Read Ebaibuli 1961 Isaia 57 Bible Online

Isaia 57 - Ebaibuli 1961 bible

Isaia 57

¹Eoliori ikadoliton, emamei yenibwaikini ŋun etau; Elemario ikasiakak, Emamei yeneomoomoi ebe elemaritai ikadoliton karonis.

²Elomakini ainapakin; Ibworarete koitadanakec, Ŋinidiopet yenelosi itenara.

³ Konye kikunyutu ne, yes odwe luka akacudan, Aur naka lodote ka naadote.

⁴Iboliatar iŋai? Iniŋitotor iŋai? Imielanakinotor iŋai aŋajepa? Mere yesi idwe luka adiakar, aur naka aiŋal.

⁵Yes luitumulaunete aiŋobel kotoma oluan, Kokwap kaŋolikitoi loepesit; Luiarakinete idwe aditon, Kaeilana nuka atiiban?

⁶Ewaikus ejai neejaas amor nuerurut nuka aditon; Kes, kes ba, nuebeikinit ekoniroet: Ibu kobukok kes ainakinet namatan, Ibu koinak ainakinet naka akiria. Kesiyamikinete kereka ŋun eoŋ?

⁷ Itemokinit eitadakon koroŋat loeoja loicelelei: Ibu kolot ŋina da ainakin asuban.

⁸ Isipokinit aiitunetekon kau kikirigin ka acuneta: Naarai ipukokinit mama ejai ece lomere eoŋ, idoka; Ibu kitalala eitadakon, kitutuk kakes, Komina eitadakec kama kianyunia.

⁹Ibu kolot mama ejai ekabaka kakinyet, Iyatakinit iponesio luegelegela lukakinyet lueurok maa, Kijuka ikiyakiakon kama elwana, Neidul kiton Okatwak.

¹⁰Kitapas alwanis naka erotokon; Konye mam ibu kotema atiar, “Emamei amun”; Idum aikwarun naka agogoŋukon; Ŋes mam iiloror.

¹¹ Irioni ikurianari iŋai tetere iŋalai, Komam kiitunit eoŋ, karaida aibwaikinit otaukon? Mam kelilinikinit apak naepol, Ido mam jo ikurianar eoŋ?

¹²Alimokini akonidolit; Akoniswamisio da mam kimedaikinete.

¹³ Naimonyia, koyuut ca aputosia nuitukonok ijo; Konye ekutari kes ekwam, elemari eiyeŋane kes kere: Konye yenemuno eoŋ eyai akwap, irumi eronataka lokalaunan.

¹⁴Ebalai ebe, “Kitutuoto, kitutuoto, Kitemokisi erot, Kolemasi ikomion korot loka ikatuŋa.”

¹⁵ Naarai ebala kwanata ŋol loicelelei loimukurur loiboikini nemam edaun, Ekekiror Lokalaunan ebe: “Eboie eoŋ kaibois naicelelei nakalaunan, Nepepe kaŋin yenejai emoyo loitoronikina loitasono, Aisikwarun emoyo loka luitasonos, Ido aisikwarun emoyo loka luitoronikina.

¹⁶ Naarai mam aŋolopa ikar kere, Karaida anyunyuranakin apaarasia kere: Naarai tikipirisiar emoyo kakonyeneka, Ka itauon lukasubi eoŋ.

¹⁷ Kanuka numam adolit nuka airananutuke kanyunyurik, Kenom ŋes, kebwa akakonyen, kanyunyurik: Kiyatakin ŋesi aibelokin ekaukau korot lokotauke.

¹⁸ Aany ikerotin, etaŋaleuni ŋes: Ido eŋarenikini ŋes, Enyakakini ŋes ka ikebworokoke nuitalakaarete.

¹⁹ Asubuni araito nuka aituke: Ebala EJAKAIT ebe, Ainapakin, ainapakin mama ejai ŋin yeneiwana, Ka ŋin da yeneapie, Etaŋaleuni eoŋ ŋes.

²⁰Konye esubito ikaronok kwape aŋolol naekulai; Naarai mam epedori apalar, Edakunete akipike erit ka amodokok.”

²¹ Ebala Ekadeke ebe, “Emamei ainapakin kaneejaas ikaronok.”