Read Ebaibuli 1961 Yeremia 10 Bible Online

Yeremia 10 - Ebaibuli 1961 bible

Yeremia 10

¹Wu ekek loka Isirael, kopuput akirot nakitemari EJAKAIT yes.

² Ebala EJAKAIT kwanata ebe: “Sirikisisiaut erot loka atekerin, Sirikiburununut kanuka aanyuneta nuka akuj; Naarai eburunito atekerin kanukec.

³Naarai iponesio luka ituŋa eraas aamameak: Naarai ejepep ekitoi kamagoro, Aswam naka akanin nuka ekeswaman kaep.

⁴Isirete kesi ŋes kepuesa, ka esabu; Iketakinete kaseito ka anyulia, Tetere mam ilokulokun.

⁵ Esubito bala ipirin luikeitoi, mam inerasi: Ibusakinit adakio, naarai mam epedorete alosit, Sirikuriaka kes; Naarai mam epedorete aswam aronis, Ido emamei tomakec aswam nuejok.”

⁶ Emamei yenerianas kajo, wu EJAKAIT; Ipol ijo, epol da ekonikiror kotoma apedor.

⁷ Iŋai ca ma mam ti kiyoŋ jo, wu Ekabaka loka atekerin? Naarai kibusakinit: Naarai kotoma lukacoa kere luka atekerin Ido kotoma ajakanutokec kere, Emamei cut yenerianas kajo.

⁸Konye eraas kwape itiaŋ ido ebaŋabaŋato; Aisisianakin aputosia, erai ekomio atai.

⁹ Ejai epuesa loerukuk loeyaunitai ko Tarusis, Ka esabu loeyaunitai koupas, Aswam naka ekeswaman, ka akanin nuka ekatatan esabu; Enapitos igoen lubululu ka lumugeik; Eraas kere aswam naka ituŋa luepiriaka.

¹⁰ Konye EJAKAIT ŋes Edeke lokabeit; Erai ŋesi Edeke lokajaran, ekabaka lomam edaun: Akenyunyura da isimarani akwap, Mam epedorete atekerin atitiŋikin akeisiop.

¹¹Ilimokini kes kwanata ebe, “Idekesio lumam kesubete akuj ka akwap, eoliorete kakwap, ido kokwap kakuj.”

¹² Kanuka apedorike abu kosub alup, Kanuka acoake abu kiticat akwap, Kanuka aijeneke abu kopesik akuj.

¹³Naikeseunia eporotoke, ejai airurum naka akipi toma akuj, Itonyouni elisina kosaŋeta luka akwap; Iswamakini akiru eimilia, Itolomuni da ekwam kaiŋadisiake.

¹⁴Erai ŋinituŋanan bala itiaŋ, emamei aijen; Aputoke naegerer isurumi ŋolikatatan esabu ileic: Naarai aputoke naecalara erai aiŋal, Emamei eiyeŋane kotomakec.

¹⁵Eraas aamameak, aswam naka aiŋal: Kapak naka aiticaniokec eoliorete.

¹⁶ Mam akorakinet naka Yakob eputosi kaŋun, Naarai erai ŋesi lokasuban iboro kere; Isirael da ŋes ateker naka airumeteke: EJAKAIT loka ajoresio ŋes ekekiror.

¹⁷Kotukonok iborokon kokwap, Ijo loiboie kore loirigaunitai.

¹⁸ Naarai ebala EJAKAIT kwanata ebe: “Koany, aporocari luiboiete kakwap kapak kana, Etuburuni kes, koriebakinos.”

¹⁹ Itukwi abei ai akapipil! Akamusuŋut kesiriebi noi. Konye kabala ebe, “Abeit ŋin ŋes akadek, Kebusakinit da atitiŋikin.”

²⁰Aŋatar ewemaka, aŋedas aunoika kere: Anyout idweka kamaka, ido emameete: Emamei yeneterari bobo ekawema, Asipokin aigalisioka.

²¹Naarai araut ikecokok itiaŋ, Kwabo mam apotu kiŋitata EJAKAIT: Kanuka ŋun ŋes mam kekeriakarotor; Esiarakinos isipaninikec kere.

²²Eporoto loka eemut! Koany ebuni, Autaar naepol naebuni kakwap naka agolitomei, Aitisilior ireria luka Yuda, Aitaraun aibois naka ikuwei.

²³ Wu EJAKAIT, ajeni ebe erot loka ituŋanan emamei kotomake ilopet: Emamei kotoma otuŋanan yenelosi aitetenar akekeje.

²⁴ Wu EJAKAIT, kolecoroi, konye kotube; Mere kakoninyunyura, kinyek aitidisiar.

²⁵ Kobukok anyunyurakon okapirin lumam kijenete, Atekerin da numam iwoneete ekonikiror; Naarai anyamasi Yakob; Eebo, anyamasi, adautu ŋes, etisilioto aiboisike.