Read Ebaibuli 1961 Ilebin 11 Bible Online

Ilebin 11 - Ebaibuli 1961 bible

Ilebin 11

¹Kotema EJAKAIT Musa ka Aaron atiar,

² “Kolimok idwe luka Isirael ebe, Lu kes iboro lukajarak luinyamenenete kotiaŋ kere luejaas akwap,

³ŋin kere yenetiakak emagegeret, ka yenimwaasi atutubeta aarei nuka emagegeret, ka yeninyogonokini anyak ikenyamat, kotiaŋ, ŋin inyamenenete.

⁴Konye mam inyamenenete lu kaŋul kaluinyogonokinete anyak ikecenyamat, arai kaŋul kaluimwaasi atutubeta aarei nuka emagegeret: akaala, naarai inyogonokini anyak ikenyamat, konye mam ekemagegeret etiakak, erai yenimam elai kamakus.

⁵Enyuru da, naarai inyogonokini anyak ikenyamat, konye mam ekemagegeret etiakak, erai yenimam elai kamakus.

⁶ Ipoo da, naarai inyogonokini anyak ikenyamat, konye mam ekemagegeret etiakak, erai yenimam elai kamakus.

⁷ Epege da, naarai etiakak ekemagegeret, imwaasi atutubeta aarei nuka emagegeret, konye mam inyogonokini anyak ikenyamat, erai yenimam elai kamakus.

⁸ Mam inyamenenete akiriŋikec, mam itironorete awatekec nukatwak; eraas lumam elaete kamakus.

⁹ “Inyamenenete lu kaŋul kere luejaas akipi: ŋin yenejaas isigigirio ka aabel kotoma akipi, kaŋololin, kocorin da, inyamenenete ŋul.

¹⁰ Kere da luemameete isigigirio ka aabel kaŋololin, kocorin, ka ŋul kere luilatos kotoma akipi, ka lukajarak kere luejaas toma akipi, eraas luketal kamakus.

¹¹Eraunos kesi luketal kamakus; sirinyamenenete akiriŋikec, eraas awatekec nukatwak nuketal kamakus.

¹²Ŋin yenemameete isigigirio karaida aabel kotoma akipi, erai ŋin yeniketal kamakus.

¹³ “Lu da eraas luketal kamakus kakweny; mam enyamenenoo, eraas luketal: emorukaalet, ekokom, ka ogaria;

¹⁴Etoori, ka egole koponeke;

¹⁵Ka ŋolikuruk koponeke;

¹⁶Ka ekuulu, ka etoori loka akuare, ka eroagol, ka ecur koponeke;

¹⁷Ekoloroc, ka etotoet, ka etukuri loepol;

¹⁸ Etukuri loesubit bala ejaas amumwara, ka erere ka atarukot;

¹⁹Etolut, ka egoro koponeke, ka aoŋor, ka emenia.

²⁰“Iboro kere luejaas abebenoka lueliatos luelosete kakeje aoŋon eraas luketal kamakus.

²¹Konye ipedorete ainyam lu koboro luejaas abebenoka lueliatos luelosete kakeje aoŋon, luejaas akeje nueojaojatos asomanaror kakwap;

²² Ipedorete ainyam lu kakesi; emaase koponeke, emelomeloi koponeke, aabaara koponeke, ka ebeere koponeke.

²³Konye iboro kere luejaas abebenoka lueliatos, luejaas akeje aoŋon eraas luketal kamakus.

²⁴“Lu kes kitaraunete yes lumam ilaete; ŋin yenetirori akuanakec nakatwan eraun yenimam elai kiton eboŋ.

²⁵ Ŋin yenedaki akuanakec nakatwan ilosi ikenapen, eraun yenimam elai kiton eboŋ.

²⁶Ŋinitiaŋ kere yenetiakak emagegeret, yenimam atutubeta aarei nuka emagegeret, karaida ainyogonokin anyak ikenyamat, erai yenimam elai kamakus: ŋinituŋanan yenetirori kes eraun yenimam elai.

