Read Ebaibuli 1961 Ilebin 21 Bible Online

Ilebin 21 - Ebaibuli 1961 bible

Ilebin 21

¹ Kotema EJAKAIT Musa atiar, “Kolimok isasedotin, odwe luka Aaron, ebe, Siri ituŋanan kayesi kemunaun bon kanuka lukatwak kotuŋake;

²Dimarai lukokekike luipajanas kaŋes, totoke, ka papake, ka okokuke, ka akokuke, ka onaceke;

³ka inacike naerai abekot, nainacanas kaŋes namam ekiliokit, epedori amunaun bon kanukeŋ.

⁴Mam emunaun bon, korai ekapolon kotuŋake, aitisil bon.

⁵ Mam ebarenete epata kakwesikec, karaida abaren iwaitin luka ipenekakec, karaida aiger awatekec.

⁶ Eraunos kesi lukalaunak kama ejai Edekekec, mam itisilete ekiror loka Edekekec: naarai einanakinete ainakineta nuka EJAKAIT, nueinakinere kakim, atap naka Edekekec: kanuka ŋun eraunos lukalaunak.

⁷ Mam kes eyaŋaarete aberu naerai adote, arai naitisilitoi: mam eyaŋaarete da aberu nakireŋea okilenike; naarai erai lokalaunan kama ejai Ekedeke.

⁸ Kanuka ŋun italauni ŋes: naarai einakini atap naka Edekekon: eraun lokalaunan mama ijai: naarai eoŋ EJAKAIT loketalauni yes, arai lokalaunan.

⁹ Akoku da naka esasedoti, arai kitisil bon araun naadote, etisili papake; icweio ŋin kakim.

¹⁰ “Ŋol da loerai esasedoti lopeti koinacanake, loebukokinitai akinyet nakinyonyoanakina akouke, loetiakunitai ainap inapen, mam ŋol elakari itima luka akouke, karaida aicil inapeneke:

¹¹ Karaida alomar neejai akuan nakatwan, karaida amunaun bon kanuka papake, karaida totoke;

¹² Karaida alomun kaibois nakalaunan, karaida aitisil aibois nakalaunan naka Edekeke; naarai enapit aboko naka akinyet nakinyonyoanakina naka Edekeke: arai eoŋ EJAKAIT.

¹³ Emanyi ŋesi aberu nabekot.

¹⁴Apuserut, ka naireŋetai, ka aberu naitisilitoi, ka naadote, ŋun mam emanyi: konye emanyi abekot kotuŋake.

¹⁵ Mam ŋes itisili aurike kotuŋake; naarai arai eoŋ EJAKAIT loetalauni ŋes.”

¹⁶Kotema EJAKAIT Musa atiar,

¹⁷ “Kolimok Aaron ebe, Ŋolituŋanan loka aurikon anatar aturiokec loeŋwalit, siri ŋol kikunyaki ainakin atap naka Edekeke.

¹⁸ Naarai ŋolituŋanan loeŋwalit, mam ŋol ikunyakini: emuduki, arai loicodo, arai ŋol loŋiriony kekume, arai loejai ibore yeniyatakina.

¹⁹Arai etuŋanan loebilil akeju, arai loebilil akan.

²⁰ Arai arubaŋat, arai loarakaki, arai loeŋwalit akoŋu, arai lokijip, arai lokasalabit, arai loebulul itou;

²¹Mam etuŋanan loeŋwalit loka aur naka Aaron esasedoti, ikunyakini ainakin ainakineta nuka EJAKAIT nueinakinere kakim: eŋwalit ŋesi, mam ikunyakini ainakin atap naka Ekedeke.

²² Enyami atap naka Ekedeke, nakalaunan noi, ka nakalaunan da kere.

²³Konye mam elomari neejai aigalisit, karaida aikunyakin otem, naarai eŋwalit; kinyek aitisil aiboisioka nukalaunak: naarai arai eoŋ EJAKAIT loetalauni kes.”

²⁴Abu Musa kolimok Aaron ŋun, ka odweke, ka idwe kere luka Isirael.