Read Ebaibuli 1961 Isaia 62 Bible Online

Isaia 62 - Ebaibuli 1961 bible

Isaia 62

¹Kanuka Sion mam ber eliliŋi, Ido kanuka Yerusalem mam ber ebworari, Aitodol naelomunia adoliteke kwape ailiya, Aitajarake da kwape akalas naenoki.

² Eanyunete atekerin adolitekon, Ikabakan kere da aibusesukon: Kimaikinio ekiror lokitetet, Loemaikini aituk naka EJAKAIT.

³ Ido da iraun ijo aboko naka atemelel kakan naka EJAKAIT Amekemeket naka ekabakane kakan naka Edekekon.

⁴ Mam bobo kinyaritai Naejalakinitai; Ido akonikwap mam bobo enyaritai Naimucoŋoŋ: Konye imaikinio Nakesiyalamikinit, akwapukon da Naedukokinitai: Naarai kisiyalamikinit EJAKAIT jo, adukokinio akwapukon.

⁵Naarai kwape edukokinia ekaturŋunan abekot, Kwape kwaŋin kidukokiniata odwekon lo: Ido kwape elelakinia eteran ateran, Kwape kwaŋin kilelakinia Ekonideke jo.

⁶ Ebwaikinit ikedarak arwatatinikon, ijo Yerusalem; Mam ililiŋenenete paaran ka akuar: Yes luisiituŋunete EJAKAIT, sirikipalasi.

⁷ Sirikinupakis ŋes apalar, aitodol neiticasia Yerusalem, Ido aitodol neituluoria ŋes aiturio kakwap.

⁸ Eyapoik EJAKAIT kolimite akekan nakoteten, Kakan da naka agogoŋuke ebe, “Abeit mam bobo ainanakini akimakon araun atap naka lukasurupokon; Imo da mam emasenenete ekonibino, loitaaritor:

⁹ Konye ŋul luasakito kes enyamete, kituritos EJAKAIT,; Ŋul da luadenito kes emasete kalaroi nuka aiboisika nakalaunan.”

¹⁰Kotuboros, kotuboros korutei; Kitemokis erot loka ituŋa, Kitutuoto, kitutuoto erot lokapolon; Koukonosi amor; kikeikis ituŋa aanyunet.

¹¹ Koany, alimok EJAKAIT kiton osaŋe loka akwap, Kolimokis yesi akoku naka Sion ebe, “Koany, ebunit akoniitajario; Koany, ejai aimalaeteke kaŋes, Ekeropit da ejai kakonyeneke.”

¹²Emaikinio Ituŋa lukalaunak, Lulakuna luka EJAKAIT; Kimaikinio jo Naemootai, Ere lomam ejalakinitai.