Read Ebaibuli 1961 Isaia 59 Bible Online

Isaia 59 - Ebaibuli 1961 bible

Isaia 59

¹ Koany, akan naka EJAKAIT mam ituwurianitai, Tape mam epedori aitajar; Kwabo mam akekit ekiminana, Tape mam epedori apupun:

²Konye apotu numam adolitekus kogitasi yes ka Edekekus, Kibwaata akusironisio akekonyen kamakus, Tape eŋeri apupun.

³ Naarai erŋunaara akaninikus aokot, Ikusibokoro da numam adolit; Ineras aitukekus nukaiŋal, Irurumaete anaiepakus nukaronok.

⁴ Emamei yeniworoi kadolit, Emamei yenepuri kabeit: Emunosi aamameak, ineras nukaiŋal; Epotiete ameŋeranut, idounete numam adolit.

⁵ Ebekunete abeei nuka asigirikoloŋa, Eojiete elago loka asimokok; Ŋin yenenyami akecebeei etwani, Naidecidecio da elomuni emusaga kotoma.

⁶Mam ikecelagoi eraunos inapen, Mam imukoros kakeceswamisio: Akeceswamisio eraas aswamisio nuka numam adolit, Aswam naka akaje ejai toma akaninikec.

⁷ Ekerete akecekeje mama ejai aronis, Isunyitos abukor aokot numam akirot: Akeceomisio eraas aomisio nuka numam adolit: Ejaas asilior ka amudiar orotinikec.

⁸ Mam ejenete erot loka ainapakin; Emamei etube kalositokec: Etemokis isokono lumagul; Ŋin da yenitori kanen mam ejeni ainapakin.

⁹ Kanuka ŋun elwaniar etube kamawok, mam adolit kidolokinit om: Kimoi aica, konye kianyuni amuton; Kimoi awaŋ, konye kisakasakai kamusimus.

¹⁰ Kirarapitoi amoot arwatat bala imudukiok, Eebo, kirarapitoi bala ŋul luemameete akonye: Kiguikini kidiŋ paaran, bala toma aikamus; Kotoma kaŋul kaluekurunanete kisubi oni bala lukatwak.

¹¹Kigata kere kwape idubun, Kibworo noi kwape ajeleik: Kimoi etube, konye emamei; Kimoi aitajario, konye alwaniar kamawok.

¹²Naarai epuakata adiakanaretakosi kakonyenekon, Itejenunete akosironisio kamakosi: Naarai ejaas adiakanaretakosi kasio, Ido kijeni numam adolitekosi.

¹³ Kidiakanari, ido kinerenenei EJAKAIT, Kibelonokini kenyeis aitup Edekekosi, Kinerenena nukaimwan ka nukepali, Kipwakuni kilimonokini da akiro nukaiŋal nuepote kotoma otau.

¹⁴ Ibelokinio etube ekaukau, Ebwoi adolit kama elwana: Naarai ebirokin abeit orot, Ido mam atenit epedori alomun.

¹⁵Eebo, aolio abeit; Ŋin da yenenyouni kotoma aronis itaraun bon iŋatara, Koany EJAKAIT ŋun, kokadak, Naarai amamei etube.

¹⁶ Koany ŋesi ebe amamei ituŋanan, Koumok naarai amamei yenedieki: Kanuka ŋun abu akekan elopet koyau aitajar; Akedolit da ŋes kiganit.

¹⁷ Abu konap adolit kwape ibore yenikatorob, Akopira naka aitajar akouke; Konap igoen luka ainyaŋ araut inapen, Kimukok ekolo da kwape elou.

¹⁸Kwape ejaatar aswamisiokec, etacakini kwape kwaŋin, Adedeŋ mama ejaas lukediŋeteke, Eropit mama ejaas lukasurupoke; Etacakini apujana eropit.

¹⁹ Kwaŋin eyoŋete ekiror loka EJAKAIT ageun koto, Akeibuses ageun kaneelomunio akoloŋ: Naarai ebuni kwape aguurut naelelei kagogoŋ, Naeremit eiyeŋane loka EJAKAIT.

²⁰ Ebala EJAKAIT ebe, “Ebuni ŋesi Sion kwape ekalakunan, Mama ejaas ŋul luibelokinos ainyein apaar kotoma Yakob.”

²¹ Ebala EJAKAIT ebe, “Kanukaŋ, na ŋes aitutuketeka kakes; ekamoyo loejai kajo, akakiro da nuebwaikinit aitukukon, mam enyounete kaitukukon, karaida kaituk naka aurikon, karaida aituk naka aur naka aurikon, ageun kwana kiton ikar kere.”