Read Ebaibuli 1961 Ilebin 5 Bible Online

Ilebin 5 - Ebaibuli 1961 bible

Ilebin 5

¹ “Arai kediaka ituŋanan kanu akiirar eporoto loka aiyapo, korai ekajenan, arai abu koany arai abu kojen, arai mam elimori, aso ibwoki numam adoliteke:

² Arai ketiro ituŋanan ibore yenimam elai, akuan nakatwan naka etiaŋ lomam elai, arai akuan nakatwan naka ibaren lumam elaete, arai akuan nakatwan naka iboro lueliatos lumam elaete, komam ejeni, koraun yenimam elai, aso egwauni akirot.

³ Arai ketiro yenimam elai yenika ituŋanan, yenimam elai kere kere, yenituluori ŋes yenimam elai, komam ejeni; nakejenun, egwauni akirot.

⁴ Arai kisud ituŋanan aiyapo kaŋajepeke aswam aronis, arai aswam ajokis, ŋin naesudi ituŋanan einer kaiyaposit, komam ejeni; nakejenun, egwauni adiopet kaŋun:

⁵ Kosodi naegwaunia adiopet kaŋun, elimori do ŋesi akirot ŋin naabu kodiaka:

⁶Eyauni ainakineteke naka aronis mama ejai EJAKAIT kanuka adiakareteke naabu kodiaka, yeniberu yenikosipan, imerekek arai akalol, araun ainakinet naka adiakaret; ituluci esasedoti ŋes kanuka adiakareteke.

⁷ “Arai icana ŋesi, mam epedori adumun imerekek, eyauni do ajeleik aarei arai ilukei iarei ludidik mama ejai EJAKAIT araun ainakineteke naka aronis, kanuka ŋin naabu kodiaka; idiopet araun ainakinet naka adiakaret, yenice da araun ainakinet naicweio.

⁸Eyauni kes mama ejai esasedoti, loisiauni ainakin ŋin yenika ainakinet naka adiakaret, emojirikini aŋedar akou komurisiŋike, konye mam etubutubei:

⁹Ebwatanakini aokot nuka ainakinet naka adiakaret owai loka etem; eitanakini aokot ace kere kwap ketem: ŋes ainakinet naka adiakaret.

¹⁰ Einakini yenikiareit araun ainakinet naicweio, kwape ejaar ekisil: ituluci esasedoti ŋes kanuka adiakareteke naabu kodiaka, isionio ŋes.

¹¹ “Konye arai icana ŋesi, mam epedori adumun ajeleik aarei karaida ilukei iarei ludidik, ŋes konyet eyaunia ainakineteke kanuka ŋin naabu kodiaka, idiopet kotomon yenika epa [1] loka akiria nuidicic araun ainakinet naka adiakaret; mam ebukokini akinyet, karaida aibwaikin lueuru maa; naarai ŋes ainakinet naka adiakaret.

¹² Eyauni ŋes mama ejai esasedoti, emuduni esasedoti akan ileleba araun aiituneteke, kicwe kotem, kopone loka ainakineta nuka EJAKAIT nueinakinere kakim: ŋes ainakinet naka adiakaret.

¹³Ituluci esasedoti ŋes kanuka adiakareteke naabu kodiaka kadiokirot kaŋun, isionio ŋes: nuideunos eraunos nuka esasedoti, kwape ainakinet naka akiria.”

¹⁴Kotema EJAKAIT Musa atiar,

¹⁵ “Arai kibuca ituŋanan aidiak komam ejeni, kakiro nukalaunak nuka EJAKAIT: eyauni do ainakineteke naka aronis mama ejai EJAKAIT, emerekek lomam eŋwalit kosipan, kwape itubokinia ijo epuesa kosekelin, kwape ejaar esekel[2] loka aibois nakalaunan, araun ainakinet naka aronis:

¹⁶ Egeli ŋesi ŋin naabu kiswama erono kakirot nakalaunan, iyatakini idiopet kokany, einakini esasedoti: ituluci esasedoti ŋes kemerekek loka ainakinet naka aronis, isionio ŋes.

¹⁷ “Arai kediaka ituŋanan, aswam akirot kere naecorakinit EJAKAIT ebe mam iswamao; karaida kemam ejeni, konye egwauni akirot, ibwoki numam adoliteke.

¹⁸Eyauni ŋesi emerekek lomam eŋwalit kosipan, kwape itubokinia ijo, mama ejai esasedoti araun ainakinet naka aronis: ituluci esasedoti ŋes kanuka ŋin naabu kibuc komam ejeni, isionio ŋes.

¹⁹ Ŋes ainakinet naka aronis: abeit egwaunit akirot kakonyen nuka EJAKAIT.”