²⁷Ŋin yenelosi kotau kakeju, kotiaŋ kere luelosete kakeje aoŋon, eraas lumam elaete kamakus: ŋin yenetirori awatekec nukatwak eraun yenimam elai kiton eboŋ.

²⁸Ŋin da yenedaki akuanakec nakatwan ilosi ikenapen, eraun yenimam elai kiton eboŋ; eraas lumam elaete kamakus.

²⁹ “Lu kes lueraas lumam elaete kamakus koboro lueliatos lueliatos kakwap; enyukunyuk, ka emir, ka egereger lokapolon koponeke.

³⁰ Eidodo, ka akinyaŋ, ka totokamoŋo, ka aililiaŋ, ka agougou.

³¹Ŋul kes lumam elaete kamakus kotoma kaŋul kalueliatos: ŋin kere yenetirori kes, ketwaka, eraun yenimam elai kiton eboŋ.

³² Ŋinibore kere yenedoikini idiopet kakesi yenikatwan, eraun yenimam elai: arai ibore yenika akito, arai egoe, arai emukule, arai epuko, ibore kere yenitwasamao, ibusakinit aibwaikin akipi, eraun yenimam elai kiton eboŋ; kosodi konyet araun yenelai.

³³ Ŋinibore kere yenesubio kelupe, yenedoikini idiopet kakesi, ibore kere yenejai tomake eraun yenimam elai, ibwaŋete ibore ŋin.

³⁴Inyamat kere luenyamio, luebukokinio akipi, eraunos lumam elaete: numatan kere nuemasio toma obore kaŋin eraunos numam elaete.

³⁵Ŋinibore kere yenedoikinete awatekec nukatwak eraun yenimam elai; arai emukaro, arai ekiala loka amoti, ebwaŋabwaŋaun; eraas lumam elaete, eraunos lumam elaete kamakus.

³⁶Konye atan arai atapar neetukonokinos akip eraun naelai: konye yenetirori akuanakec nakatwan eraun yenimam elai.

³⁷Arai kedoo akuanakec nakatwan okinyom kere luwean luekotoi aiwe, eraas luelaete.

³⁸Konye arai kebukokinos akip okinyom, kedoo akuanakec nakatwan tomakec, eraas lumam elaete kamakus.

³⁹“Arai ketwana etiaŋ loipedorete yesi ainyam; ŋin yenetirori akuanake nakatwan eraun yenimam elai kiton eboŋ.

⁴⁰ Ŋin yenenyami akuan ŋin nakatwan ilosi ikenapen, eraun yenimam elai kiton eboŋ; ŋin da yenedaki akuan ŋin nakatwan ilosi ikenapen, eraun yenimam elai kiton eboŋ.

⁴¹“Ŋinibore kere yeneliat, yeneliat kakwap erai yeniketal; mam enyamenenoo.

⁴²Yeneliat kakoikike, ka yenelosi kakeje aoŋon, ka yenejaas akeje nuipu, kes iboro kere lueliatos, lueliatos kakwap, sirinyamenenete ŋul; naarai eraas luketal.

⁴³ Sirikimunaunos kibore kayeneliat kere yeneliat kakwap, karaida aituluor lumam ilaete, kinyeis kes amunaun yes.

⁴⁴ Naarai arai Eoŋ EJAKAIT Ekusideke: aso kitalaunos, koraut lukalaunak; naarai arai eoŋ lokalaunan: kinyeis amunaun bonik kopone kere loka ibore yeneliat kere yeneliat kakwap.

⁴⁵ Naarai arai eoŋ EJAKAIT loketolom yes kakwap nako Misiri, araun Ekusideke: aso koraut lukalaunak, naarai arai eoŋ lokalaunan.”

⁴⁶Ŋol ŋes ekisil loka itiaŋ, ka loka akweny, ka loka ŋinibore kere yenejari yenilato kotoma akipi, ka ŋinibore kere yeneliat kakwap:

⁴⁷ Atiakun lumam elaete ka luelaete, atiakun da ibore yenejari yenepedorio ainyam, ka ibore yenejari yenimam epedorio ainyam.