 1961 bible

Isaia 56

¹ Ebala EJAKAIT kwanata ebe, “Kidarenenete etube, kiswamaenenete adolit: Naarai eapie akaitajar abunore, Akadolit da apukorio.

² Isirereŋitoi ituŋanan yeniswamai ŋun, Okoku loka etuŋanan da loiketakini kes: Yenericenenei asabato kinyek aitisil, Yenitikokini akekan kinyek aiswamaenen adioronis kere.”

³ Kinyek imoit yenimorikikina neejai EJAKAIT atemar atiar, “Abeit kagitari EJAKAIT eoŋ kotuŋake”; Kinyek ebwacit da atemar atiar, “Koany, arai eoŋ ekitoi loeonit.”

⁴Naarai ebala EJAKAIT kwanata ebe, “Ibwacin luerieenenete asabatonoka, Lueseunete akiro nuetojokit eoŋ, Luiketakinete akaitutuket:

⁵ Ainakini eoŋ kes kotogoka, ido kotoma arwatatinika, Aiitunet ka ekiror loitelekarit idwe lusap ka lupesur; Ainakini kes ekiror lomam edaun, Lomam egelario.

⁶“Ido imo, luimorikikina neejai EJAKAIT, Aijaanakin ŋes, lueminasi ekiror loka EJAKAIT, Lueraunos ikejaanakinakake, Ŋinidiopet yenericenenei asabato kinyek aitisil, Yeniketakini akaitutuket;

⁷ Ayauni eoŋ kes neejai eronataka lokalaunan, Ainakini kes alakara kotogoka lokilipet; Ecamakinitai ainakinetakec nuicweio, ka asubanakec kotemuka: Naarai enyaritai ekatogo etogo lokilipet loka ituŋasinei kere.

⁸ Ebala EJAKAIT Edeke loetukonokini luereŋearitai luka Isirael ebe, Atukonokini ice da mamakeŋ, nepepe kaluken luatukonokinitai.”

⁹Yes itiaŋ kere luka ais, kopotu ainyam, Yes itiaŋ kere luka amagoro.

¹⁰ Eraas ikekedarak imudukiok, kes kere emamei aijen: Eraas kere iŋokwo lubaŋiok, mam epedorete eirem; Irujaete, eperete, eminas ajo.

¹¹Eebo, iranaaka iŋokwo, mam imonianakinos; Ido lu kes ikecokok lumam epedorete ajenun: Ebelokinos kere orotokec bonik, Ŋolidiopet kakemeda, kes kere.

¹²Ebalas ebe, “Kopotu yesi, kiwomi ajon, Kedeneoto nuitemerete; Moi da eputoori lolo, epol adepar aitemis.”