Read Ebaibuli 1961 Ilebin 19 Bible Online

Ilebin 19 - Ebaibuli 1961 bible

Ilebin 19

¹Kotema EJAKAIT Musa atiar,

² “Kolimok ekodet kere loka idwe luka Isirael ebe, Koraas lukalaunak: naarai eoŋ EJAKAIT Ekusideke arai lokalaunan.

³ Koyoŋitenenei ŋinituŋanan kayesi totoke, ka papake, koricenenete asabatonoka: arai eoŋ EJAKAIT Ekusideke.

⁴ Sirikibelokinos neejaas aputosia, karaida aiswamaun bonik idekesio lucealara: arai eoŋ EJAKAIT Ekusideke.

⁵“Naiinakiniata asubanit naka ainakinet naka ainapakin mama ejai EJAKAIT, koinakis tetere kicamunio.

⁶Enyamio apaaran ŋin naiinakinete ŋes, ka moi da: arai kideun ibore kiton apaaran nakiwuniet, icweio kakim.

⁷Arai do enyamio kapaaran kanakiwuniet, erai naketal: mam ecamunio.

⁸Konye ibwoki ŋinituŋanan yenenyami ŋes numam adoliteke, naarai etisil ibore yenikalaunan yenika EJAKAIT: egelario ituŋanan ŋin kotuŋake.

⁹ “Naisakiata nuka akwapukus, sirikisak cut agoria nuka emanikorikon, karaida aituk nuedepanara nuka aisakakon.

¹⁰ Siridepidepanari aideŋ emusabibukon, karaida atukonokin araito nuedoununete nuka emanikorikon loka emusabibu; inyeinia kes yenikican ka imoit: arai eoŋ EJAKAIT Ekusideke.

¹¹ “Sirikokoenenete; karaida aiŋalaŋal, karaida asabanakin.

¹² Siriyapoenenete aiŋal kolimito ekakiror, kosodi aitisil ekiror loka Edekekon: arai eoŋ EJAKAIT.

¹³ “Siriŋara eidunyetekon, karaida ademar lukeŋ; sirikitepero eropit loka ekejaanakinan loiwotei akuare kere kiton tupuruc.

¹⁴ Sirikiken ikimin, karaida aibwaikin yeniguikini imuduk, konye koyoŋite Ekonideke: arai eoŋ EJAKAIT.

¹⁵ “Siritubenenete numam etenito: sirikinupak ituŋanan yenikican, karaida aiyoŋ ituŋanan yenikagogoŋon, konye itubonokini eidunyetekon kotenan.

¹⁶ Siririmio ebeele otuŋakon: karaida abwoanakin aluikin aokot nuka eidunyetekon: arai eoŋ EJAKAIT.

¹⁷ “Sirikila onacekon kotaukon: abeit kitoroni ijo eidunyetekon, sirikibwok aronis kanuke.

¹⁸ Sirikinyaŋ akirot, karaida adiŋakinit idwe luka ikonituŋa, konye komina eidunyetekon kwape iminari bon: arai eoŋ EJAKAIT.

¹⁹ Koricenenete ikakisila. Sirikisunup ibarenekon akwar kaluegelegela; sirikiye omanikorikon ikinyom luka iponesio iarei: karaida ainap anapito naka iponesio iarei luka egoe luinyalinyalitai.

²⁰“Ŋolituŋanan loeyelo kaberu, naerai abulesit, naisinerit okilenike, namam cut elakunitai, karaida alacakinio; iticanio kes; mam eario, naarai mam ŋin alacakinitai.

²¹Eyauni ŋesi ainakineteke naka aronis mama ejai EJAKAIT, okek loka ewema loka airiamunun, ŋes emerekek araun ainakinet naka aronis.

²²Ituluci esasedoti ŋes kemerekek loka ainakinet naka aronis kakonyen nuka EJAKAIT kanuka adiakareteke naadiakaa ŋesi; isionio akediakaret naadiakaa ŋesi.

²³Kilomasi yesi akwap, kiraata da ikito luka iponesio kere lunyaman, imarakinete araitokec araun numam akepepukec: esubete bala numam ekepep kamakus adaun ikar iuni; mam enyamenenoo.

²⁴ Konye kokaru lokiwoŋonet eraunos araitokec kere nukalaunak, aiturio EJAKAIT.

²⁵Kokaru lokikanyet inyamete yesi araitokec, tetere idumunete eiyasikec: arai eoŋ EJAKAIT Ekusideke.

²⁶ “Sirinyamenenete ibore kaokotoke: karaida aitwasam icudeta karaida aiŋic aanyuneta.

²⁷ Sirikikeba akwesikus, karaida amunaar iwaitin luka ipenekakus.

²⁸ Sirikigerata awatekus kanuka lukatwak, karaida aibwaikin aanyuneta: arai eoŋ EJAKAIT.

²⁹ “Sirikitisil akokukon aitaraun ŋes naadote; kinyek akwap aluor adoteu, ilelebun akwap aronis.

³⁰ Koricenenete asabatonoka, koyoŋito aiboisika nakalaunan: arai eoŋ EJAKAIT.

³¹ “Sirikibelokinos mama ejaas luejaas ajokia, karaida mama ejaas ikacudak; sirikimoata kes kinyeis amunaun: arai eoŋ EJAKAIT Ekusideke.

³² “Inyouni kakonyen nuka yenabwanut akorwo, kiyapaara kakonyen nuka ekimat, koyoŋ Ekonideke: arai eoŋ EJAKAIT.

³³ “Arai iboie imoit kajo kakwapukus, sirikiswamakis ŋes erono.

³⁴ Eraun imoit yeniboie kayes kwape iuriat kamakus, komina ŋes kwape iminari bon; naarai iraas kolo imo kakwap nako Misiri: arai eoŋ EJAKAIT Ekusideke.

³⁵ “Siritubenenete numam etenito, aitem aojau, ainiŋ ka aitem etiai loilosikin.

³⁶ Aitemisio nukabeit, imisanin lukabeit, epa [8] lokabeit, ekin [9] lokabeit, ŋun kere itwasamaete: arai eoŋ EJAKAIT Ekusideke, loketolom yes kakwap nako Misiri.

³⁷ Kidarenenete ikakisila kere ka itubesiaka kere, kiswamaenenete kes: arai eoŋ EJAKAIT,”