Read Ebaibuli 1961 Isaia 7 Bible Online

Isaia 7 - Ebaibuli 1961 bible

Isaia 7

¹ Kosodi kanen kapaarasia nuka Akas okoku loka Yotam, okoku loka Usia, ekabaka loka Yuda, apotu Resin ekabaka loka Suria, ka Peka okoku loka Remalia, ekabaka loka Isirael koloto Yerusalem aitiji; konye kokurwokis.

²Aponi kolimokinai ekek loka Daudi ebe, “Emorikikinos Suria ka Epuraim.” Komaran eketau, ka itauon luka iketuŋa da, kwape kikito luka amagoro luitamarani ekwam.

³ Kosodi kotema EJAKAIT Isaia atiar, “Koloma kiriamunos ka Akas, ijo ka okokukon Sear-yasub, kosaŋe loka aleles naka atapar nakokuju, korot loka emanikor loka ekelotan;

⁴kolimok ŋes atiar, ‘Kocoite, kiyamakina; sirikikurianar, kinyek ekonitau ailworun, kanuka ikuk lu luka akalasia nuepurunete, kanuka anyunyura naededeŋ naka Resin ka Suria, ido okoku loka Remalia.

⁵Naarai eneru Suria aronis mama ijai, Epuraim da, ka okoku loka Remalia, kobalas ebe,

⁶“Kaloto kalomakis Yuda, kesiyaloŋoŋoto ŋes, kapedoto apedot kanuwok, kadakakis ekabaka kokidiŋike, ŋes okoku loka Tabeel”:

⁷Inera kwanata EJAKAIT Edeke ebe: Mam icasi, karaida aitodolokinio.

⁸ Naarai akou naka Suria ŋes Damasiko, Akou da naka Damasiko ŋes Resin. (Eriŋa etuboro ikar akaisakanykape ka lukany ebilibilun Epuraim, mam bobo eraun ateker.)

⁹Akou naka Epuraim ŋes Samaria, Akou da naka Samaria ŋes okoku loka Remalia. Arai kiŋero yesi aiyuun, Abeit mam kiticasio.’ ”

¹⁰Kolimok EJAKAIT bobo Akas ebe,

¹¹“Kilipu EJAKAIT Ekonideke aanyunet; kilipu kotoma aidules arai kokuju kakuj.”

¹²Konye kotema Akas atiar, “Mam elipi, karaida akodwi EJAKAIT.”

¹³Kotema atiar, “Aso kiirasi yesi, wu jo ekek loka Daudi; erai akirot naedit kaneijaas aitapas ituŋa, tape itapasete Ekadeke da?

¹⁴ Kanuka ŋun ŋes kiinakinia EJAKAIT elopet aanyunet; koany, epotuuni abekot, idouni ikoku yenisapat, emaikini ekekiror Imanuel.

¹⁵Enyami akinyet ka esik, naejeŋunia aiŋer aronis, aseun da ajokis.

¹⁶ Naarai eriŋa ikoku ejenuna aiŋer aronis, aseun da ajokis, ejalakinio akwap nailaia ijo ikabakanakec iarei.

¹⁷ Eyauni EJAKAIT mamakon, ka ikonituŋa, ka ekek loka papakon apaarasia numam lem edoluno, ameun kapaarasia nukenyounio Epuraim koYuda; ŋes ekabaka loka Asuria.”

¹⁸Kosodi kanen kapaaran kaŋin, iinyuni EJAKAIT ecucut loejai atutubet nakawasia naka icorin luko Misiri, ka ao da naejai akwap naka Asuria.

¹⁹Epote do, ibworarete kesi kere kaditon nuiswapito, koburino luka atiiba, kokukwa kere, koronyia kere da.

²⁰ Kapaaran kaŋin, ebareni EJAKAIT kebarenit Ioeropioro loejai juwai naka Ecor, ŋes ekabaka loka Asuria, akou ka ajul nuka akeje: epiari da epenek.

²¹Kosodi kanen, kapaaran kaŋin, ipisi ituŋanan ataok, ka amerekekin aarei;

²²kosodi kanen, enyami akinyet kanuka aipues naka akile nueinakinete: naarai enyamenenei ŋinituŋanan yenideuna kakwap akinyet ka esik.

²³Kosodi kanen kapaaran kaŋin, ŋiniibois nakejaas kolo imusabibun elukumit luedumunete atutubeta nuka epuesa alukumit, eraun naka ikodokodo ka ikukwa.

²⁴Epote ituŋa nen ejaas kakabwai kaimalia; naarai eraun akwap kere ikodokodo ka ikukwa.

²⁵Mam idoliori oukon kere lukolo kibokibokio kemeleku naarai ikurianari ikodokodo ka ikukwa, konye eraunos lukibuaikina ibaren, ka luipudapudaete isipanin.