Read Ebaibuli 1961 Ilebin 3 Bible Online

Ilebin 3 - Ebaibuli 1961 bible

Ilebin 3

¹ Arai erai ainakineteke asubanit naka ainakineta nuka ainapakin; arai einakini kotoma osipan loka aituk, arai yenikiliokit arai yeniberu, einakini yenimam eŋwalit kakonyen nuka EJAKAIT.

² Idokokini akanike akou naka ainakineteke, earakini ŋes okek loka ewema loka airiamunun: ebwatanakinete odwe luka Aaron lusasedotin aokot owaitin luka etem.

³Einakini nuka asubanit naka ainakineta nuka ainapakin ainakinet naeinakinere kakim mama ejai EJAKAIT: asiepai naerapit lukotoma, ka asiepai kere naejai toma.

⁴Ka iŋalur luarei ka asiepaikec naeapias kaŋabet, ka asiepai naka emany nepepe kaiŋalur, ŋul kere elemari.

⁵ Icweikinete odwe luka Aaron kotem neejai ainakinet naicweio, naejai akito nuejaas akim: ŋes ainakinet naeinakinere kakim, naka asakat naeuru saa mama ejai EJAKAIT.

⁶ Arai erai ainakineteke naka asubanit naka ainakineta nuka ainapakin mama ejai EJAKAIT kosipan loka amerekekin; yenikiliokit arai yeniberu, einakini yenimam eŋwalit.

⁷Arai einakini imerekek araun ainakineteke, einakini ŋes kakonyen nuka EJAKAIT:

⁸Idokokini akanike akou naka ainakineteke, earakini kiŋaren kewema loka airiamunun: ebwatanakinete odwe luka Aaron aokotoke owaitin luka etem.

⁹Einakini nuka asubanit naka ainakineta nuka ainapakin ainakinet naeinakinere kakim mama ejai EJAKAIT: asiepaike, asonyok kere etubuni kariri naka aŋabet; ka asiepai naerapit lukotoma, ka asiepai kere naejai toma.

¹⁰Ka iŋalur luarei ka asiepaikec naeapias kaŋabet, ka asiepai naka emany nepepe kaiŋalur, ŋul kere elemari.

¹¹ Icweikini esasedoti kes kotem: eraas inyamat luka ainakinet naeinakinere kakim mama ejai EJAKAIT.

¹²Arai erai ainakineteke akinei, einakini kakonyen nuka EJAKAIT.

¹³Idokokini akanike akouke, earakini ŋes kiŋaren kewema loka airiamunun: ebwatanakinete odwe luka Aaron aokotoke owaitin luka etem.

¹⁴Einakini nuka ainakineteke, ainakinet naeinakinere kakim mama ejai EJAKAIT: asiepai naerapit lukotoma, ka asiepai kere naejai toma.

¹⁵Ka iŋalur luarei, ka asiepaikec naeapias kaŋabet, ka asiepai naka emany nepepe kaiŋalur, ŋul kere elemari.

¹⁶ Icweikini esasedoti kes kotem: eraas inyamat luka ainakinet naeinakinere kakim, naka asakat naeuru saa; asiepai kere erai naka EJAKAIT.

¹⁷ Eraun ekisil lomam edaun anatar aturiokus kaiboisiokus kere, ebe mam inyamenenete asiepai karaida aokot.