Read Ebaibuli 1961 Ilebin 14 Bible Online

Ilebin 14 - Ebaibuli 1961 bible

Ilebin 14

² “Lo ŋes ekisil loka yenikatapon kapaaran naka aitesegaarioke: eyaŋaunio mama ejai esasedoti:

³Elomari esasedoti kiŋa kiidukurun; irerei esasedoti, ido koany, arai aŋaleu adek naka atapon kotuŋanan;

⁴ Kosodi esasedoti aicorakin alemikin ŋin yenekot aitesegaario akweny aarei nuelaete nuejarete, ka akito nuka eres, ka yenikareŋan, ka esop. [5]

⁵Icorakini esasedoti aiar adiopet kakweny kotoma amot naka elupe kuju neeleleata akip:

⁶Akweny naejari da, eyaŋaari ŋes, ka akito nuka eres, ka yenikareŋan, ka esop, idomakini kes ka akweny naejari toma aokot nuka akweny naarakinitai kuju neeleleata akip:

⁷ Ebwatanakini ŋesi ŋin yenekot aitesegaario katapon irwan akanykaarei, elimokini ebe elai ŋesi, eosikini akweny naejari kais.

⁸ Ŋin yenekot aitesegaario ilosi ikenapen, ebareni itimake kere, iloŋi kakip, eraun yenelai: kokau kaŋun elomari oidukurun, konye iboie kokiŋa kewemake apaarasia akanykaarei.

⁹Ejaun kapaaran nakikanyetekaarei ebe ebareni itimake kere kakouke, ka epenekike, ka abukioke, ebareni itimake kere: ilosi inapeneke, iloŋi akekuan kakip, eraun yenelai.

¹⁰ “Kapaaran nakikanyetekauni elemuni imerekekin iarei ludidik lukiliok lumam eŋwalitos, ka imerekek idiopet yeniberu yenika ekaru ediopet yenimam eŋwalit, ka iuni kotomon luka epa [6] loka akiria nuidicic araun ainakinet naka akiria, nuinyalakinitai akinyet, ka atido naka akinyet.

¹¹Esasedoti loitesegi ibwaikini ituŋanan yenekot aitesegaario, ka iboro ŋul kakonyen nuka EJAKAIT, kokek loka ewema loka airiamunun:

¹² Elemuni esasedoti idiopet komerekekin ludidik lukiliok, kijaik ŋes araun ainakinet naka aronis, ka atido naka akinyet, ijaŋi kes araun ainakinet naijaŋio kakonyen nuka EJAKAIT.

¹³ Earakini imerekek yenididi yenikiliokit aibois nearanakina ainakinet naka adiakaret ka ainakinet naicweio, aibois nakalaunan: naarai kwape eraar ainakinet naka adiakaret naka esasedoti, erai kwape kwaŋin ainakinet naka aronis: erai nakalaunan noi.

¹⁴ Elemuni esasedoti aokot nuka ainakinet naka aronis, ejukokini okobet loka akit nakoteten naka ŋin yenekot aitesegaario, kobokorit da lokapolon loka akekan nakoteten, kobokorit da lokapolon loka akejuke nakoteten.

¹⁵Elemuni esasedoti atido naka akinyet ebukokini otau kakanike elopet nakokediany:

¹⁶Idomakini esasedoti ebokoritike lokoteten akinyet naejai akanike nakokediany, ebwatanari akinyet kebokoritike irwan akanykaarei kakonyen nuka EJAKAIT.

¹⁷ Ejukokini esasedoti akinyet naedeun kakanike okobet loka akit nakoteten naka ŋin yenekot aitesegaario, kobokorit da lokapolon loka akekan nakoteten, kobokorit da lokapolon loka akejuke nakoteten, toma aokot nuka ainakinet naka aronis:

¹⁸ Inyonyoikini akinyet naedeun kakan naka esasedoti akou naka ŋin yenekot aitesegaario; ituluci esasedoti ŋes kakonyen nuka EJAKAIT.

¹⁹Ijaikini esasedoti ainakinet naka adiakaret, ituluci ŋin yenekot aitesegaario kanuka numam alauniteke; kokau eari ainakinet naicweio.

²⁰Ijaikini esasedoti ainakinet naicweio ka ainakinet naka akiria kotem: ituluci esasedoti ŋes, eraun yenelai.

²¹ “Arai icana ŋesi, mam epedori adumun ŋun kere, eyaŋaari do imerekek idiopet yenikiliokit araun ainakinet naka aronis ajiaŋio, aitulucio ŋes, ka idiopet kotomon yenika epa loka akiria nuidicic nuinyalakinitai akinyet araun ainakinet naka akiria, ka atido naka akinyet;

²² Ajeleik aarei arai ilukei iarei ludidik, kwape epedoria adumun; eraun idiopet ainakinet naka adiakaret, ka yenice da ainakinet naicweio.

²³Kapaaran nakikanyetekauni eyauni kes kanuka aitesegaarioke mama ejai esasedoti, okek loka ewema loka airiamunun, kakonyen nuka EJAKAIT.

²⁴Eyaŋaari esasedoti imerekek yenika ainakinet naka aronis, ka atido naka akinyet, ijaŋi esasedoti kes araun ainakinet naijaŋio kakonyen nuka EJAKAIT.

