Read Ebaibuli 1961 Yeremia 18 Bible Online

Yeremia 18 - Ebaibuli 1961 bible

Yeremia 18

¹Akirot naabu kobu mama ejai Yeremia kama ejai EJAKAIT, ebe:

²“Konyou, kijesar togo loka ekajean, kaŋina da kesiirari jo akakiro.”

³Kasodi eoŋ aijesar togo loka ekajean, ido koany, iswamai akeswam kokokoroke.

⁴ Ido naemunaunor amot naiswamai ŋesi kelupe kakan naka ekajean, kirueakini bobo aije amot ace, kwape itojokitor ekajean aije.

⁵Kosodi kobu akirot naka EJAKAIT mama ajai ebe:

⁶ “Ebala EJAKAIT ebe, Wu jo ekek loka Isirael, mam kereka apedori eoŋ aiswamakin yes kwape eswamaa ekajean lo? Koany, kwape elupe kakan naka ekajean, ikoni ijo nen kakanika, ijo ekek loka Isirael.

⁷ Kapak kaŋin naenerar nuka ateker, ka nuka ajakanut, arutun ka abilibil ka amudiar da;

⁸ arai ibelokin ateker ŋin, naabu kenerite nuke, ainyein aronisike, eitokini aronis naalosikinit aiswamakin kes.

⁹Ido kapak kaŋin naenerar nuka ateker ka nuka ajakanut, aiduk ka aira ŋes;

¹⁰arai kiswama aronis kakonyeneka, komam erimari eporotoka, kasodi eoŋ aiitokin ajokis naabu kener aitojok ŋes.

¹¹ Aso do kolot, kolimok ituŋa luka Yuda, ka luiboiete ko Yerusalem ebe: ‘Ebala kwanata EJAKAIT ebe: Koany, etemok aronis mama ijaas, eneru akirot asurokin yes. Koboŋutu do yesi, ŋinituŋanan korotoke lokaronon, kitojokata ikusirotin ka aswamisiokus da.’

¹²“Konye etemarete ebe, ‘Emamei amun: naarai kitupi akirokosi, kiswamai da ŋinituŋanan kwape ejaar aninik naka eketau lokaronon.’

¹³ “Kanuka ŋun ebala EJAKAIT kwanata ebe: Kinitiŋita yesi atekerin, Iŋai epupunit akiro nuikote nen? Eswama abekot naka Isirael akirot nasogim noi.

¹⁴Epedori kereka akaka naka Lebanon aimijar katiida naka ais? Eonikinete kereka akip nuelilim nueleleunete kama elwana?

¹⁵ Naarai apotu ikatuŋa kemurwokis eoŋ, Apotu kisupurikis aamameak lukisupurununo; Kitiguikis kes korotinikec, kosokono lumojoŋ, Atubitoi kokitui, nemam erot itutut.

¹⁶ Aitaraun akwapukec aumokinet, Ka aijuar namam enaŋi. Eumokini ŋinituŋanan yenitori nen, Kimuŋimuŋi akouke.

¹⁷ Esiarisiari kes akonyen nuka lukasurup Kwape kekwam lokokide: Etodikini kes ekapur konye mere akakonyen, Kapaaran naka epolakec.”

¹⁸ Kosodete kesi atemar ebe, “Kopotu, kenerutu akiro asurokin Yeremia; naarai mam ikisila eoliorete kaneejai esasedoti, karaida ainerun kama ejaas lukacoa, karaida akirot kaneejai enabi. Kopotu do, kenomata ŋes kaŋajep, kenyeis oni aibwaikin etau akiroke kere.”

¹⁹Kibwaikinai eoŋ etau, wu EJAKAIT, Kiira eporoto loka ŋul kaluketoŋolopete eoŋ.

²⁰ Etacakinio kereka aronis itia ajokis? Naarai abokikis akaijar aipany. Kiitu kwape kabwoia kakonyenekon ainerakin kes ajokis, Aibelokin akoninyunyura kamakec.

²¹Kanuka ŋun kijaik ikecedwe oteŋei, Kokorak kes apedor naka ekileŋ; Aŋorokec kotwakiasi ikecedwe, koraut da apuserun. Kotularos ikecekiliok, Kodany ekileŋ ikecekatumunak kojie.

²²Kopupunoi aimony kotogoikec, Naisituriaikinia kes erioŋet! Naarai abokata aipany alokia eoŋ, Ebwaata atacin aisipokia akakeje.

²³ Konye wu EJAKAIT, ijeni ijo ainerunikec kere aiar eoŋ. Sirikisioni numam adolitekec, Sirikimwata da aronisikec kakonyenekon. Konye kolatarai kes kakonyenekon; Kitepesen kes kapak naka anyunyurakon.