Read Ebaibuli 1961 Ilebin 25 Bible Online

Ilebin 25 - Ebaibuli 1961 bible

Ilebin 25

¹ Kotema EJAKAIT Musa komoru Sinai atiar,

² “Kolimok idwe luka Isirael ebe, Kidoloto yesi akwap nakainakini yes, ŋes konyet idaria akwap asabato mama ejai EJAKAIT.

³Iyei emanikorikon ikar ikanykape, idimi amanakon naka emusabibu ikar ikanykape, itukonokini araitoke.

⁴Konye okaru lokikanyetekaarei ejaun asabato naka aibworar nakayamakina naka akwap, asabato mama ejai EJAKAIT: mam iyei emanikorikon, karaida aidim amanakon naka emusabibu.

⁵ Mam isaki nuebwaŋunete bon, mam itukonokini araito nuka emusabibukon lomam ecapap: eraun ekaru loka aibworar nakayamakina naka akwap.

⁶Eraun asabato naka akwap inyamat kamakus; kamakon, ka ekejaanakinanikon, ka akejaanakinanikon, ka ebulesitikon loiwotei, ka imoitikon yeniboie kamakon;

⁷Kama ibarenekon, ka itiaŋ luejiaas akwapukon, amioke kere eraun inyamat.

⁸“Imari ijo asabaton akanykaarei nuka ikar, kes ikar ikanykaarei irwan ikanykaarei; eraunos kamakon apaarasia nuka asabaton akanykaarei nuka ikar, kes ikar akaisaoŋon ka lukanykaoŋon.

⁹ Kosodi akutakin arupepe naeruo noi kapaaran nakitomonet naka elap lokikanyetekaarei; ikutakini arupepe kapaaran naka ailuc airimor akwapukus kere.

¹⁰ Italaunete ekaru lokakaisakany, ilimorete da aosikinio airimor akwap mama ejaas luiboiete kotoma kere: eraun eyubili [13] kamakus; inyakakinete ŋinituŋanan alupoke, inyakarete da ŋinituŋanan okekike.

¹¹Eraun ekaru ŋol lokakaisakany eyubili kamakus: mam iyeete, karaida aisak nuebwaŋunete bon, karaida atukonokin araito nuka emusabibuke lomam ecapap.

¹²Naarai erai eyubili; eraun lokalaunan kamakus: inyamete amioke nakotoma omanikor.

¹³ “Kokaru kaŋol loka eyubili inyakakinete ŋinituŋanan alupoke.

¹⁴ Arai itwegeli ibore iidunyetekon, arai agwel kakan naka iidunyetekon, sirikiswamanakinos aronis.

¹⁵Kwape ejaar etiai loka ikar luetupakinete eyubili igweli kaidunyetekon, kwape ejaar etiai loka ikar luka aisak kitwegeli ŋesi jo.

¹⁶Kwape ejaar aipues naka ikar iyatakini ijo apesanake, kwape ejaar aikidiokus naka ikar iŋoŋoori ijo apesanake, kitwegeli ŋesi jo kwape ejaar etiai loka ikar luka aisak.

¹⁷ Sirikiswamanakinos aronis; konye koyoŋ Ekonideke, naarai arai eoŋ EJAKAIT Ekusideke.

¹⁸ “Kanuka ŋun kitodoloto ikakisila, koricito itubesiaka kiswamata; kiboiete kakwap inapakina.

¹⁹Erai akwap araitoke, kimonikinos, kiboikinos inapakina.

²⁰ Arai itemarete ebe, “Kinyami inyo kokaru lokikanyetekaarei? Koany, mam kiyei, karaida atukonokin amiokosi:”

²¹ Kasodi aicorakin arereŋuka mamakus kokaru lokikanyetekape, erai araito nuka ikar ŋul luuni.

²² Iyeete okaru lokikanyetekauni, inyamete araito, nuŋorok nueŋadakinitai; inyamete nuŋorok nueŋadakinitai aitodol okaru lokikanyetekaoŋon, aitodol naelomunia araitoke.

²³ Mam egwelario alup ayaŋaar ikar kere; naarai erai akwap nakaŋ: naarai iraas yesi ipejok ido luiboiororos kamakaŋ.

²⁴Kakwap kere naka airumetekus isunupete akwap alakunio.

²⁵ “Arai icana onacekon, kogwela alupoke ace, kosodi ekalakunanike abunore, elakuni ŋun nuagwelarit onaceke.

²⁶Arai emamei ituŋanan yenelakuni, kebar ŋesi kodum luedaunete alakun:

²⁷ŋes konyet imaria ikar luagwelaritor, kinyakak ameda mama ejai ituŋanan loagwelit; eboŋori ŋesi alupoke.

²⁸Konye arai mam epedori ainyakun kanuke, kosodi nuagwelarit apaikin akan naka ŋol kaloagwelit aitodol okaru loka eyubili: kosodi koyubili eosikinio, eboŋori. Ŋesi da alupoke.