²⁵ Eari imerekek yenika ainakinet naka aronis, elemuni esasedoti aokot nuka ainakinet naka aronis, ejukokini okobet loka akit nakoteten naka ŋin yenekot aitesegaario, kobokorit da lokapolon loka akanike nakoteten, kobokorit da lokapolon loka akejuke nakoteten.

²⁶Ebukokini esasedoti akinyet otau kakanike elopet nakokediany:

²⁷Ebwatanari esasedoti kebokoritike lokoteten akinyet naejai akanike nakokediany irwan akanykaarei kakonyen nuka EJAKAIT:

²⁸ Ejukokini esasedoti akinyet naejai akanike okobet loka akit nakoteten naka ŋin yenekot aitesegaario, kobokorit da lokapolon loka akanike nakoteten, kobokorit da lokapolon loka akejuke nakoteten, toma aibois naka aokot nuka ainakinet naka aronis.

²⁹Inyonyoikini akinyet naedeun kakan naka esasedoti akou naka ŋin yenekot aitesegaario, aitulucio ŋes kakonyen nuka EJAKAIT.

³⁰ Ijaikini idiopet kajeleik, arai kilukei ludidik kwape epedoria adumun;

³¹Kwape epedoria adumun, idiopet araun ainakinet naka adiakaret, ka yenice araun ainakinet naicweio, nepepe kainakinet naka akiria: ituluci esasedoti ŋin yenekot aitesegaario kakonyen nuka EJAKAIT.

³²Ŋol ŋes ekisil loka ŋin yenedek atapon, yenimam epedori adumun luka aitesegaarioke.”

³³Kotema EJAKAIT Musa ka Aaron atiar,

³⁴ “Naidolioto yesi akwap naka Kanaan, naainakini yes araun airumet, ebwaikini adek naka atapon kotogo loka akwap naka airumetekus;

³⁵ Ebuni elopet etogo elimokini esasedoti ebe, ‘Esubit bala ejai adek naka atapon togoka.’

³⁶ Icorakini esasedoti alemar iboro kere kotogo, eriŋa ŋes elomara aanyun adek, tetere luejaas toma kere mam eraunos lumam elaete: kokau elomari esasedoti aanyun etogo.

³⁷Irerei ŋesi adek, ido koany, arai ejai adek arwatatin nuka etogo, acileta nupiria, arai nuereŋereŋeto, elomarit aputoke toma arwatat;

³⁸ŋes konyet elomunia esasedoti kotogo kiton okek loka etogo, kogoli etogo apaarasia akanykaarei.

³⁹Eboŋuni esasedoti apaaran nakikanyetekaarei, irerei; ido koany, arai kisiarakin adek arwatatin nuka etogo;

⁴⁰ Kosodi esasedoti aicorakin alemar amor nuejaas adek, acakar da aibois namam elai kiŋa naka ere.

⁴¹Itikisikisi ŋesi etogo toma airimor, ebukonorete nuadaut aikisikis kiŋa naka ere aibois namam elai:

⁴²Elemarete amor ace ibwaikinete aibois naka amor kwa; eyauni asiŋe ace, iladai etogo.

⁴³“Arai keboŋ bobo adek, atakanun kotogo, kedau ŋesi alemar amor, kedau aikisikis etogo, kedau ailad;

⁴⁴ Kosodi esasedoti alomar airere, ido koany, arai isiarakina adek togo, erai atapon naerogirog etogo: mam elai.

⁴⁵Ekesi etogo, amoruke, ka akitoke, ka asiŋe kere naka etogo; edakari kes kiŋa naka ere aibois namam elai.

⁴⁶ Bobo da ŋin yenelomari togo kapak kere naegololor eraun yenimam elai kiton eboŋ,

⁴⁷ŋin yeneperi togo ŋol ilosi ikenapen; ŋin yenenyami kotogo kaŋol ilosi ikenapen.

⁴⁸ “Arai elomari esasedoti, irerei, ido koany, mam adek isiarakina togo, kedau ailad etogo; kosodi esasedoti alimokin ebe elai etogo, naarai aŋaleu adek.

⁴⁹Eyaŋaari akweny aarei aitesegia etogo, ka akito nuka eres, ka yenikareŋan ka esop.

⁵⁰Earakini adiopekweny amot naka elupe kuju neeleleata akip;

⁵¹ Eyaŋaari akito nuka eres, ka esop, ka yenikareŋan, ka akweny naejari, idomakini kes aokot nuka akweny naarakinitai, toma akipi nueleleete da, ebwatanakini togo irwan akanykaarei:

⁵²Ido itesegaari etogo kaokot nuka akweny, ka akipi nueleleete, kakweny naejari, kakito nuka eres, ka esop ka yenikaren an.

⁵³Konye eyaŋaari akweny naejari kiŋa naka ere koosikini koporo ais; ituluci etogo kwaŋin: eraun loelai.”

⁵⁴ Ŋol ŋes ekisil loka epone kere loka adek naka atapon, ka etapitap;

⁵⁵ Ka loka atapon naka anapito, ka loka etogo;

⁵⁶ Ka loka abuunet, ka asalabit, ka aisorit:

⁵⁷ Aisisianakin arai mam elai, arai da elai; ŋol ŋes ekisil loka atapon.