Read Ebaibuli 1961 Ilebin 8 Bible Online

Ilebin 8 - Ebaibuli 1961 bible

Ilebin 8

¹Kotema EJAKAIT Musa atiar,

² “Koyaŋa Aaron ka odweke nepepe kaŋes, ka inapen, ka akinyet nakinyonyoanakina, ka emoŋ lotobait loka ainakinet naka adiakaret, ka imerekekin iarei, ka edita loka imugatin lumam itubuunitoi;

³Kotukok ijo ekodet kere okek loka ewema loka airiamunun.”

⁴Kiswama Musa kwape kicorakinia EJAKAIT; kotukokin ekodet okek loka ewema loka airiamunun.

⁵Kotema Musa ekodet atiar, “Na ŋes akirot naecoraki EJAKAIT aswam.”

⁶ Koyau Musa Aaron ka odweke, kiloŋ kes kakip.

⁷ Kitanap ŋes ekooti, koen aŋabeteke kaenet, kitanap ekaso, kitanap da epod, koen ŋes kaenet naka epod naecipitai kapirianut, kiketak kaŋin.

⁸ Kidokok yenikatorob tomake: kibwaik Urim ka Tumim [4] toma yenikatorob.

⁹ Kitanap egoe lokieniena akou; ido toma ogoe lokieniena akou koiŋaren, kibwaik amekemeket naka esabu, aboko nakalaunan; kwape kicorakinia EJAKAIT Musa.

¹⁰ Kitiŋ Musa akinyet nakinyonyoanakina, kinyonyoik ewema lokalaunan ka luejaas toma kere, kitalau kes;

¹¹Kobwatanak otem irwan akanykaarei, kinyonyoik etem ka iboroke kere, ka akalaya ka aigaŋeteke aitalaunia kes.

¹² Kobukok akinyet nakinyonyoanakina akou naka Aaron, kinyonyoik ŋes, aitalaunia ŋes;

¹³ Koyau Musa odwe luka Aaron, kitanap kes ikootin, koen kes kaeneta, koen igoen lukieniena akwes; kwape kicorakinia EJAKAIT Musa.

¹⁴ Koyau emoŋ lotobait loka ainakinet naka adiakaret: kidokokis Aaron ka odweke akaninikec akou naka emoŋ lotobait loka ainakinet naka adiakaret.

¹⁵ Koar ŋes; kolem Musa aokot, kojukonok amumwara nuka etem owaitin kere kebokoritike, kitesega etem, kobukok aokot kwap ketem, kitalau ŋes, aitulucio ŋes;

¹⁶ Koyaŋa asiepai kere naerapit lukotoma, ka asiepai naka emany, ka iŋalur luarei, ka asiepaikec, kicwe Musa kes kotem.

¹⁷ Konye emoŋ lotobait, ka emukuleke, ka akiriŋike, ka ikijitike, kicweik kakim kokiŋa kiidukurun; kwape kicorakinia EJAKAIT Musa.

¹⁸ Koyau ŋesi emerekek loka ainakinet naicweio: kidokokis Aaron ka odweke akaninikec akou naka emerekek.

¹⁹Koar ŋes: kobwatanak Musa aokot otem owaitin kere.

²⁰Kotubutub emerekek; kicweik Musa akou, ka atutubeta ka asiepai.

²¹ Kilot lukotoma ka akejen kakip; kicweik Musa emerekek kere kotem: ŋes ainakinet naicweio araun asakat naeuru saa: ŋes ainakinet naeinakinere kakim mama ejai EJAKAIT: kwape kicorakinia EJAKAIT Musa.

²² Koyau ŋesi emerekek ece, emerekek loka atiakunio: kidokokis Aaron ka odweke akaninikec akou naka emerekek.

²³ Koar ŋes; kolem Musa aokotoke, kojukok okobet loka akit nakoteten naka Aaron, obokorotike lokapolon loka akekan nakoteten, obokorit da lokapolon loka akejuke nakoteten.

²⁴ Koyau odwe luka Aaron, kojukonok Musa aokot okoben luka akikec nukoteten, obokorokec lukapolok luka akaninikec nukoteten, obokorokec da lukapolok luka akejekec nukoteten: kobwatanak Musa aokot otem owaitin kere.

²⁵ Koyaŋa asiepai, ka asonyok, ka asiepai kere naerapit lukotoma, ka asiepai naka emany, ka iŋalur luarei, ka asiepaikec ka amurwo nakoteten:

²⁶ Kolem aluŋuret adiopet namam itubuunitoi, ka aluŋuret adiopet naka emugati loejai akinyet, ka emugati ediopet loebenen, kodita loka imugatin lumam itubuunitoi, loajai akonyen nuka EJAKAIT, kidokok asiepai ka amurwo nakoteten:

²⁷ Kibwaik kere akanin nuka Aaron, akanin da nuka odweke, kijaŋ kes araun ainakinet naijaŋio kakonyen nuka EJAKAIT.

²⁸ Kolema Musa kes akaninikec, kicweik kotem neajai ainakinet naicweio: araas lutiakuna luka asakat naeuru saa; ŋes ainakinet naeinakinere kakim mama ejai EJAKAIT.

²⁹ Kolem Musa atorob, kijaŋ araun ainakinet naijaŋio kakonyen nuka EJAKAIT: ŋes ewai loka Musa komerekek loka atiakunio; kwape kicorakinia EJAKAIT Musa.

³⁰ Kolem Musa akinyet nakinyonyoanakina, ka aokot nuajaas otem, kobwatanak Aaron, ka onapeneke, ka odweke, ka onapen da luka odweke; kitalaunia Aaron, ka ikenapen, ka odweke, ka inapen luka odweke nepepe kaŋes.

³¹ Kotema Musa Aaron ka odweke atiar, “Kipooto akiriŋ kokek loka ewema loka airiamunun; konyamakis nepenen, ka imugatin luejaas odita loka atiakunio, kwape ecorakinia ebe, ‘Enyamete Aaron ka odweke.’

³² Icweikinete kakim akiriŋ naideun ka imugatin.

³³ Mam ilomarete kiŋa kekek loka ewema loka airiamunun adaun apaarasia akanykaarei aitodol naitodolioto apaarasia nuka atiakuniokus: naarai kitiakuni ŋesi yes apaarasia akanykaarei.

³⁴ Kwape eswamaere lolo, kicorak EJAKAIT aswam kwaŋin, aitulucio yes.

³⁵ Iboienenete kokek loka ewema loka airiamunun paaran ka kuare apaarasia akanykaarei, idarete akirot naka EJAKAIT, kinyeis atwakare; naarai kecorakinitai eoŋ kwaŋin.”

³⁶Kiswamata Aaron ka odweke akiro kere nuecorakini EJAKAIT kama ka Musa.