Read Ebaibuli 1961 Yeremia 14 Bible Online

Yeremia 14 - Ebaibuli 1961 bible

Yeremia 14

¹Akirot naka EJAKAIT naabu kobu mama ejai Yeremia nuka ekure:

² “Ibworo Yuda, ijunepepas iruteike, Iboiete iketuŋa kokwap, kokuudianete; Ekear aimony naka Yerusalem.

³ Ijukarete isotiakec inyamurenekec aomare akipi: Edolete atapar, mam edumunete akipi; Eboŋunete ewokito amotiikec; Irumito ileic itiriraete, Imukorete akwesikec.

⁴Kanuka alup nuecilicilas, Naarai emamei akiru naetepi akwap, Irumito ikakoriok ileic, Imukorete akwesikec.

⁵Eebo, ewurie amori kais, ejali ikokuke, Naarai emameete inya.

⁶ Ebwoete itukoi kokuju neelapat, Iyenanakinos adumunia ekwam kwape ikuwei; Ewariwarete akonyekec, Naarai emameete ikui.

⁷ “Karaida kitejenikinete numam adolitekosi aluikin sio, Kiswama ijo kanuka ekonikiror, wu EJAKAIT: Naarai ipu akosiboŋonoreta kau; Kidiaka isio kama ijai.

⁸ Wu jo amun naka Isirael, Eketajaranike kapak naka ican, Kanukinyo ti kiraunia kwape loiboiororor kakwap, Ido kwape ekaloton loepaari aidareun akwap aiwalar?

⁹ Kanukinyo ti kiraunia kwape etuŋanan loeumokinit, Kwape lokirigi lomam epedori aitajar? Konye jo, wu EJAKAIT, ijai kidiŋikosi, Kimaikinitai ekonikiror; Sirikijal sio.”

¹⁰ Ebala kwanata EJAKAIT ituŋa lu ebe, “Kwape kwaŋin aminas airim: Mam kitikokinito akejekec: Ŋes mam EJAKAIT ecamakinia kes; Iitunit kwana numam adolitekec, Iticani aronisiokec.”

¹¹ Kabala EJAKAIT eoŋ atiar, “Sirikilipak ituŋa lu ainakinio ajokis.

¹² Arai ikanyete eteŋei, mam apupuni aimonyokec; arai da einakinete ainakineta nuicweio ka ainakineta nuka akiria, mam acamuni kes: konye apiari kes kekileŋ, ka eteŋei, ka atular da.”

¹³Kasodi eoŋ ebe, “Wu okwe, EJAKAIT Edeke, koany, elimonokinete inabin kes ebe, ‘Mam ianyunete ekileŋ, mam da ijaunete keteŋei; konye ainakini yes ainapakin naicasit kaibois kana.’ ”

¹⁴ Kosodi EJAKAIT atemar eoŋ atiar, “Edwareteinabin nukaiŋal kokirorika; mam eoŋ ejukarit kes, mam abu kecorak kes, karaida einer kakes: kidwarakinete yes aitapoet nakaiŋal, ka aidwar naatai, ka aimod naka itauonokec bonik.

¹⁵ Kanuka ŋun ebala kwanata EJAKAIT nuka inabin luedwarete kokirorika, komam eoŋ ejukarit kes, konye ebalasi ebe, ‘Mam ejaunos ekileŋ ka eteŋei kakwap kana’, ebe: Epiari ekileŋ ka eteŋei inabin ŋul.

¹⁶ Ituŋa da luedwarakinete kesi ireŋearitai korotin luka Yerusalem kanuka eteŋei ka ekileŋ: emamikinete luidaete kes, kes ka aŋorokec ka idwekec lusap ka lupesur. Naarai abukokini kes aronisikec.

¹⁷ “Ilimokini ijo kes akirot na ebe: Koleleata akiyo kakonyeka, Kuare kapaaran da, komam esaŋete; Naarai apaki akoku nabekot naka ikatuŋa arorwa naepol, Amusuŋut naerono noi.

¹⁸ Arai alomari ais, Koany, luearar kekileŋ! Arai alomari ore, Aso koany, luedekasi eteŋei! Naarai irimorete enabi ka esasedoti kere akwap, Komamei kes aijen.”

¹⁹ Iŋer teni ijo cut Yuda? Ala cut ekonitau Sion? Kanukinyo kidanyere sio, Komamei sio aŋaleun? Kipou kamunos ainapakin, Konye mam ajokis ebuno; Kimunos apak naka aŋaleun, ido koany aburun!

²⁰ Wu EJAKAIT, kilimori aronisikosi, Ka numam adolit da nuka lukapapaakosi: Naarai kipou kadiakasi kama ijai.

²¹ Sirikiitapian, kanuka ekonikiror; Sirikitisil eicoloŋ loka aibusesukon: Kiitu, sirikibil aitutuketekon kasio.

²² Ejaas kereka kotoma aamameak nuka ikapirin nuepedorete ayaun akiru? Epedori cabo akuj ayaun elimilim? Mere jo ŋopeŋol, wu EJAKAIT Edekekosi? Ŋes kidaria jo; Naarai isubi ijo iboro ŋul kere.