²⁹“Arai kegwela etuŋanan etogo kore loirigaunitai karwatat, epedori alakun ŋes eriŋa etuboro ekaru ediopet ageun kagwelarike: ekaru ediopet ejai apedor alakun.

³⁰Arai mam elakunitai eriŋa etuboro ekaru ediopet, kosodi etogo loejai ore loirigaunitai karwatat itogogoŋitai ŋol loagweli ikar kere anatar aturioke: mam eosikinio koyubili.

³¹Konye itogoi lukoreria lumam irigaunitai karwatat imarakinitai kimanikoria lukorony: epedorio alakun, eosikinio koyubili.

³² Konye ireria luka Ilebin, itogoi lukoreria luka alupokec, epedorete Ilebin alakun apak kere.

³³Arai elakuni ediopet koLebin, kosodi etogo loagwelaritai, ka ere loka alupoke eosikinio koyubili: naarai itogoi lukoreria luka Ilebin eraas alupokec kodwe luka Isirael.

³⁴ Konye emanikor loka ironyia lukoreriakec mam epedorio agwelar; naarai erai alupokec ikar kere.

³⁵ “Arai icana onacekon, kokurwok akanike kamakon; ibus ijo aigaŋ ŋes; iboie kamakon kwape emoit ka ekeboiororon.

³⁶ Sirikiyaŋa ameda kaneejai ŋesi karaida luiyatakina; konye koyoŋ Ekonideke; tetere iboie onacekon kamakon.

³⁷ Sirikiinak ŋes apesanakon adumun ameda, karaida ainakin ŋes inyamatakon adumun luiyatakina.

³⁸Arai eoŋ EJAKAIT Ekusideke, loketolomuni yes kakwap nako Misiri, ainakin yes akwap nako Kanaan, araun Ekusideke.

³⁹ “Arai icana onacekon kamakon, kogwelari bon mamakon; siritubuleseni ŋes aijaanakin jo:

⁴⁰Eraun kamakon kwape ebulesit loiwotei, kwape ekeboiororon; ijaanakini jo aitodol okaru loka eyubili;

⁴¹ŋes konyet eosikinor ŋesi kamakon ka ikedwe kaŋes, eboŋori okekike, eboŋori da alup nuka lukapapake.

⁴² Naarai eraas ikakejaanakinak luabu ketolom kakwap nako Misiri: mam egwelario kwape ibulesin.

⁴³ Mam iyait ŋes kagogoŋ; konye koyoŋitenenei Ekonideke.

⁴⁴Ido ibulesinikon ka abulesinikon luijaunete kajo; igwelete ibulesin ka abulesin katekerin nukirimoritos yes.

⁴⁵Bobo da igwelete kodwe luka imo luiboiororete kamakus, kokekiakec luejaas kamakus, luaurikis kesi akwapukus: eraunos airumetekus.

⁴⁶Itaraunete yesi kes airumet naka idwekus lukitupanakinete, aitiŋ araun airumet; iyaŋaarete ibulesinikus kamakec ikar kere: konye siriyaito iinacanakus idwe luka Isirael idiopet ayait yenice kagogoŋ.

⁴⁷“Arai kebar emoit arai ekeboiororon kamakon, onacekon da icana eapie kaŋes, kogwelari bon mama ejai emoit ekeboiororon kamakon, arai mama ejai ateker naka ekek loka emoit:

⁴⁸Kedau agwelario epedorio alakun; epedori ediopet koinacanake alakun ŋes:

⁴⁹Epedori onace loka ikauriakake, arai okoku loka onace loka ikauriakake alakun ŋes, arai ŋolituŋanan loipajanas kaŋes epedori alakun ŋes; arai kebar elopet epedori alakun bon.

⁵⁰Imarakini ŋol loagwelit ŋes ageun kokaru loagwelaritor mama ejai kiton okaru loka eyubili: ejaun etiai loka agwelarike kwape eaar etiai loka ikar; kwape ejaar etiai loka ikar luka ebulesit loiwotei ejaun kaŋes.

⁵¹Arai eroko esalito ikar luipu, kwape ejaatar kesi inyakakini etiai loka alakunike kapesan nuagwelunere.

⁵²Arai esalito ikar luikidioko kiton okaru loka eyubili, kosodi aimarakin ŋes; kwape ejaatar ikaruke inyakakini etiai loka alakunike.

⁵³Kwape ebulesit loiwotei ŋolikaru ejaun kaŋes; mam eyait ŋes kagogoŋ kakonyenekon.

⁵⁴Arai mam elakunio kaŋul, eosikinio ŋes kokaru loka eyubili, ka ikedwe kaŋes.

⁵⁵Naarai eraas idwe luka Isirael ikejaanakinak kamaka: eraas ikakejaanakinak luabu ketolom kakwap nako Misiri arai eoŋ EJAKAIT Ekusideke.