Read Ebaibuli 1961 Ilebin 4 Bible Online

Ilebin 4 - Ebaibuli 1961 bible

Ilebin 4

¹Kotema EJAKAIT Musa atiar,

² “Kolimok idwe luka Isirael ebe, Arai kediaka ituŋanan komam ejeni, kakirot kere naecorakinit EJAKAIT ebe mam iswamao, kiswama adiopet kakesi:

³ Arai kediaka esasedoti loinyonyoikinitai akinyet ayaŋaun abili mama ejaas ituŋa; koinak do ŋesi kanuka adiakareteke naabu kodiaka, emoŋ lotobait lomam eŋwalit mama ejai EJAKAIT araun ainakinet naka adiakaret;

⁴Eyauni emoŋ lotobait okek loka ewema loka airiamunun kakonyen nuka EJAKAIT; idokokini akanike akou naka emoŋ lotobait, earakini emoŋ lotobait akonyen nuka EJAKAIT.

⁵ Kosodi esasedoti loinyonyoikinitai akinyet alemun aceokot nuka emoŋ lotobait, eyaŋauni owema loka airiamunun:

⁶ Idomakini esasedoti ebokoritike toma aokot, ebwatanari aokot irwan akanykaarei kakonyen nuka EJAKAIT koiŋaren kaigalisit naka aibois nakalaunan.

⁷ Ejukonokini esasedoti aokot amumwara nuka etem loka lukisupurununo loejai owema loka airiamunun kakonyen nuka EJAKAIT: ebukokini aokot kere nuka emoŋ lotobait kwap ketem loka ainakineta nuicweio, loejai okek loka ewema loka airiamunun.

⁸Elemari ŋesi asiepai kere naka emoŋ lotobait loka ainakinet naka adiakaret; asiepai naerapit lukotoma ka asiepai kere naejai toma.

⁹Ka iŋalur luarei, ka asiepaikec naeapias kaŋabet, ka asiepai naka emany, nepepe kaiŋalur, ŋul kere elemari.

¹⁰Kwape elemaria komoŋ loka asubanit naka ainakineta nuka ainapakin: icweikini esasedoti kes kotem loka ainakineta nuicweio.

¹¹ Emukule loka emoŋ lotobait, ka akiriŋike kere, nepepe kakouke, ka akejeke, ka lukotomake, ka ikijitike.

¹² Emoŋ lotobait kere edakari kiŋa kiidukurun aibois naelai, neebukonokinio ekurwon, kicwe ŋes kakim kakito: neebukonokinio ekurwon, nepenen icweere.

¹³ “Arai kibuca ekodet kere loka Isirael, kibwaa da akirot kakonye nuka atukot, kiswamata akirot kere naecorakinit EJAKAIT ebe mam iswamao, egwaunete akiro:

¹⁴Naejenunor adiakaret naapotu kodiakasi, einakini atukot emoŋ lotobait araun ainakinet naka adiakaret, koyau kiŋaren kewema loka airiamunun.

¹⁵ Idokokinete imakio luka ekodet akaninikec akou naka emoŋ lotobait kakonyen nuka EJAKAIT: earakinio emoŋ lotobait akonyen nuka EJAKAIT.

¹⁶ Koyaŋau esasedoti loinyonyoikinitai akinyet aokot nuka emoŋ lotobait owema loka airiamunun.

¹⁷Idomakini esasedoti ebokoritike toma aokot, ebwatanari irwan akanykaarei kakonyen nuka EJAKAIT koiŋaren kaigalisit.

¹⁸Ejukonokini da aokot amumwara nuka etem loejai kakonyen nuka EJAKAIT, loejai owema loka airiamunun, ebukokini aokot kere kwap ketem loka ainakineta nuicweio loejai okek loka ewema loka airiamunun.

¹⁹Elemari ŋesi asiepaike kere, kicweik kotem.

²⁰ Iswamakini ŋesi emoŋ lotobait kwaŋin; kwape eswamakinia emoŋ lotobait loka ainakinet naka adiakaret, iswamakini lo kwaŋin: ituluci esasedoti kes, isionio kes.

²¹Edakari emoŋ lotobait kiŋa kiidukurun, kicwe ŋes kwape ecweia emoŋ lotobait losodit; ŋes ainakinet naka adiakaret naka atukot.

²² “Arai kediaka ekapolokiton, kiswama komam ejeni adiopet kakiro kere nuecorakinit EJAKAIT Ekedeke ebe mam iswamao, egwauni akirot;

²³Arai kitejenun akediakaret naadiakaa ŋesi, eyauni ekoroi lomam eŋwalit araun ainakineteke.

²⁴Idokokini akekan akou naka ekoroi, earakini aibois nearanakinio ainakinet naicweio kakonyen nuka EJAKAIT: ŋes ainakinet naka adiakaret.

²⁵Elemari esasedoti aokot nuka ainakinet naka adiakaret kebokoritike, ejukonokini amumwara nuka etem loka ainakineta nuicweio, ebukokini aokotoke kwap ketem loka ainakineta nuicweio.

²⁶ Icwei asiepaike kere kotem, kwape kasiepai naka asubanit naka ainakineta nuka ainapakin: ituluci esasedoti ŋes kanuka adiakareteke, isionio ŋes.

²⁷ “Arai da kediaka ituŋanan kere kotuŋa luka akwap komam ejeni, kiswama akirot kere naecorakinit EJAKAIT ebe mam iswamao, egwauni akirot;

²⁸Arai kitejenun akediakaret naadiakaa ŋesi, ŋes konyet eyaunia akinei naberu namam eŋwalit, araun ainakineteke kanuka akediakaret naabu kodiaka.

²⁹ Idokokini akanike akou naka ainakinet naka adiakaret, earakini ainakinet naka adiakaret aibois naka ainakinet naicweio.

³⁰Elemari esasedoti aokotoke kebokoritike, ejukonokini amumwara nuka etem loka ainakineta nuicweio, ebukokini aokotoke kere kwap ketem.

³¹ Elemari da asiepaike kere, kwape elemaria asiepai naka asubanit naka ainakineta nuka ainapakin; icwei esasedoti ŋes kotem araun asakat naeuru saa mama ejai EJAKAIT: ituluci esasedoti ŋes, isionio ŋes.

³² “Arai keyau ŋesi imerekek araun ainakineteke naka adiakaret, eyauni yeniberu yenimam eŋwalit.

³³Idokokini akanike akou naka ainakinet naka adiakaret, eari ŋes araun ainakinet naka adiakaret kaibois nearanakinio ainakinet naicweio.

³⁴Elemari esasedoti aokot nuka ainakinet naka adiakaret kebokoritike, ejukonokini amumwara nuka etem loka ainakineta nuicweio, ebukokini aokotoke kere kwap ketem:

³⁵ Elemari da asiepaike kere, kwape elemaria asiepai naka imerekek yenika asubanit naka ainakineta nuka ainapakin; icwei esasedoti ŋes kotem, kopone loka ainakineta nuka EJAKAIT nueinakinere kakim: ituluci esasedoti ŋes kanuka adiakareteke naabu kodiaka, isionio ŋes.