Read Ebaibuli 1961 Ilebin 7 Bible Online

Ilebin 7 - Ebaibuli 1961 bible

Ilebin 7

¹ “Lo ŋes ekisil loka ainakinet naka aronis: erai nakalaunan noi.

² Earakinete ainakinet naka aronis kaibois nearanakinete ainakinet naicweio: ibwatanakini aokotoke owaitin luka etem.

³ Ijaikini ŋesi asiepaike kere; asonyok, ka asiepai naerapit lukotoma.

⁴Ka iŋalur luarei, ka asiepaikec, naeapias kaŋabet, ka asiepai naka emany, nepepe kaiŋalur, ŋul kere elemari:

⁵ Icweikini esasedoti kes kotem araun ainakinet naeinakinere kakim mama ejai EJAKAIT: erai ainakinet naka aronis.

⁶ Enyami ŋolikiliokit kosasedotin: enyamakini aibois nakalaunan: erai nakalaunan noi.

⁷ Kwape ejaar ainakinet naka adiakaret, ainakinet naka aronis ejai kwape kwaŋin: ejai ekisil ediopet kanukec kere: esasedoti loituluci, ŋes eyaŋaari.

⁸Esasedoti da loijaikini ainakinet naicweio naka ituŋanan kere, eyaŋaari esasedoti ŋol emukule loka ainakinet naicweio naabu kijaik.

⁹ Ŋiniinakinet naka akiria nupeon kokiala, ka ŋin kere naitemokinitoi kibore yenikiwowas, arai kotoma akeit da, eyaŋaari esasedoti loabu kijaik.

¹⁰Ŋiniinakinet naka akiria, nainyalakinitai akinyet, arai naeonit, eyaŋaarete odwe kere luka Aaron, kitirianito.

¹¹ “Lo ŋes ekisil loka asubanit naka ainakineta nuka ainapakin, nueinakini ituŋanan mama ejai EJAKAIT.

¹² Arai einakini kanuka aimal, einakini asubanit naka aimal aluŋuren numam itubuunitoi nuinyalakinitai akinyet, ka imugatin luebenen lumam itubuunitoi luinyonyoikinitai akinyet, ka aluŋuren nuinyalakinitai akinyet, nuka akiria nuidicic nuebaunito.

¹³ Einakini ainakineteke naka aluŋuren nuka imugatin lumam itubuunitoi nepepe kasubanit naka ainakinetake nuka ainapakin kanuka aimal.

¹⁴ Einakini kotomake adiopet kaŋiniinakinet araun ainakinet naedakakinitai mama ejai EJAKAIT: eyaŋaari esasedoti loebwatanari aokot nuka ainakineta nuka ainapakin;

¹⁵ Enyamenenoo akiriŋ naka asubanit naka ainakinetake nuka ainapakin kanuka aimal kapaaran naeinakinere; mam iteperori kiton tupuruc;

¹⁶ Konye arai erai asubanit naka ainakineteke aiyaposit, arai ainakinet naka akote, enyamenenoo kapaaran naeinakinia asubanitike: enyamenenoo naeperorit tupuruc:

¹⁷Konye icweio kakim akiriŋ naeperorit naka asubanit kapaaran kanakiwuniet;

¹⁸ Arai enyamio adiokiriŋ naka asubanit naka ainakinetake nuka ainapakin kapaaran kanakiwuniet, mam ecamunio, karaida aimarakinio ŋes loabu koinak: eraun naketal, ibwoki da ituŋanan yenenyami ŋes numam adoliteke.

¹⁹“Mam enyamenenoo akiriŋ naetirori ibore yenimam elai; icweio kakim. Konye enyami ŋinituŋanan yenelai akiriŋ naelai:

²⁰ Konye ituŋanan yenenyami akiriŋ naka asubanit naka ainakineta nuka ainapakin, naerai naka EJAKAIT, korai yenimam elai, egelario ituŋanan ŋin kotuŋake.

²¹ Naetiroria ituŋanan kere ibore yenimam elai, amamus kaila naka ituŋanan, arai itiaŋ yenimam elai, arai yeniketal kere yenimam elai, konyam da akiriŋ naka asubanit naka ainakineta nuka ainapakin, naerai naka EJAKAIT, egelario ituŋanan ŋin kotuŋake.”

²²Kotema EJAKAIT Musa atiar,

²³ “Kolimok idwe luka Isirael ebe, Sirinyamenenete asiepai, naka emoŋ, arai naka amerekek, arai naka akinei.

²⁴Ipedorete aitwasam asiepai naka yenetwani bon kanuke, ka asiepai naka yenepoopoete itiaŋ kanuka akirot ace kere: konye mam cut inyamete.

²⁵Naarai ŋin yenenyami asiepai naka itiaŋ, yeneinakinete ituŋa araun ainakinet naeinakinere kakim mama ejai EJAKAIT, egelario ituŋanan ŋin yenenyami kotuŋake;

²⁶ Sirinyamenenete aokot nuka iponesio kere, arai nuka akweny, arai nuka itiaŋ, kaiboisiokus kere.

²⁷Ŋinituŋanan yenenyami aokot, egelario ituŋanan ŋin kotuŋake.”

²⁸Kotema EJAKAIT Musa atiar,

²⁹ “Kolimok idwe luka Isirael ebe, Ituŋanan yeneinakini asubanit naka ainakinetake nuka ainapakin mama ejai EJAKAIT eyauni ainakineteke mama ejai EJAKAIT kotoma asubanit naka ainakinetake nuka ainapakin:

³⁰ Eyaunete akekanin kilopet ainakineta nuka EJAKAIT nueinakinere kakim; eyauni asiepai ka atorob, tetere ijaŋio atorob araun ainakinet naijaŋio kakonyen nuka EJAKAIT;

³¹ Icweikini esasedoti asiepai kotem: konye eyaŋaari Aaron ka odweke atorob.

³² Iinakinete yesi esasedoti amurwo nakoteten araun ainakinet naedakakinitai kotoma asuban nuka ainakinetakus nuka ainapakin.

³³Ŋoloijaikini aokot nuka ainakineta nuka ainapakin, ka asiepai kodwe luka Aaron, eyaŋaari ŋesi amurwo nakoteten araun ewaike;

³⁴ Naarai alema eoŋ atorob naijaŋio ka amurwo naedakakinitai kodwe luka Isirael kotoma asuban nuka ainakinetakec nuka ainapakin, ainak da Aaron esasedoti ka odweke airumetekec naitebeikinitai ikar kere kodwe luka Isirael.

³⁵Ŋol ŋes ewai loka Aaron lokainyonyoikinio akinyet, ka ewai loka odweke lokainyonyoikinio akinyet, loelemunio kainakineta nuka EJAKAIT nueinakinere kakim, kapaaran naitodiaria kes aijaanakin EJAKAIT kosasedotene;

³⁶ Loecoraki EJAKAIT idwe luka Isirael ainanakin kes, kapaaran nainyonyoikinia kes. Erai airumetekec naitebeikinitai ikar kere anatar aturiokec.”

³⁷ Ŋol ŋes ekisil loka ainakinet naicweio, ka loka ainakinet naka akiria, ka loka ainakinet naka adiakaret, ka loka ainakinet naka aronis, ka loka atiakunio, ka loka asubanit da naka ainakineta nuka ainapakin;

³⁸Loecorakini EJAKAIT Musa komoru Sinai, kapaaran naecorakinia idwe luka Isirael ainakin ainakinetakec mama ejai EJAKAIT, kamodiŋ naka Sinai.