Read Ebaibuli 1961 Yeremia 12 Bible Online

Yeremia 12 - Ebaibuli 1961 bible

Yeremia 12

¹ Idolit ijo, wu EJAKAIT, naaŋuriania kamakon: Konye akoto apurokin bon kamakon akiro: Kanukinyo ekerianaror erot loka ikaronok? Kanukinyo ijamamaata kere luiswamaenenete noi nuka aimod?

² Ibu kira kes, eebo, kidirata alias; Epoloete, eebo, eraete araito: Iapiei ijo kaitukekec, Ilwanikina da kaomisiokec.

³ Konye jo, wu EJAKAIT, kijeni eoŋ: Kiany eoŋ, igimori ekatau kamakon: Kiriu kes kwape amerekekin nuaarat, Kotiak kes kanuka apaaran naka earit.

⁴ Itodoli ai akwap aibworo, Akui da nuka akwap kere arinyor? Kanuka aronis naka ŋul kaluiboiete kotoma Ŋes edaunotor itiaŋ ka akweny; Naarai ebakai ebe, “Mam ŋes eanyuni esanewok lokokau.”

⁵ “Arai ibolito kituŋa luekerete kakeje, kitapasa jo, Ikwaikini ai ipedori abolobol kibalasin? Ido arai ilatara ijo kakwap naka ainapakin, Ikwaikini ca ai kaiturokina naka Yorodan?

⁶Naarai ikoniinacan, ka ekek loka papakon, Ŋupeŋul kiswamakinete nuka aimod; Ŋupeŋul kiluluoto jo: Sirikiyu kes, karaida kiinerakis jo akiro nukajokak.”

⁷“Ajal etogoka, acaka airumeteka; Ainak naemin ekatau noi akan naka lukasurupoke.

⁸ Arau airumeteka kamakaŋ kwape eŋatuny kamagoro; Ekeseu ekeporoto asurokin eoŋ; Ŋes alaia ŋes.

⁹Erai kereka airumeteka kamakaŋ kwape ekweny loeerepus loemejai? Irigaunete kereka ŋes ikweny luemeiaete asurokin? Koloto yesi, kotukonokis itiaŋ kere luka ais, Koyautu kes konyamasi.

¹⁰ Apotu ikecokok luipu komunaasi emanikorika loka emusabibu, Kipudapudata ewaika kakeje, Kitaraut ewaika loejok ais naesil.

¹¹ Etaraut asilio: Ibworo mama ajai naarai esil; Itisilioritai akwap kere, Naarai emamei ituŋanan yenibwaikinit etau.

¹²Adoloto ikaŋatak kuju neelapat toma ais: Naarai iŋinyari ekileŋ loka EJAKAIT ageun kosaŋe ediopet loka akwap kiton osaŋe ece loka akwap; Emamei akuan nainapakina.

¹³ Apotu koyeata akima, konye kosakata ikukwa; Itapasitos atai, mam imedaunete: Kisurumito araitokus yes ileic, Kanuka anyunyura naededeŋ naka EJAKAIT.”

¹⁴ Ebala kwanata EJAKAIT asurokin iidunyetaka kere lueroko, luetirorete airumet naesurumit eoŋ ikatuŋa Isirael ebe: “Koany, arutori kes kakwapukec, arutori da ekek loka Yuda kokidiŋikec.

¹⁵ Kosodi kanen, kadau arutor kes, aboŋuni etimi kes: ido enyakakini kes, ŋinituŋanan airumeteke, ŋinituŋanan da alupoke.

¹⁶ Kosodi kanen, arai edunyaka kesi aisisia iponesio luka ikatuŋa, iyapoete kolimito ekakiror ebe, ‘Kwape ejaria EJAKAIT’, kwape esisianakiniata kesi ikatuŋa aiyapo kolimito Baal; ŋes konyet edukokinere kidiŋ kikatuŋa.

¹⁷ Konye ebala EJAKAIT ebe, Arai mam epupete, kasodi eoŋ arutor ateker ŋin, arutori ido amudiari.”